Ezekiyeli 29:1-21
29 Mu mwaka ugira cumi, mu kwezi kugira cumi, ku musi ugira 12 w’ukwo kwezi, Yehova yambwiye ati:
2 «Mwana w’umuntu, niwerekeze amaso kuri Farawo umwami wa Misiri, uvuge ubuhanuzi bw’ibizomushikira n’ibizoshikira Misiri yose+.
3 Vuga uti: “Umukama Segaba Yehova avuze ati:
‘Ehe ngira nkurwanye, ewe Farawo mwami wa Misiri+,wewe rukoko rwo mu mazi rwiryamiye mu migende y’uruzi rwaco Nili*+.Wewe wavuze ngo: “Uruzi rwanje Nili ni rwanje, kandi ni je narwishiriyeho+.”
4 Naho ari ukwo, nzoshira ingobe* mu mibangabanga yawe, ntume amafi yo mu ruzi rwawe Nili amata ku bigaragamba vyawe.
Nzokuduza ndagukure mu ruzi rwawe Nili, wewe n’amafi yose yo muri urwo ruzi amase ku bigaragamba vyawe.
5 Nzoguhebera mu bugaragwa, mwe n’amafi yose yo mu ruzi rwawe Nili.
Uzogwa ku gahinga kandi nta wuzokwegeranya canke ngo agukorakoranye+.
Nzogutanga uribwe n’ibikoko vyo mw’ishamba be n’inyoni zo mu kirere+.
6 Ico gihe, ababa mu Misiri bose bazomenya vy’ukuri yuko ndi Yehova,kuko imfashanyo bahaye Abisirayeli yahobahoba nk’akatsi*+.
7 Barifadikije ukuboko kwawe, urajanjagurika,ubamanyura igitugu.
Barakwishimikije uravunika,utuma amaguru* yabo atirigana+.’
8 Umukama Segaba Yehova avuze rero ati: ‘Ehe ngira nkuzaneko inkota+, ndandure iwawe abantu n’ibikoko.
9 Igihugu ca Misiri kizotikizwa gisigare ari akahebwe+. Kandi bazomenya vy’ukuri yuko ndi Yehova, kuko wavuze* ngo: “Uruzi Nili ni rwanje, kandi ni je narushizeho+.”
10 Ngira rero ndakurwanye, ndwanye n’uruzi rwawe Nili. Igihugu ca Misiri nzogitikiza ntume cuma, gisigare ari umusaka+ kuva i Migidoli+ gushika i Siyene+, no gushika ku rubibe rwa Etiyopiya.
11 Nta muntu canke igitungwa kizohahonyoza ikirenge+, kandi kizomara imyaka 40 ata wukibamwo.
12 Igihugu ca Misiri nzokigira akahebwe kuruta ibindi bihugu, ibisagara vyaco bibe akahebwe kuruta ibindi bisagara mu kiringo c’imyaka 40+. Nzosanzaza Abanyamisiri mu mahanga, ndabashwiragize mu bihugu+.’
13 Kuko Umukama Segaba Yehova avuze ati: ‘Imyaka 40 niyahera, nzokoraniriza hamwe Abanyamisiri, ndabagarukane ndabakuye mu mahanga bazoba barasanzarijwemwo+.
14 Abanyamisiri bagizwe imbohe nzobagarukana mu gihugu ca Patirosi+, mu gihugu bakomokamwo. Bari ng’aho bazosigara ari ubwami ata co buvuze.
15 Misiri izosigara iri munsi y’ubundi bwami, kandi ntizokwongera kuganza ayandi mahanga+. Nzobagira inkehwa ku buryo batazoshobora kugira ububasha ku yandi mahanga+.
16 Misiri ntizopfa isubiriye kwizigirwa n’Abisirayeli+. Ico izokora, izobibutsa ikosa bakoze mu kurondera imfashanyo ku Banyamisiri. Kandi bazomenya vy’ukuri yuko ndi Umukama Segaba Yehova.’”»
17 Nuko mu mwaka ugira 27, mu kwezi kwa mbere, ku musi wa mbere w’ukwo kwezi, Yehova ambwira ati:
18 «Mwana w’umuntu, Nebukadinezari*+ umwami wa Babiloni, yakoresheje ingabo ziwe igikorwa gikomeye cane co kurwanya Tiro+. Imitwe yose yaratobotse ubuhanza, ibitugu vyose biramyoka. Mugabo we n’ingabo ziwe, nta mpembo baronse ku bw’igikorwa gikomeye bakoze batera Tiro.
19 Umukama Segaba Yehova avuze rero ati: “Igihugu ca Misiri ngira ndagihe Nebukadinezari* umwami wa Babiloni+. Azotwara ubutunzi bwaho, ahasahure ibintu vyinshi vyaho, abinyage. Ni vyo bizoba impembo y’ingabo ziwe.”
20 “Nzomuha igihugu ca Misiri kugira ndamuhembere igikorwa gikomeye yakoze mu kuhatera*, kuko ari jewe bakoreye+”, ni ko Umukama Segaba Yehova avuze.
21 Kuri uwo musi, nzotuma ihembe rinaga ku bw’Abisirayeli*+, nawe ndaguhe akaryo ko kuvugira hagati muri bo. Kandi bazomenya vy’ukuri yuko ndi Yehova.»
Utujambo tw'epfo
^ Muri uwu murongo no mu yikurikira, uruzi Nili rusobanura urwo ruzi n’imigende yarwo yo kuvomera imirima.
^ Ingobe ni ivyuma vyigonze nk’igera.
^ Mu giheburayo havuga ngo «irenga.»
^ Mu giheburayo havuga ngo «amafyinga.»
^ Mu giheburayo havuga ngo «yavuze.»
^ Mu giheburayo havuga ngo «Nebukadirezari.» Iyo ni iyindi nyandiko.
^ Mu giheburayo havuga ngo «Nebukadirezari.» Iyo ni iyindi nyandiko.
^ Ni ukuvuga i Tiro.
^ Canke «nzoha inkomezi Abisirayeli.»
