Inyuma y’aho abantu b’i Nazareti bageragereje kumwica, Yezu aca yimukira mu gisagara ca Kaperinawumu, hafi y’Ikiyaga c’i Galilaya, kikaba citwa kandi “ikiyaga ca Genesareti.” (Luka 5:1) Ivyo birashitsa ubuhanuzi bwo mu gitabu ca Yesaya buvuga yuko abantu b’i Galilaya baba hafi y’ikiyaga bobonye umuco mwinshi.​—Yesaya 9:1, 2.

Ego cane, aho i Galilaya Yezu abandanya kumenyesha ko “ubwami bwo mw’ijuru bwegereje.” (Matayo 4:17) Yezu arabona bane mu bigishwa biwe. Bari bahoze bagendana na we, ariko igihe bagaruka bavuye i Yudaya, baciye basubira ku gikorwa cabo co kuroba. (Yohani 1:35-42) Ubu rero harageze ko bagumana na Yezu kugira abigishe ingene bazosigara barakora igikorwa co kwamamaza atakihari.

Igihe Yezu ariko aragendagenda ku nkengera y’ikiyaga, abona Simoni Petero na mwene wabo Andereya hamwe n’abandi bariko baroza insenga zabo. Yezu aregera akurira mu bwato bwa Petero, maze akamusaba kubusoza agana mu kiyaga. Bigiye imbere gato, Yezu aricara maze agatangura kwigisha ukuri kwerekeye Ubwami amasinzi y’abantu akoraniye ku nkengera y’ikiyaga.

Inyuma y’ivyo, Yezu abwira Petero ati: “Igira aho amazi agera kure, hanyuma muterere insenga zanyu murobe.” Petero yishura ati: “Mwigisha, twacumukuye ijoro ryose ntitwafata namba, mugabo ko ubitegetse ndamanura insenga.”​—Luka 5:4, 5.

Baramanura insenga maze bagafata ifi nyinshi cane ku buryo insenga zitangura gutabuka! Ubwo nyene baca bahamagara bagenzi babo bari mu bwato buri hafi yabo ngo baze kubafasha. Mu kanya ubwo bwato bwose buruzura ifi ku buryo butangura kuzama. Petero ngo abibone, yikubita imbere ya Yezu avuga ati: “Va aho ndi, Mukama, kuko ndi umunyabicumuro.” Yezu amwishura ati: “Yaco utinya. Guhera ubu uzohora uroba abantu ari bazima.”​—Luka 5:8, 10.

Yezu abwira Petero na Andereya ati: “Nimunkurikire, nanje nzobagira abarovyi b’abantu.” (Matayo 4:19) Aratumira n’abandi barovyi babiri, ari bo Yakobo na Yohani, abahungu ba Zebedayo. Na bo nyene baca bamukurikira badatebaganye. Uko ari bane baraheba igikorwa cabo co kuroba, bakaba abigishwa ba mbere ba Yezu bagendana na we badahengeshanya.