Ibibazo vy’abasomyi

Shetani yirukanywe mw’ijuru ryari?​—Ivyah. 12:1-9.

Naho igitabu ca Bibiliya c’Ivyahishuwe kitavuga igihe nyezina Shetani yirukaniweko mw’ijuru, kiratanga urukurikirane rw’ibintu vyabaye vyoshobora kudufasha kugereranya ico gihe. Ica mbere muri ivyo bintu vyabaye, ni ivuka ry’Ubwami burongowe na Mesiya. Inyuma y’ivyo, haca “haduka intambara mw’ijuru,” ino ikaba yashikanye ku kuneshwa no ku kwirukanwa kwa Shetani mw’ijuru.

Ivyanditswe biragaragaza neza ko mu 1914 ari wo mwaka “ibihe vyashinzwe vy’amahanga” vyarangiriyeko maze Ubwami buca burashingwa. * (Luka 21:24) Inyuma y’ivyo none, haciye umwanya ungana iki ngo ya ntambara yatumye Shetani yirukanwa mw’ijuru yaduke?

Mu Vyahishuwe 12:4 hagira hati: “Nya gisato [Shetani] caguma gihagaze imbere ya nya mugore yagira yibaruke, kugira ngo, yibarutse, gice kirotsa umwana wiwe.” Ivyo vyerekana yuko Shetani yashaka guca azimanganya buno nyene Ubwami bwari buherutse gushingwa, ivyo akabigira uko bishoboka kwose bukimara gushingwa. Naho Yehova yaciye ahaseruka ngo ahagarike umugambi w’ububisha wa Shetani, Shetani wewe yari yiyemeje gukora uko ashoboye kwose kandi adatezura ngo agirire nabi Ubwami bwari buherutse gushingwa. Ni co gituma rero, “Mikaheli n’abamarayika biwe” baciye ubwo nyene birukana ‘ca gisato n’abamarayika baco’ mw’ijuru kugira ngo ntihagire ikibi na kimwe gishikira ubwo Bwami. Ku bw’ivyo rero, duca dushika ku ciyumviro c’uko ukuneshwa kwa Shetani be n’ukwirukanwa kwiwe mw’ijuru vyabaye inyuma gatoya y’ivuka ry’Ubwami mu 1914.

Ikindi kintu tworimbura ni izuka ry’abakirisu barobanuwe, rino rikaba ryatanguye, nk’uko Ivyanditswe bivyerekana, inyuma gatoyi y’ishingwa ry’Ubwami. * (Ivyah. 20:6) Kubera yuko ata mwenewabo na Kristu n’umwe yarobanuwe avugwa ko yari kumwe na Yezu igihe yarwana na ca gisato be n’abamarayika baco, bishoboka ko intambara yo mw’ijuru be n’ukwirukanwa kwa Shetani n’amadayimoni yiwe vyarangiye igihe izuka ry’abo benewabo na Kristu ryatangura.

Ku bw’ivyo rero, Bibiliya ntihishura igihe nyezina Shetani n’amadayimoni yiwe birukaniweko mw’ijuru. Ariko rero, biragaragara yuko ico kintu caciye kiba Yezu Kristu akimara kwimikwa mw’ijuru mu 1914.

[Utujambo tw’epfo]