Zaburi 69:1-36
Ku mukuru w’abaririmvyi: bayiririmbira kw’ijwi ryitwa «Amalisi.» Ni zaburi ya Dawidi.
69 Ewe Mana, nunkize kuko amazi agira antware+.
2 Namaze kunyikira mu rwondo, singira aho mpagarara+.
Nacokeye mu mazi y’ibenga,kandi imikuba iriko irantwara+.
3 Narushe kubera nguma ntabaza+,umuhogo wanje wasaraye.
Amaso yanje yaruhijwe no kurindira Imana yanje+.
4 Abanyankira ubusa+ni benshi kuruta umushatsi wo ku mutwe wanje.
Abarondera kunyica,abansi banje katwa*, babaye benshi.
Nabwirijwe kuriha ivyo ntari nivye.
5 Ewe Mana, urazi ibintu vy’ubupfu nakoze,kandi icaha nakoze ntiwigeze ukinyegezwa.
6 Ewe Mukama Segaba, Yehova Nyeningabo,abakwizigira ntibamaramare kubera jewe!
Ewe Mana ya Isirayeli,abakurondera ntibateterwe kubera jewe!
7 Ndasigwa iceyi kubera wewe+,nsigaye nuzuye ibimaramare+.
8 Benewacu bamfata nk’umuntu batazi.Nsigaye ndi kavamahanga kuri bene mama+.
9 Umwete w’inzu yawe urandurumbamwo+,kandi ibitutsi vy’abagutuka bigwa kuri jewe+.
10 Igihe nicisha bugufi nkisonzesha*,vyatumye abantu bantuka.
11 Igihe na ho nambara igunira,vyatumye bansuzugura.
12 Nsigaye ndi ikiyago c’abicaye kw’irembo ry’igisagara,nkaba n’indirimbo y’imborerwa.
13 Ewe Yehova, ese isengesho ryanje ryogushikiraku mwanya ubona ko ubereye+!
Ewe Mana, kubera urukundo* rwawe rwinshi,nunyishure unyereke ko uri umukiza atananirwa+.
14 Ndokora unkure mu rwondo,ntureke ngo nyike.
Nunkize abanyanka,unkure mu mazi y’ibenga+.
15 Ntureke ngo imikuba y’umwuzure intware+,canke ngo ibwina hamire,canke ngo ikinogo* kinyugarireko umunwa waco+.
16 Ewe Yehova, nunyishure kuko urukundo* rwawe ari rwiza+.
Nuhindukire undabe kubera imbabazi zawe nyinshi+,
17 kandi ntuhishe mu maso hawe umusavyi wawe+.
Nunyishure ningoga kuko ngeze habi+.
18 Nunyegere untabare,unkize abansi banje.
19 Urazi ingene bansiga iceyi, ingene bamaramaza n’ingene bantetereza+.
Abansi banje bose urababona.
20 Iceyi camvunye umutima kandi iyo mvune ntikira*.
Nari niteze impuhwe ariko nta zo nabonye+.Nari niteze abampoza ariko narababuze+.
21 Aho kumpa ibifungurwa bampaye ubumara*+,bampa inkarihe y’umuvinyu kugira bamare inyota+.
22 Imeza yabo nibabere umutego,ukuroranirwa kwabo na kwo kubabere umushibuka+.
23 Amaso yabo nahume ntibasubire kubona,amafyinga yabo na yo agume ajugumira.
24 Nubasukeko uburake* bwawe,ishavu ryawe rirurumba ribahamvye+.
25 Aho baba* nihacike umusaka,ntihagire uwuba mu mahema yabo+.
26 Kuko baguma bakurikirana uwo wakubise,bakaguma bavugavuga imibabaro y’abo wakomerekeje.
27 Niwongere ikosa ku makosa yabo,kandi ntubabone nk’abagororotsi.
28 Amazina yabo nafutwe mu gitabu c’ubuzima*+,kandi ntibandikwe hamwe n’abagororotsi+.
29 Ariko jewe ndi mu marushwa n’imibabaro+.
Ewe Mana, nunkingire ukoresheje ububasha bwawe.
30 Nzoririmbira amashemezo izina ry’Imana,kandi nzoyininahaza ndayishimire.
31 Ivyo bizohimbara Yehova kuruta impfizi y’inka,kuruta ishuri ifise amahembe n’ibinono+.
32 Abitonda bazobibona banezerwe.
Yemwe abarondera Imana, nimureme.
33 Kuko Yehova yumviriza abakene+,kandi ntazosuzugura abantu biwe bagizwe imbohe+.
34 Ijuru n’isi nibimushemeze+,hamwe n’ibiyaga n’ibiba muri vyo vyose.
35 Kuko Imana izokiza Siyoni+,kandi izosanura ibisagara vy’Ubuyuda.Abantu bayo bazohaba, bahigarurire.
36 Uruvyaro rw’abasavyi bayo ruzohatorana+,kandi abakunda izina ryayo+ bazokwiberayo.
Utujambo tw'epfo
^ Canke «abansi banyankira ubusa.»
^ Hashobora kandi kuvugwa ngo «igihe narira nongera ndisonzesha.»
^ Canke «urukundo rudahemuka (rudahera).»
^ Canke «icobo.»
^ Canke «urukundo rudahemuka (rudahera).»
^ Canke «kandi ndi mukwihebura.»
^ Canke «igiterwa c’ubumara.»
^ Canke «ishavu.»
^ Canke «amakambi yabo azitijwe uruhome.»
^ Canke «mu gitabu c’abazima.»
