Kubabarira bisobanura kwirengagiza icakubabaje be n’umubabaro coba caguteje. Ntibisigura ko uba ufatiye mu rwara ico kintu cakubabaje canke ngo ufate ko ata cabaye.

ICO BIBILIYA IVUGA: “Mubandanye kwihanganirana no kubabarirana ata gahigihigi iyo hari uwufise ico yidogera uwundi.”​—Abakolosayi 3:13.

“Igihe ukunda umuntu ntiwibanda ku tunenge twiwe, ahubwo wibanda ku kigoro agira arondera gukosora ibintu.”​—Aaron.

Kubika inzika birashobora kukugirira nabi ku mubiri no ku mutima, tutibagiye n’uko vyohungabanya urugo rwawe.

“Umusi umwe umugabo wanje yaransavye imbabazi kubera ko yari yambabaje cane. Ntivyanyoroheye kumubabarira. Naho nahavuye ndamuharira, ndicuza kuba ntabigize kare, kuko vyatosekaje ubucuti bwacu kandi bitari ngombwa.”​—Julia.

NIWISUZUME

Ubutaha, uwo mwubakanye niyavuga canke agakora ikintu kikubabaza, uraca wibaza uti:

• ‘Noba nshavuzwa n’akantu kose?’

• ‘Ico kintu coba gikomeye cane ku buryo ategerezwa kunsaba imbabazi, canke nocirengagiza?’

GANIRA N’UWO MWUBAKANYE

• Tubabarirana haciye igihe kingana iki?

• Twokora iki kugira ngo ntituze turateba kubabarirana?

IVYOGUFASHA

• Igihe uwo mwubakanye akubabaje ntuce wiyumvira ko yabigize nkana.

• Gerageza kwirengagiza ivyo yagukoreye, wibuke ko “twese dutsitara kenshi.”​—Yakobo 3:2.

“Igihe twese turi mu makosa usanga vyoroshe kubabarirana, ariko ntivyoroha igihe tubona ko uwundi ari we ari mw’ikosa. Kubabarira bisaba kwicisha bugufi vy’ukuri.”​—Kimberly.

ICO BIBILIYA IVUGA: “Ni[m]wikiranure ningoga.”​—Matayo 5:25.