Iki kiganiro kirabaza ibibazo woba umaze kwibaza, kikerekana aho ushobora kwisomera inyishu zavyo muri Bibiliya. Ivyabona vya Yehova bohimbarwa no kuyaga nawe kuri izo nyishu.

1. Urupfu rwa Yezu rukwiye kwibukwa gute?

Yezu yabwiye abayoboke biwe kwibuka urupfu rwiwe mu gukoresha umukate n’umuvinyu bifise insobanuro y’ikigereranyo. Uwo mukate ugereranya umubiri wa Yezu, umuvinyu na wo ukagereranya amaraso yiwe.​—Soma Luka 22:19, 20.

Umukate Yezu yakoresheje ntiwarimwo umwambiro. Muri Bibiliya, umwambiro ukunze kugereranya igicumuro. Uwo mukate rero cari ikigereranyo kibereye c’umubiri utagira akanenge wa Yezu. Umubiri wiwe yawutanzeko ikimazi, uba ukuyeho vya bimazi vy’ibitungwa vyatangwa mu gihe c’Itegeko rya Musa. (Abaheburayo 10:5, 9, 10) Umuvinyu wagereranya amaraso y’agaciro ya Yezu yasheshwe ngo abe ikimazi c’ibicumuro vyacu.​—Soma 1 Petero 1:19; 2:24; 3:18.

2. Ni ryari dukwiye guhimbaza urupfu rwa Yezu?

Yezu yapfuye kuri Pasika, ku wa 14 Nisani. Ku Bayahudi umusi utangura igihe izuba rirenze. Ku mugoroba buca apfa, Yezu yarasangiye imfungurwa za Pasika n’intumwa ziwe, aca atanguza imfungurwa z’icibutso nshasha zo kwibuka urupfu rwiwe.​—Soma Luka 22:14, 15.

Muri iki gihe, abasavyi b’Imana bahimbaza ico Imana yatanze biciye kuri Yezu kugira ikure isi yose mu caha n’urupfu. (Kuvayo 12:5-7, 13, 17) Nk’uko nyene Pasika yahimbazwa rimwe mu mwaka, ni ko n’Icibutso c’urupfu rwa Yezu kigirwa rimwe mu mwaka izuba rirenze, ku wa 14 Nisani dufatiye ku kirangamisi co muri Bibiliya aho baharura amezi bafatiye ku mboneko z’ukwezi.​—Soma Yohani 1:29.

  3. Ni nde akwiye kurya ku mukate no kunywa ku muvinyu?

Igihe Yezu yaha umuvinyu abayoboke biwe, yavuze ati: “Iki gikombe gisobanura isezerano rishasha.” (1 Abakorinto 11:25) Isezerano rishasha ryasubiriye isezerano rishingiye kuri rya Tegeko rya Musa, aho Imana yari yarasezeraniye Abisirayeli yuko baramutse bayumviye ata guca ku ruhande bobaye abantu bayo. (Kuvayo 19:5, 6) Ariko Isirayeli ntiyumviye ijwi ry’Imana. Ni co gituma Yehova yatanze isezerano rishasha.​—Soma Yeremiya 31:31.

Biciye kuri iryo sezerano rishasha, Yehova araronsa imihezagiro abantu benshi abicishije ku bantu bake. Abari muri iryo sezerano ni bake: ni 144.000 gusa. Biciye kuri bo, abantu amamiliyoni bo mu mahanga yose bazokwironkera ubuzima budahera kw’isi y’iparadizo. Bamwebamwe mu bari muri iryo sezerano rishasha baracakorera Yehova ng’aha kw’isi. Ni bo bonyene bibereye ko barya ku mukate bakanywa no ku muvinyu kubera ko Yehova yagiraniye na bo “isezerano rishasha,” rino rikaba ryemejwe n’amaraso ya Yezu.​—Soma Luka 12:32; Ivyahishuwe 14:1, 3.

4. Icibutso kitugirira akamaro akahe?

Icibutso c’urupfu rwa Yezu kiba uko umwaka utashe kiratuma turushiriza gukenguruka urukundo rudasanzwe rwa Yehova. Yarungitse Umwana wiwe ngo apfire ibicumuro vyacu. Igihe rero twitavye Icibutso, dukwiye kuzirikana ico urupfu rwa Yezu rusobanura kuri twebwe. Dukwiye kwiyumvira ukuntu twokwerekana ko dukenguruka ico Yehova na Yezu badukoreye.​—Soma Yohani 3:16; 2 Abakorinto 5:14, 15.

Ushaka kumenya n’ibindi, raba urupapuro rwa 206-208 rw’iki gitabu Mu vy’ukuri Bibiliya yigisha iki? casohowe n’Ivyabona vya Yehova.