Yeremiya 44:1-30
44 Imana yaravuganye na Yeremiya ku bijanye n’Abayuda bose baba mu gihugu ca Misiri+, ababa i Migidoli+, i Tahapanesi+, i Nofu*+ no mu gihugu ca Patirosi+, imubwira iti:
2 «Yehova Nyeningabo, Imana ya Isirayeli, avuze ati: “Mwarabonye ivyago vyose nateje Yeruzalemu+ n’ibisagara vyose vyo mu Buyuda. Ubu hasigaye ari ibihomvagurike, ata muntu ahaba+.
3 Ivyo vyatumwe n’ibibi bakoze kugira ngo bambabaze, mu kuja gushikanira ibimazi+ izindi mana no kuzisenga*, imana mutamenye, yaba mwebwe canke ba sogokuruza banyu+.
4 Nagumye ndabatumako abasavyi banje bose b’abahanuzi, nkabatuma incuro n’izindi* ngo bababwire bati: ‘Ndabinginze ntimukore ico kintu gishisha nanka+.’
5 Mugabo ntibumvirije canke ngo batege ugutwi kugira ngo bahindukire bahebe gukora ibibi, bareke gushikanira ibimazi izindi mana+.
6 Naciye nsuka uburake bwanje n’ishavu ryanje maze vyaka nk’umuriro mu bisagara vyo mu Buyuda no mu mabarabara y’i Yeruzalemu. Haciye hasigara ari ibihomvagurike n’agahinga nk’uko biri uyu musi+.”
7 Yehova Imana Nyeningabo, Imana ya Isirayeli, avuze rero ati: “Kubera iki muriko mwikwegera ivyago bikomeye, bizotuma umugabo n’umugore, umwana n’uruyoya, bahona mu Buyuda ntihagire n’uwusigara?
8 Kubera iki mumbabarisha ibikorwa vy’amaboko yanyu, mugashikanira ibimazi izindi mana mu gihugu ca Misiri mwagiye kubamwo? Muzohona musigare muri umuvumo mube n’abo gucokorwa mu mahanga yose yo kw’isi+.
9 Mbega mwibagiye ibikorwa bibi vya ba sogokuruza banyu, n’ibikorwa bibi vy’abami b’Ubuyuda+, n’ibikorwa bibi vy’abagore babo+, n’ibikorwa bibi vyanyu bwite, n’ibikorwa bibi vy’abagore banyu+, vyakorerwa mu Buyuda no mu mabarabara y’i Yeruzalemu?
10 Gushika n’uyu musi ntimwicishije bugufi*. Ntimwagize ubwoba+ canke ngo mukurikize amategeko yanje n’ivyagezwe vyanje nabahaye mwe na ba sogokuruza banyu+.”
11 Yehova Nyeningabo, Imana ya Isirayeli, avuze rero ati: “Niyemeje kubateza ivyago, ndandure Ubuyuda bwose.
12 Kandi nzofata abo mu Buyuda basigaye bari biyemeje kuja mu gihugu ca Misiri kubayo, bose ndabahonerezeyo+. Bazokwicwa n’inkota, bamarwe n’inzara. Kuva ku muto gushika ku mukuru, bazokwicwa n’inkota n’inzara. Bazoba ibivume, bacike akajoreza n’umuvumo, babe abo gucokorwa+.
13 Nzohana ababa mu gihugu ca Misiri, nk’uko nahanye Yeruzalemu, nkoresheje inkota, inzara n’ikiza*+.
14 Kandi abo mu Buyuda basigaye bagiye kuba mu gihugu ca Misiri, ntibazohunga canke ngo barokoke basubire mu Buyuda. Bazokwipfuza rwose gusubirayo ngo babeyo, mugabo ntibazosubirayo, kiretse bakeyi bazorusimba.”»
15 Abagabo bose bari bazi ko abagore babo bahora bashikanira ibimazi izindi mana, n’abagore bose bari bahagaze ng’aho, abo bose bakaba bari ishengero rinini, n’abantu bose baba mu gihugu ca Misiri+, i Patirosi+, bishura Yeremiya bati:
16 «Ivyo utubwiye mw’izina rya Yehova, ntituvyumviriza.
17 Ahubwo twiyemeje gukora ivyatwiviriye mu kanwa vyose: tuzoshikanira ibimazi umwamikazi w’ijuru* tumusukire n’amashikanwa y’ibinyobwa+, nk’uko twe na ba sogokuruza bacu, abami bacu n’abatware bacu twabigira mu bisagara vy’Ubuyuda no mu mabarabara y’i Yeruzalemu. Ico gihe twararya tugahaga kandi twari tumerewe neza. Ivyago twarabaza.
18 Mugabo kuva igihe twareka gushikanira ibimazi umwamikazi w’ijuru* no kumusukira amashikanwa y’ibinyobwa, twarabuze ibintu vyose, turahona kubera inkota n’inzara.»
19 Abagore bongerako bati: «Twarashikanira ibimazi umwamikazi w’ijuru* tukamusukira amashikanwa y’ibinyobwa. None ugira ngo ntitwaba twagishije inama abagabo bacu imbere yo gukora udukate tw’ibimazi dufise ishusho yiwe, n’imbere yo kumusukira amashikanwa y’ibinyobwa?»
20 Nuko Yeremiya abwira abantu bose, abagabo n’abagore babo, n’abantu bose bariko baramuvugisha ati:
21 «Ibimazi mwahora mushikanira mu bisagara vy’Ubuyuda no mu mabarabara y’i Yeruzalemu+, mwebwe na ba sogokuruza banyu, abami banyu, abatware banyu n’abanyagihugu, Yehova yaravyibutse bigaruka mu mutima wiwe.
22 Harageze aho Yehova ataba agishoboye kwihanganira ibibi mukora n’ibintu bishisha mwari mwarakoze, bituma igihugu canyu gitikizwa, gisigara ari akajoreza n’umuvumo, ata wukibamwo, nk’uko biri uyu musi+.
23 Ivyo vyago vyabashikiye nk’uko mubibona uyu musi, vyabaye kubera ko mwashikanye ivyo bimazi no kubera ko mwacumuye kuri Yehova, ntimwumvira ijwi rya Yehova, ntimwakurikiza amategeko yiwe, ivyagezwe vyiwe n’ivyibutswa vyiwe+.»
24 Yeremiya abandanya kubwira abantu bose n’abagore bose ati: «Nimwumve ijambo rya Yehova, mwese abo mu Buyuda muri mu gihugu ca Misiri.
25 Yehova Nyeningabo, Imana ya Isirayeli, avuze ati: “Ivyo mwe n’abagore banyu mwavuze n’akanwa kanyu mwarabikoze n’amaboko yanyu. Mwavuze muti: ‘Tuzoshitsa vy’ukuri indagano twagize zo gushikanira ibimazi umwamikazi w’ijuru* no kumusukira amashikanwa y’ibinyobwa+.’ Yemwe bagore, muzoshitsa vy’ukuri indagano zanyu, mukore ivyo mwaraganye.”
26 Nimwumve rero ivyo Yehova avuze, mwebwe mwese abo mu Buyuda muba mu gihugu ca Misiri: “Yehova avuze ati: ‘Ehe ndahiye mw’izina ryanje rihambaye yuko ata muntu n’umwe wo mu Buyuda+, aho ari hose mu gihugu ca Misiri, azosubira kurahira mw’izina ryanje akavuga ngo: “Ndahiye Umukama Segaba Yehova Imana nzima+!”
27 Ngira ndabagumizeko ijisho kugira ndabateze ivyago aho kubagirira neza+. Kandi abantu bose bo mu Buyuda bari mu gihugu ca Misiri bazokwicwa n’inkota n’inzara, gushika bazimanganye+.
28 Bakeyi gusa ni bo bazokira inkota, bave mu gihugu ca Misiri basubire mu Buyuda+. Abo mu Buyuda bose basigaye baje kuba mu gihugu ca Misiri, bazoheza bamenye ko ijambo ryanje ari ryo ryarangutse, canke ko ari iryabo.’”»
29 «Yehova avuze ati: “Iki ni co kizobabera ikimenyetso c’uko nzobahanira aha hantu, ku buryo mumenya yuko ivyago navuze ko nzobateza bizoba vy’ukuri.
30 Jewe Yehova mvuze nti: ‘Ehe ngira ntume Farawo Hofura, umwami wa Misiri, agwa mu maboko y’abansi biwe no mu maboko y’abarondera kumwica, nk’uko natumye Zedekiya umwami w’Ubuyuda agwa mu maboko ya Nebukadinezari* umwami wa Babiloni, umwansi wiwe yarondera kumwica+.’”»
Utujambo tw'epfo
^ Canke «Memfisi.»
^ Mu giheburayo havuga ngo «kuzikorera.»
^ Mu giheburayo havuga ngo «nkavyuka kare nkabatuma.»
^ Canke «ntimwumvise mujanjaguritse.» Mu giheburayo havuga ngo «ntibajanjaguritse.»
^ Canke «indwara.»
^ Ni izina ry’icubahiro ry’ikimanakazi casengwa n’Abisirayeli bahevye Imana. Gishobora kuba cari ikimanakazi c’ivy’irondoka.
^ Ni izina ry’icubahiro ry’ikimanakazi casengwa n’Abisirayeli bahevye Imana. Gishobora kuba cari ikimanakazi c’ivy’irondoka.
^ Ni izina ry’icubahiro ry’ikimanakazi casengwa n’Abisirayeli bahevye Imana. Gishobora kuba cari ikimanakazi c’ivy’irondoka.
^ Ni izina ry’icubahiro ry’ikimanakazi casengwa n’Abisirayeli bahevye Imana. Gishobora kuba cari ikimanakazi c’ivy’irondoka.
^ Mu giheburayo havuga ngo «Nebukadirezari.» Iyo ni iyindi nyandiko.
