Yona 4:1-11
4 Ariko ivyo bibabaza cane Yona, aca arurumba ishavu.
2 Asenga rero Yehova ati: «Ewe Yehova, erega nari nzi ko ari ko vyogenze nkiri mu gihugu iwacu. Ni co gituma mu ntango narondeye guhungira i Tarushishi+. Erega nari nzi ko uri Imana y’impuhwe* n’imbabazi, iteba gushavura kandi yuzuye urukundo*+, ibabazwa n’ivyago.
3 None rero Yehova, ndakwinginze unkureho, kuko nopfuma nipfira hako mbaho+.»
4 Yehova amubaza ati: «Aho vy’ukuri wari ukwiye gushavura gutyo?»
5 Maze Yona ava mu gisagara, aja kwicara mu buseruko bwaco. Yiyubakira ubwugamo, yicara mu gitutu cabwo kugira arabe ibishikira ico gisagara+.
6 Nuko Yehova Imana ameza umutanga* hejuru ya Yona ngo habe igitutu hejuru y’umutwe wiwe, kugira aronke agahengwe. Yona aca aranezerwa cane kubera uwo mutanga.
7 Mugabo ku musi ukurikira mu mutwenzi, Imana y’ukuri irungika urunyo. Maze rurya uwo mutanga uruma.
8 Izuba rirashe, Imana irungika kandi umuyaga wo mu buseruko uturira, maze izuba rikubita Yona mu mutwe, amera nk’uwugira arabe. Aguma yisabira gupfa. Yavuga ati: «Nopfuma nipfira hako mbaho+.»
9 Imana ibaza Yona iti: «Aho vy’ukuri wari ukwiye gushavura ukuraho kubera uwo mutanga+?»
Na we avuga ati: «Vyari bikwiriye ko nshavura cane ku buryo mbere nipfuza gupfa.»
10 Ariko Yehova avuga ati: «Wumviye akagongwe umutanga utakoreye canke ngo umeze. Wameze mw’ijoro rimwe kandi wuma mw’ijoro rimwe.
11 None jeho, sinari nkwiye kwumvira akagongwe Ninewe, ico gisagara gikomeye+ kirimwo abantu barenga 120.000 batazi gutandukanya iciza n’ikibi*, be n’ibitungwa vyabo vyinshi+?»
Utujambo tw'epfo
^ Canke «ubuntu.»
^ Canke «urukundo rudahemuka (rudahera).»
^ Hashobora kandi kuvugwa ngo «ikibonobono.»
^ Canke «ukuryo n’ukubamfu.»
