Yesaya 63:1-19
63 Uyo ni nde aje ava i Edomu+,aje ava i Bozira+ yambaye impuzu z’amabara akayangana*,yambaye impuzu ziteye igomwe,agatambuka afise inkomezi nyinshi?
«Ni jewe, Umwe avuga mu bugororotsi,Umwe afise inkomezi nyinshi zo gukiza.»
2 Kubera iki impuzu zawe zitukura?Kubera iki impuzu zawe zisa n’iz’uwugana* umuvinyu+?
3 «Naganiye* umuvinyu mu bwato ndi jenyene.
Mu bantu bo mu mahanga nta n’umwe twari kumwe.
Nagumye ngana abansi banje nshavuye,nguma ndabahonyanga naratse+.
Amaraso yabo yatarukiye ku mpuzu zanje,nanduza ivyambarwa vyanje vyose.
4 Kuko umusi w’ukwihora uri mu mutima wanje+,kandi umwaka w’ugucungura abantu banje washitse.
5 Naritegereje mugabo sinaronka uwumfasha.Narababajwe n’uko ata n’umwe yaje kunshigikira.
Naciye nkoresha ukuboko kwanje nzana ubukiriro*+,uburake bwanje buranshigikira.
6 Nahonyanze amahanga nshavuye,ndababoreza uburake bwanje+,amaraso yabo ndayasesa hasi.»
7 Nzovuga ibikorwa vy’urukundo* vya Yehova,mvuge ibikorwa vya Yehova bibereye gushemezwa.Nzobivuga kubera ivyo Yehova yatugiriye vyose+,ibintu vyiza vyinshi yakoreye ihanga rya Isirayeliabitumwe n’imbabazi ziwe n’urukundo* rwiwe rwinshi.
8 Kuko yavuze ati: «Ni ukuri ni abantu banje, abana batazohemuka*+.»
Ni co gituma yababereye Umukiza+.
9 Amarushwa yose yabashikiye yaramuteye intuntu+.
Intumwa yiwe bwite* yarabakijije+.
Kubera urukundo rwiwe n’impuhwe ziwe yarabacunguye+,kandi mu misi yose ya kera yarabakuye hasi, arabaterura+.
10 Mugabo baragararije+, batuntuza impwemu yiwe nyeranda+.
Yaciye ahinduka umwansi wabo+,arabarwanya+.
11 Maze bibuka imisi ya kera,igihe umusavyi wiwe Musa yari akiriho, bavuga bati:
«Ari hehe Umwe yabaduganye abakuye mu kiyaga+ bari kumwe n’abungere b’ubusho bwiwe+?
Ari hehe Umwe yamushiramwo impwemu yiwe nyeranda+?
12 Ari hehe Umwe yatuma ukuboko kwiwe guhambaye kugendana n’ukuryo kwa Musa+,Umwe yagabura amazi imbere yabo+kugira ngo yiheshe izina ryamaho+?
13 Ari hehe Umwe yabacisha mu mazi asuriranya*,ku buryo bahaca ntibatsitare,nka kurya kw’ifarasi mu gahinga*?
14 Kurya ibitungwa bimanuka mu kiyaya kuruhuka,ni ko impwemu ya Yehova yatumye baruhuka+.»
Ukwo ni ko wayoboye abantu bawe,wihesha izina rihambaye*+.
15 Raba hasi uri mw’ijuru,urabe uri iyo hejuru uba, ahantu heranda kandi haninahaye*.
Mbega umwete wawe n’inkomezi zawe,ikigumbagumba cawe+ cinshi* n’imbabazi zawe+, biri hehe?
Ntibikinshikira.
16 Wewe uri Data+.Naho Aburahamu yoba atatuzina Isirayeli ntatumenye,wewe Yehova uri Data.
Uri Umucunguzi wacu wo kuva kera, ni ryo zina ryawe+.
17 Kubera iki ga Yehova ureka* tukangarira kure y’inzira zawe?
Kubera iki ureka* imitima yacu igakomantara ku buryo tutagutinya+?
Nugaruke udutabare ku bw’abasavyi bawe,ya miryango igize intoranwa yawe+.
18 Ihanga ryawe ryeranda ryamaze igihe gito ryigaruriye igihugu.
Abansi bacu barahonyanze ahantu hawe heranda+.
19 Haheze igihe kirekire tumeze nk’abantu utigeze uganza,nk’abantu batigeze bitirirwa izina ryawe.
Utujambo tw'epfo
^ Hashobora kandi kuvugwa ngo «zitukura cane.»
^ Mu giheburayo havuga ngo «uwuganisha ibirenge.»
^ Mu giheburayo havuga ngo «naganishije ibirenge.»
^ Canke «ndonka intsinzi.»
^ Canke «urukundo rudahemuka (rudahera).»
^ Canke «urukundo rudahemuka (rudahera).»
^ Canke «batazobesha.»
^ Canke «umumarayika yaje ava imbere yiwe.»
^ Canke «mw’ibenga ry’amazi.»
^ Canke «mu bugaragwa.»
^ Canke «ryiza.»
^ Canke «heza.»
^ Mu giheburayo havuga ngo «ukudobangana kw’amara yawe.»
^ Canke «utuma.»
^ Canke «utuma.»
