Yobu 10:1-22
10 Ubuzima bwanje buranshisha+.
Ngira nsuke amaganya yanje yose,
mvuge ndundumiwe mu mutima!
2 Nzobwira Imana nti: “Ntunkubite intahe mu gahanga.
Mbwira igituma uriko urandwanya.
3 Mbega hari ico bikwungura kuncinyiza,ugasuzugura igikorwa c’amaboko yawe+,ariko ugashigikira imigambi y’ababisha?
4 Mbega ufise amaso y’inyama,canke ubona nk’uko umuntu buntu abona?
5 Mbega imisi yawe ingana n’iy’abantucanke imyaka yawe ingana n’iy’umuntu+,
6 ku buryo uguma urondera ikosa ryanje,ukaguma uhiga igicumuro canje+?
7 Urazi ko ata kosa mfise+,kandi nta woshobora kundokora mu kuboko kwawe+.
8 Amaboko yawe ni yo yambumbabumvye arandema+,ariko raba ugira unkureho!
9 Ndagusavye wibuke ko wandemye mw’ibumba+,ariko raba ugira unsubize mu mukungugu+.
10 Mbega ntiwansutse nk’amata,ugatuma mvura nk’amavuta y’inka*?
11 Waranyambitse urukoba n’inyama,umfatanisha* amagufa n’imitsi+.
12 Warampaye ubuzima, unyereka urukundo*.Warankingiye* wongera urambungabunga+.
13 Ariko ibi ni vyo wateguye kunkorera mu mpisho*.
Ndazi ko ivyo bintu biriko biva iwawe.
14 Iyo mba naracumuye, uba warabimenye+,kandi ntiwompariye ikosa ryanje.
15 Noba nigorewe hamwe noba ndi mw’ikosa!
Kandi naho noba ndi intungane, sinoduza umutwe+kuko nuzuye ibimaramare n’umubabaro+.
16 Hamwe noduza umutwe, woca umpiga nk’intambwe+,ugasubira kundwanya ukoresheje ububasha bwawe.
17 Uzana ivyabona bishasha vyo kunyagiriza,ishavu umfitiye rikongerekana,ivyago na vyo bikaguma bikurakuranwa kuri jewe.
18 Kubera iki none wankuye mu nda ya mama+?
Mba naripfiriye ntihagire n’ijisho rimbona.
19 Vyari kumera nk’aho ntigeze mbaho,bari guca bampamba nkiva mu nda.”
20 Mbega imisi nsigaje si mikeyi+? Imana ninyirekere.Ninkureko amaso yayo kugira nduhuke gatoyi*+.
21 Imbere y’uko nigira (kandi sinzogaruka+)mu gihugu c’umwiza w’umuzitanya*+,
22 mu gihugu c’umwijima w’umuzimagiza,igihugu c’igitutu cijimye n’akajagari,aho umuco waho umeze nk’umwiza.»
Utujambo tw'epfo
^ Canke «iforomaji.»
^ Mu giheburayo havuga ngo «unjishisha.»
^ Canke «urukundo rudahemuka (rudahera).»
^ Canke «warakingiye impemu zanje», «warakingiye ubuzima bwanje.»
^ Mu giheburayo havuga ngo «kandi ivyo bintu wabinyegeje mu mutima wawe.»
^ Canke «ndyoherwe gatoyi.»
^ Canke «umwiza n’igitutu c’urupfu.»
