Tito 2:1-15
2 Ariko weho, ugume uvuga ibintu bihuye n’inyigisho ngirakamaro*+.
2 Abatama nibabe abantu batarenza urugero mu ngeso zabo, badafyina, biyumvira neza*, bakomeye* mu kwizera, mu rukundo no mu kwihangana.
3 N’abatamakazi nyene bagire inyifato y’abantu batinya Imana, ntibabe abambika ibara abandi canke abaja b’umuvinyu mwinshi, ahubwo babe abigisha ivyiza,
4 kugira bahanure* abagore bakiri bato gukunda abagabo babo, gukunda abana babo,
5 kuba abantu biyumvira neza*, batanduye, bitwararika ibikorwa vyo mu rugo*, bameze neza, bayobokera abagabo babo+, kugira ijambo ry’Imana ntiritukwe.
6 Guma uremesha n’abasore ngo babe abantu biyumvira neza*+,
7 kandi ugume ubera abandi akarorero mu bijanye n’ibikorwa vyiza muri vyose. Niwigishe ibitanduye* udafyina na gato+,
8 ukoresha imvugo imeze neza* idashobora gutorwa amahinyu+, kugira abaturwanya bamaramare, babure ikibi* na kimwe batuvugako+.
9 Abashumba nibayobokere ba shebuja muri vyose+, barondere kubashimisha, batavuga ngo na bo bavuge.
10 Ntibibe ba shebuja+ ahubwo berekane ko ari abizigirwa rwose, kugira ngo muri vyose basharize inyigisho y’Imana, yo Mukiza wacu+.
11 Kuko bwa buntu buhebuje* bw’Imana bwibonekeje, buzanira ubukiriro abantu b’uburyo bwose+.
12 Butwigisha kwamirira kure ukutubaha Imana n’ivyipfuzo vy’isi+, bukatwigisha no kubaho twiyumvira neza*, twigenza mu buryo bugororotse kandi twihebera Imana muri iyi si*+,
13 mu gihe tukirindiriye ca cizigiro giteye umunezero+, turindiriye n’uko ya Mana ikomeye be n’Umukiza wacu Yezu Kristu berekana ubuninahazwa bwabo.
14 Yaritanze ku bwacu+ kugira atubohore*+ tuve mu bugarariji bw’uburyo bwose, yongere yihumanurire umugwi w’abantu yagize ikintu kidasanzwe kimwegukira, bafise umwete wo gukora ibikorwa vyiza+.
15 Guma uvuga ivyo bintu, uhimiriza* wongera ukosora wishimikije ububasha bwose ufise+. Ntihagire umuntu n’umwe agusuzugura.
Utujambo tw'epfo
^ Canke «ntungamagara.»
^ Canke «bafise ubwenge buroranye.»
^ Mu kigiriki havuga ngo «bafise amagara meza.»
^ Canke «bakebure», «bigishe.»
^ Canke «bafise ubwenge buroranye.»
^ Canke «bitaho ingo zabo.»
^ Canke «bafise ubwenge buroranye.»
^ Hashobora kandi kuvugwa ngo «niwigishe mu buryo butanduye.»
^ Canke «ikintu c’agahomerabunwa.»
^ Canke «ngirakamaro», «ntungamagara.»
^ Raba Insiguro y’amajambo.
^ Canke «dufise ubwenge buroranye.»
^ Canke «iki gihe.» Raba Insiguro y’amajambo (Igihe).
^ Mu kigiriki havuga ngo «aducungure.»
^ Canke «uremesha.»
