Imigani 31:1-31
31 Amajambo y’umwami Lemuweli, ubutumwa buhambaye nyina wiwe yamuhaye kugira amwigishe+:
2 Ndakubwire iki ga mwananje?Ndakubwire iki ga mwana nivyariye?Ndakubwire iki ga mwana w’indagano zanje+?
3 Ntuhe inkomezi zawe abagore+,canke ngo ufate inzira zitikiza abami+.
4 Ewe Lemuweli, ntibibereye,ntibibereye ko abami banywa umuvinyu,canke ko abatware bavuga ngo: «Duhe inzoga twinywere+!»
5 Ahandiho bonywa bakibagira amategeko,maze bakagoramika urubanza rw’abantu batobato.
6 Nimuhe inzoga abagira bacikane+,muhe umuvinyu abadundumiwe mu mutima+.
7 Nibanywe maze bibagire ubukene bwabo,ntibasubire kwibuka ingorane zabo.
8 Vugira abatazi kwivugira,uburanire abagiye gupfa bose+.
9 Vuga, kandi uce imanza mu bugororotsi.Buranira* abantu batobato n’abakene+.
א [Alefu]
10 Umugore abishoboye*+ ni nde yomuronka?
Ari n’agaciro kuruta amabuye y’agaciro yitwa korali*.
ב [Beti]
11 Umugabo wiwe aramwizigira n’umutima wiwe wose,kandi araronka ivyo akeneye vyose.
ג [Gimelu]
12 Yishura ivyiza umugabo wiwe,kandi nta kibi na kimwe amukorera, ubuzima bwiwe bwose.
ד [Daleti]
13 Ararondera ubwoya n’inyuzi z’ilino,kandi arahimbarwa no gukoresha amaboko yiwe+.
ה [He]
14 Ameze nk’amato* y’umudandaza+.Ibifungurwa vyiwe abikura kure.
ו [Vau]
15 Vyongeye, avyuka butaracamaze agaha ibifungurwa urugo rwiwe,n’abasukukazi akabaha rwabo+.
ז [Zayini]
16 Ariyumvira kwironsa itongo kandi akarigura,agatera umurima w’imizabibu akoresheje ivyo yabiriye akuya*.
ח [Heti]
17 Arakora ibikorwa biruhisha*+,kandi agakoresha amaboko yiwe yivuye inyuma.
ט [Teti]
18 Arabona ko urudandaza rwiwe rwunguka,kandi itara ryiwe ntirizima mw’ijoro.
י [Yodi]
19 Amaboko yiwe afata inkoni iriko ikizingo kivamwo inyuzi,intoke ziwe na zo zigafata agati bazingirako urunyuzi+.
כ [Kafu]
20 Araramvura ukuboko agafasha abantu batobato,agapfumbaturura igipfunsi agafasha abakene+.
ל [Lamedi]
21 Ntatinya ko imbeho* yobangamira urugo rwiwe,kuko abo mu rugo rwiwe bose bambaye impuzu zisusurutsa*.
מ [Memu]
22 Ni we yihingurira ibisaswa.
Impuzu ziwe zikozwe mu nyuzi z’ilino* no mu bwoya busa n’umuyugubwe*.
נ [Nuni]
23 Umugabo wiwe arazwi neza mu marembo y’igisagara+,aho yicara ari kumwe n’abashingantahe baho*.
ס [Sameki]
24 Arahingura impuzu z’ilino kandi akazigurisha,akagurisha n’imikaba* ku badandaza.
ע [Ayini]
25 Inkomezi n’icubahiro ni vyo bimuranga*,kandi ntatinya kazoza*.
פ [Pe]
26 Iyo ateranuye akanwa avugana ubwenge+,kandi itegeko ry’ubuntu* riri ku rurimi rwiwe.
צ [Tsade]
27 Arakurikirana neza ibikorwa vy’urugo rwiwe,kandi ntarya ivyo kurya atakoreye*+.
ק [Kofu]
28 Abana biwe barahaguruka bakavuga ko ahiriwe,kandi umugabo wiwe arahaguruka akamushemeza.
ר [Reshi]
29 Hari abagore benshi babishoboye*,ariko wewe, emwe urabaheta bose.
ש [Shini]
30 Igikundiro kirashobora guhenda, n’ubwiza burashobora guhera*+,ariko umugore atinya Yehova azoshemezwa+.
ת [Tau]
31 Nimumuhe impembo kubera ivyo akora*+,kandi ashemezwe mu marembo y’igisagara kubera ibikorwa vyiwe+.
Utujambo tw'epfo
^ Canke «buranira uburenganzira.»
^ Canke «ameze neza cane.»
^ Raba Insiguro y’amajambo.
^ Canke «nk’imeri.» Imeri ni ubwato bunini.
^ Canke «ivyo yungutse.» Mu giheburayo havuga ngo «ivyamwa vy’amaboko yiwe.»
^ Mu giheburayo havuga ngo «arakenyera inkomezi mu mafyinga.»
^ Mu giheburayo havuga ngo «impuzu zirimwo zibirizibiri.»
^ Canke «shelegi.» Shelegi ni utuvunjivunji twera cane dukoragurika nk’imvura. Mu gifaransa batwita neige.
^ Raba Insiguro y’amajambo.
^ Ni ibara risa n’ibitore bita ibiringanya (oberjine).
^ Canke «b’igihugu.»
^ Canke «imisipi.»
^ Canke «ni vyo yambaye.»
^ Canke «kandi aratwenga umusi w’ejo.»
^ Canke «inyigisho irimwo urukundo», «itegeko ry’urukundo rudahemuka (rudahera).»
^ Mu giheburayo havuga ngo «umukate w’ubunebwe.»
^ Canke «bameze neza cane.»
^ Canke «gucika ubusa.»
^ Mu giheburayo havuga ngo «nimumuhe ku vyamwa vy’amaboko yiwe.»
