Ubuhinga bwa none bugira ingaruka izihe ku kuntu wiyumvira?
Abantu barakeneye kuguma biga, haba kw’ishure, ku kazi canke kubera izindi mvo. Ubuhinga bwa none burafasha. Ubu biroroshe kuruta ikindi gihe cose gushikira amakuru menshi cane utiriwe urava muhira, canke mbere utiriwe urava aho wicaye.
Ariko rero benshi mu bakoresha cane ubuhinga bwa none bahura n’ingorane zikurikira:
-
Birabagora kugumiza ubwenge ku vyo bariko barasoma.
-
Birabagora cane kwitunira ku gikorwa kimwe.
-
Barambirwa ningoga igihe ata we bari kumwe.
ICO UKWIYE KUMENYA
GUSOMA
Abantu bamwebamwe iyo bariko basomera ku twuma two mu buhinga bwa none usanga bacishacishako, aho kwitonda ngo basome ikiganiro cose.
Gusoma ucishacishako birafasha igihe uba wipfuza inyishu yihuta. Ariko rero, ubwo si uburyo bwiza bwo gusoma igihe vy’ukuri uba wipfuza gutahura neza iciyumviro kanaka.
ZIRIKANA KURI IKI KINTU: Woba ushobora gusoma ibiganiro birebire? Kubigenza gutyo vyoba vyogufasha kumenya ibintu vyinshi?—IMIGANI 18:15.
IGIKORWA KIMWE
Hari abavuga ko ubuhinga bwa none butuma bashobora gukora ibikorwa bibiri icarimwe, nko kwiga bongera bandika amamesaje. Ariko igihe batituniye ku gikorwa kimwe, nta na kimwe muri ivyo bibiri bakora neza, na canecane igihe vyompi bisaba gukoresha ubwenge.
Naho kwitunira ku gikorwa kimwe bitoroshe, biravamwo ivyiza. Umuyabaga yitwa Grace avuga ati: “Bituma ugabanya amakosa kandi ntuhagarika umutima cane. Nasanze ari vyiza kwitunira ku gikorwa kimwe, aho gukorera ibikorwa vyinshi icarimwe.”
ZIRIKANA KURI IKI KINTU: Gukora ibintu vyinshi icarimwe vyoba bigabanya ubushobozi bwawe bwo gutahura no kwibuka?—IMIGANI 17:24.
KURAMBIRWA NINGOGA
Abantu benshi usanga barambirwa ningoga igihe ari bonyene ahantu hatekanye, bagaca bikora ku buhinga bwa none kugira babe barimara irungu. Umugore umwe yitwa Olivia yiyemerera ati: “Maze iminuta 15 gusa ntari kuri telefone, tablette canke televiziyo, nca numva ndambiwe.”
Yamara rero, kuba umuntu ari wenyene biramuha akaryo keza ko kuzirikana yitonze. Ivyo birahambaye cane igihe turiko turiga, twaba turi bato canke dukuze.
ZIRIKANA KURI IKI KINTU: Igihe uri wenyene woba uca ukoresha ako karyo kugira uzirikane?—1 TIMOTEYO 4:15.
ICO WOKORA
NUSUZUME UKUNTU UKORESHA UBUHINGA BWA NONE
Wokoresha gute ubuhinga bwa none kugira urushirize kwiga neza? Ni gute wobukoresha bigatuma utiyumvira neza canke ngo wige neza?
ICO BIBILIYA IVUGA: “Zigama ubukerebutsi ngirakamaro n’ubushobozi bwo kwiyumvira.”—IMIGANI 3:21.
Raba kandi
URWARUKA RURIBAZA
Nokwiga gute kwitunira ku vyo nkora?
Raba ibiringo bitatu aho ubuhinga bwa none bushobora gutuma utitunira ku kintu be n’ico wokora kugira ngo urushirize kwitunira ku vyo ukora.
BE MASO!
Woba utakironka umwanya kubera akazi?
Abenshi bavuze ko bigoye cane gushitsa ivyo basabwa ku kazi no mu miryango yabo. None biterwa n’iki? Hoba hari ico umuntu yokora?
URWARUKA RURIBAZA
Vyoba ari vyiza gukora ibintu vyinshi icarimwe?
Woba vy’ukuri ushobora kwitunira ku bikorwa vyinshi icarimwe?
