“Uwutanga cane azodoheshwa”

VUZA

GUTANGA ibimazi vyamye ari umuce uhambaye w’ugusenga kw’ukuri. Abisirayeli baratanga ibimazi vy’ibitungwa, abakirisu na bo batanga “ikimazi c’ishemezo.” Yamara rero, hariho ibindi bimazi bihimbara Imana. (Heb. 13:15, 16) Abatanga ivyo bimazi barironkera umunezero n’imihezagiro, nk’uko uburorero bukurikira buvyerekana.

Umusavyi w’Imana wa kera w’umwizigirwa Hana, yaripfuza cane kuronka akana mugabo yari ingumba. Yarasenze Yehova, amusezeranira ko aramutse aronse umwana w’umuhungu, “[azomumuha] imisi yose y’ubuzima bwiwe.” (1 Sam. 1:10, 11) Mu nyuma, Hana yaribungenze avyara umwana w’umuhungu, amwita Samweli. Samweli amaze gucuka, Hana yaramujanye kw’itaberenakulo nk’uko yari yarabisezeranye. Yehova yarahezagiye Hana kubera ako gatima yagaragaje ko gutanga. Yahavuye aronka abandi bana batanu, Samweli na we aba umuhanuzi yongera aba umwe mu banditsi ba Bibiliya.—1 Sam. 2:21.

Nk’uko kwa Hana na Samweli, muri iki gihe abakirisu barafise agateka ko gukoresha ubuzima bwabo mu gikorwa c’Umuremyi wabo. Yezu yasezeranye ko Yehova azohezagira utwigoro twose tugira mu gikorwa ciwe.—Mrk. 10:28-30.

Mu kinjana ca mbere, hari umugore yitwa Doruka yari azwi ko yitangira abandi. Yarakora “ibikorwa vyiza, agafasha cane aboro.” Ariko rero ikibabaje, yahavuye “[arwara], hanyuma arapfa,” bituma ishengero rigira intuntu nyinshi. Igihe abigishwa bumva ko Petero yari muri iyo micungararo, baramwinginze ngo aceyo. Iyumvire ukuntu bahimbawe igihe Petero yaza maze akazura Doruka. Ryari ryo rya mbere intumwa izuye umuntu! (Ivyak. 9:36-41) Imana ntiyari yaribagiye ivyiza Doruka yakoze. (Heb. 6:10) Ivyerekeye umutima wiwe wo gutanga vyarazigamwe mw’Ijambo ry’Imana kugira bitubere akarorero.

Intumwa Paulo na we nyene yaradusigiye akarorero keza cane. Yaratanga umwanya wiwe kandi akitangira abandi. Yandikiye abakirisu bagenziwe b’i Korinto ati: “Nayo jewe nzotanga ivyo mfise vyose mpimbawe rwose nongere nitange wese ku bwanyu.” (2 Kor. 12:15) Paulo yariboneye ko kwitangira abandi bituma agira agahimbare. N’igihambaye kuruta, vyaratuma Yehova amushima kandi akamuhezagira.—Ivyak. 20:24, 35.

Biragaragara ko Yehova ahimbarwa igihe dukoresheje umwanya wacu n’inguvu zacu mu guteza imbere ivyungura Ubwami no mu gufasha abo dusangiye ukwemera. Ariko none, hoba hariho ubundi buryo dushobora gushigikira igikorwa co kwamamaza Ubwami? Cane nyene! Uretse gukoresha umwanya wacu n’inguvu zacu, turashobora gutera iteka Imana mu gutanga intererano. Izo ntererano zikoreshwa mu guteza imbere igikorwa co kwamamaza kirangurirwa kw’isi yose, aho hakaba harimwo gushigikira abamisiyonari n’abandi bari mu murimo udasanzwe w’igihe cose. Vyongeye, izo ntererano ziratuma dushobora gutegura no guhindura ibisohokayandikiro be n’amavidewo, gutabara abashikiwe n’ivyago be no kwubaka Ingoro z’Ubwami. Turashobora kwemera tudakeka ko “uwutanga cane azodoheshwa.” Vyongeye, iyo duhaye Yehova ibintu vy’agaciro, tuba tumuteye iteka.—Imig. 3:9; 11:25.

Ukuntu Bamwebamwe Batanga Intererano Ku Bw’igikorwa Kirangurirwa Kw’isi Yose

Cokimwe no mu gihe ca Paulo, benshi muri iki gihe ‘barashira ikintu ku ruhande,’ ni ukuvuga bakaziganya igitigiri kanaka c’amahera, maze bakayashira mu dusandugu tw’intererano twanditseko ngo “Igikorwa kirangurirwa kw’isi yose.” (1 Kor. 16:2) Buri kwezi, amashengero ararungika ayo mahera ku biro vy’Ivyabona vya Yehova bikorera mu gihugu akukira. Urashobora kandi kurungika intererano ku rwego rwemewe n’amategeko rukoreshwa n’Ivyabona vya Yehova mu gihugu ubamwo, ata handi ziriwe ziraca. Kugira ngo umenye izina ry’urwego nyamukuru rwemewe n’amategeko rukoreshwa n’Ivyabona vya Yehova mu gihugu ubamwo, turagusavye ubaze ibiro vy’ishami. Aderese y’ivyo biro vy’ishami woshobora kuyisanga kuri www.pr418.com. Bivanye n’uko bigenda ng’aho iwanyu, intererano ushobora kurungika ata handi ziriwe ziraca ni izi:

INTERERANO UMUNTU ATANGA BWEGU

Ni intererano zitangwa biciye ku buhinga bwa none, canke hakoreshejwe udukarata twa banki. Mu mashami amwamwe, birashoboka kandi ko ukoresha urubuga jw.org canke urundi rubuga rwabigenewe.
Zoshobora kandi kuba intererano z’amahera abona, ibintu vyo mu mabuye y’agaciro canke ikindi kintu c’agaciro umuntu atunze. Nuzirungikane ikete ryerekana ko ayo mahera canke ivyo bintu ari ivyo utanze.

INDINGANIZO Y’IVYO GUTANGA AMAHERA YOSHOBORA GUSUBIZWA

Ni indinganizo yo gutanga amahera yoshobora gusubizwa nyene kuyatanga mu gihe ayakeneye.
Nuyarungikane ikete ryerekana ko iyo ntererano ishobora gusubizwa.

GUTEGEKANYA IVYO GUTANGA

Uretse ingabire z’amahera be n’ibintu vy’agaciro umuntu atunze, hariho ubundi buryo bwo guteza imbere umurimo w’Ubwami urangurirwa kw’isi yose. Ubwo buryo burerekanwa aho hepfo. Uburyo wipfuza gukoresha bwaba ari ubuhe, turagusavye ubanze ubaze ibiro vy’ishami bihagarikiye igihugu ubamwo kugira umenye ubukoreshwa muri ico gihugu. Kubera ko ibisabwa n’amategeko hamwe n’amategeko agenga ivy’amatagisi usanga bitandukanye, birahambaye ko ubaza abatanga impanuro mu vy’amatagisi no mu vy’amategeko babishoboye, imbere y’uko uhitamwo uburyo bwiza kuruta bwo gutanga intererano.

Ivya asiransi be n’ugukukuruka: Ni intererano zitangwa mu kwerekana mu buryo butomoye ko urwego runaka rukoreshwa n’Ivyabona vya Yehova ari rwo rwakira amahera ya asiransi y’ubuzima bw’umuntu canke ayo yaziganirijwe kugira ngo azoyikoreko amaze gukukuruka.

Amakonte yo muri banki: Umuntu arashobora gushinga ko niyapfa, amakonte yiwe yo muri banki azohabwa urwego runaka rukoreshwa n’Ivyabona vya Yehova, hisunzwe ibisabwa n’amabanki y’aho aba.

Imitahe: Umuntu yoshobora kugabira urwego runaka rukoreshwa n’Ivyabona vya Yehova imitahe afise ahantu, canke akerekana mu rwandiko ko niyapfa iyo mitahe izohabwa urwo rwego.

Itongo canke inzu: Itongo canke inzu, birashobora kugabirwa urwego runaka rukoreshwa n’Ivyabona vya Yehova. Mu gihe ari aho umuntu aba na ho, nyene kubitanga arashobora gusigirwa aho aba arabaye, akabandanya kuhaba igihe cose asigaje kubaho.

Ibisigi be n’imbitso: Umuntu arashobora kwerekana mu rwandiko ko niyamara gupfa, itongo ryiwe canke amahera yiwe canke imbitso afise ahantu, bizohabwa urwego kanaka rukoreshwa n’Ivyabona vya Yehova. Mu bihugu bimwebimwe, ivyo birashobora gutuma umuntu akurwako amatagisi amwamwe.

Imvugo ngo “gutegekanya ivyo gutanga” yerekana ko nyene gutanga abiringaniza imbere y’igihe. Mu ntumbero yo gusahiriza abantu bipfuza guteza imbere igikorwa Ivyabona vya Yehova barangurira kw’isi yose biciye ku buryo bunaka bwo gutanga intererano, harateguwe agatabu mu congereza (Charitable Planning to Benefit Kingdom Service Worldwide) be no mu gisupanyoli. Ako gatabu kanditswe kugira ngo gatange amakuru ajanye n’uburyo butandukanye ingabire zishobora gutangwa ubu canke mu nyuma, mu kuziraga ishirahamwe. Amakuru ari muri ako gatabu yoshobora kuba adahuye neza n’ukuntu ivyawe vyifashe, bivanye n’amategeko agenga amatagisi canke ayandi mategeko yo mu gihugu ubamwo. Mu gukoresha ubwo buryo bwo gutanga intererano, benshi barashoboye gushigikira ibikorwa Ivyabona vya Yehova barangurira kw’isi yose bijanye n’ivy’idini be n’ivy’ugufasha abari mu ngorane. Muri ico gihe nyene bararushirije kugabanirizwa amatagisi bariha. Nimba ako gatabu kaboneka mu gihugu ubamwo, urashobora kugasaba umunyamabanga w’ishengero urimwo.

Wipfuza kumenya n’ibindi, ja ku rubuga jw.org, urabe amaja hepfo maze ufyonde ahavuga ngo “Gutanga intererano ku bw’igikorwa turangurira kw’isi yose,” canke witure ibiro vy’ishami.

Raba kandi

Gutanga intererano biciye ku buhinga bwa none

Raba uburyo butandukanye n’ibikoresho bitandukanye wokoresha mu gutanga intererano.

UMUNARA W’INDERETSI (INTEGURO Y'UKWIGA)