Pasika ya nyuma Yezu yagira ahimbaze yari iyidasanzwe. Kubera urupfu rwiwe rwari rwegereje, yarategekanije gusangira n’intumwa ziwe imfungurwa za Pasika kugira atanguze umusi mukuru mushasha bokwamye bahimbaza buri mwaka, ni ukuvuga Imfungurwa z’Umukama zo ku mugoroba. Yaciye arungika Petero na Yohani gutegura icumba baziriramwo. (Lk 22:7-13; raba ishusho iri ku gipfukisho.) Ivyo biratwibutsa ko dukwiye kwitegurira Icibutso kizoba ku wa 27 Ntwarante. Amashengero ashobora kuba amaze gutunganya ibijanye n’uwuzoshikiriza insiguro, ibimenyetso be n’ibindi. Ariko none, umuntu ku giti ciwe yokwitegurira gute Icibutso?

Nutegure umutima wawe. Nusome wongere uzirikane ku gisomwa ca Bibiliya c’Icibutso. Urutonde ushobora kurusanga mu gatabu Twihweze Ivyanditswe ku musi ku musi. Mu Gatabu gafasha kwiga Ijambo ry’Imana harimwo amakuru yiyongereye ajanye n’urwo rutonde. (Raba kandi Agatabu k’ikoraniro ry’Ubuzima bwacu n’igikorwa cacu ko muri Ndamukiza 2020.) Abagize imiryango barashobora kuronka ivyiyumviro vyo kuganirako mu gusenga kwo mu muryango bijanye n’akamaro k’incungu muri rya ronderero ry’ibitabu vyacu Index des publications des Témoins de Jéhovah canke muri ca Gitabu c’ubushakashatsi c’Ivyabona vya Yehova.

Nutumire abandi. Nugire uruhara bimwe bishitse mw’isekeza ryo gutanga ubutumire. Niwiyumvire abo woshobora gutumira, nk’akarorero abo wama usubira kugendera, abo wahoze wigisha Bibiliya, incuti be n’abagenzi. Abakurambere barakwiye kwitwararika gutumira abahororokewe. Nimba hari umuntu ataba mu karere ubamwo, niwibuke ko ushobora kumenya isaha n’ikibanza Icibutso kizoberako mu karere iwabo ugiye kuri jw.org, ugafyonda ahavuga ngo IBITWEREKEYE ugaca uhitamwo ahanditse ngo “Icibutso.”

Ni ibiki kandi twokora mu kwitegura?