Mika 1:1-16
1 Ibi ni vyo Yehova yabwiye Mika*+ w’i Moresheti mu gihe ca Yotamu+, Ahazi+ na Hezekiya+, abami b’Ubuyuda+. Yabimubwiye mu vyo yariko aramwereka bijanye na Samariya na Yeruzalemu:
2 «Nimwumve, yemwe mahanga mwese!
Umviriza wa si we n’ibiri muri wewe vyose.Umukama Segaba Yehova nabe icabona kibagiriza+,emwe Yehova iyo ari mu rusengero rwiwe rweranda.
3 Raba! Yehova agira aze avuye ahantu hiwe.Azomanuka ahonyange imisozi yo kw’isi.
4 Imisozi izoshongera munsi yiwe+,ibiyaya bisatagurike,nka kurya ishashara rishonga imbere y’umuriro,nka kurya kw’amazi asutswe ahantu hashunguruka.
5 Ivyo vyose vyatewe n’uko Yakobo yagararije,biterwa n’ibicumuro vy’Abisirayeli+.
None ni igiki catumye Yakobo agarariza?
Si Samariya+?
Ibibanza vyo gusengeramwo* vy’Ubuyuda+ ni nde yobibazwa?
Si Yeruzalemu?
6 Samariya nzoyigira ikirundo c’ibihomvagurike mu gahinga,ahantu ho gutera imizabibu.Amabuye yiwe nzoyaterera* mu kiyaya,imishinge yiwe ndayishire ahabona.
7 Ibishusho vyiwe bibajwe bizomenagurwa vyose+,kandi ingabire zose yahawe mu kwidandaza* zizoturirwa+.
Nzotikiza ibigirwamana vyiwe vyose.
Bizoba kuko ivyo vyose yabironse abikuye mu mpembo y’ubumaraya,kandi bizosubira kuba impembo y’abamaraya.»
8 Ku bw’ivyo, nzorira mboroge+.nzogenda ata birato nambaye kandi ndi gusa+.
Nzorira nk’imbwebwe,mboroge nk’ibinyoni vyitwa imbuni*.
9 Kuko uruguma rwiwe rudashobora gukira+.Rwarashitse no mu Buyuda+.
Icago carakwiragiye gushika kw’irembo ry’abantu bo mw’ihanga ryacu, gushika i Yeruzalemu+.
10 «Ntimubimenyeshe i Gati.Ntimurire na gato.
Ab’i Beti-Afura* nibikumbagaze mu mukungugu.
11 Yemwe ababa* i Shafiri, nimujabuke muri gusa, muri n’ibimaramare.
Ababa* i Zanani ntibasohotse.
Hazoba amaborogo i Beti-Ezeli, kandi abaho ntibazosubira kubashigikira.
12 Kuko ababa* i Maroti barindiriye ivyiza,mugabo kw’irembo rya Yeruzalemu hakaza ibibi bivuye kuri Yehova.
13 Yemwe ababa* i Lakishi+, nimubohere umukogote ku mafarasi awukwega!
Ni mwe mwatumye umukobwa wa Siyoni* acumura,kuko mwangararije nk’uko Abisirayeli bangararije+.
14 Ni co gituma uzoha Moresheti-Gati ingabire z’agasaga.
Abantu* b’i Akizibu+ barahenze abami ba Isirayeli.
15 Yemwe ababa* i Maresha+, nzobarungikira umwansi abatera*+.
Ubuninahazwa bwa Isirayeli buzoshika i Adulamu+.
16 Nimwimoshe, mwiharanguze kubera abana banyu mukunda.
Nimwiharanguze mumere nk’inkonakuko babatse abana banyu, bakabatwara mu bunyagano+.»
Utujambo tw'epfo
^ Izina «Mika» ni impfunyapfunyo y’izina «Mikayeli» (risobanura ngo «ni nde ameze nk’Imana?») canke «Mikaya» (risobanura ngo «ni nde ameze nka Yehova?»).
^ Mu giheburayo havuga ngo «ibibanza bitaramutse.» Raba Insiguro y’amajambo (Ibibanza bitaramutse).
^ Mu giheburayo havuga ngo «nzoyasuka.»
^ Canke «impembo zose z’ubumaraya akora.»
^ Mu gifaransa ni autruche.
^ Canke «mu nzu ya Afura.»
^ Mu giheburayo havuga ngo «ewe mugore aba.»
^ Mu giheburayo havuga ngo «umugore aba.»
^ Mu giheburayo havuga ngo «umugore aba.»
^ «Umukobwa wa Siyoni» ni amajambo ndyoshamvugo kenshi asigura igisagara ca Yeruzalemu canke abakibamwo.
^ Mu giheburayo havuga ngo «ewe mugore aba.»
^ Mu giheburayo havuga ngo «amazu.»
^ Mu giheburayo havuga ngo «ewe mugore aba.»
^ Canke «uwubanyaga utwanyu.»
