9 MUTARAMA 2024| YAHUJWE N’IGIHE KU ITARIKI YA 3 NYAKANGA 2024
AMAKURU YO KU ISI HOSE

AMAKURU MASHYA—ABAVANDIMWE BAHAMIJWE ICYAHA | Biyemeje kwiringira Yehova

FUNGURA

Ku itariki ya 1 Nyakanga 2024, urukiko rw’akarere ka Krasnogvardeyskiy rwo muri Crimea rwahamije icyaha umuvandimwe Yuriy Gerashchenko na Sergey Parfenovich. Buri umwe yakatiwe imyaka itandatu y’igifungo gisubitse kandi ntibizaba ngombwa ko bajyanwa muri gereza.

Icyo twamuvugaho

Yuriy Gerashchenko

Igihe yavukiye: 1979 (muri Ukraine)

Ibimuranga: Akora ibijyanye n’amashanyarazi

Yatangajwe n’ukuntu Bibiliya ivuga ukuri, n’ukuntu inyigisho zo muri Bibiliya zigaragaza ko Imana idukunda cyane. Yabatijwe mu mwaka wa 2000, aba Umuhamya wa Yehova

Yashakanye na Irina mu mwaka wa 2002

Ibyo yavuze

Ni iki wamenye kuri Yehova bitewe n’ibyo wahuye na byo?

Nakunze cyane umuco wa Yehova wo gushyira mu gaciro. Azi neza ibyo nkeneye kandi aba yiteguye kumfasha. Iyo nshubije amaso inyuma nkibuka ibintu byambayeho, mbona ko Yehova yari yaranteguye mbere y’igihe. Numva meze nk’igikoresho kiri mu ntoki ze. Umunyabugeni w’umuhanga afata neza igihangano cye, akagitunganya kugira ngo igihe nikigera azagikoreshe. Nishimira ukuntu Yehova yankoreye ibintu byinshi. Ibyo byatumye mukunda kandi niyemeza kutazamuhemukira.

Sergey Parfenovich

Igihe yavukiye: 1972 (Mirnoye, muri Crimea)

Ibimuranga: Yakoze akazi ko kwita ku bantu aho bakorera siporo

Yishimiye kumenya ibyo Ubwami bw’Imana buzakora mu gihe kizaza. Yabatijwe mu mwaka wa 1993, mu ikoraniro mpuzamahanga ryabereye mu mujyi wa Kyiv muri Ukraine

Yashakanye na Marina mu mwaka wa 1997. Bafite abahungu bane n’abakobwa babiri

Ibyo yavuze

Ni uruhe rugero rwo muri Bibiliya rwaguteye inkunga?

Mu Bafilipi 3:10, Pawulo yaravuze ati: “Icyifuzo cyanjye ni uko namenya Kristo, nkamenya imbaraga z’uwamuzuye, kandi nkemera kubabazwa nk’uko na we yababajwe.” Natangajwe n’ukuntu Pawulo yakundaga Yesu. Yaramukundaga cyane ku buryo yumvaga yiteguye no kubabazwa nk’uko Yesu yababajwe. Nasenze Yehova musaba ko yamfasha nkamera nka Pawulo kandi nkagira umuco wo kwiyemeza nk’uwo yari afite. Ibyo byatumye mpindura uko nabonaga ibintu. Aho kumva ko narenganye kandi ko nkwiriye kugirirwa impuhwe, nsigaye numva ko ndi umuntu ufite ukwizera, wiyemeje gukorera Yehova uko byagenda kose.

Tuzi neza ko Yehova azakomeza gufasha Yuriy na Sergey, ndetse n’abandi bose babaye indahemuka, ‘akabahisha mu mababa ye.’—Zaburi 17:7, 8.

Uko ibintu byakurikiranye

Ku itariki ya 19 Nzeri 2022

Urubanza rwa Sergey rwaratangiye
Ku itariki ya 28 Nzeri 2022

Abapolisi basatse inzu ya Sergey n’andi mazu y’abavandimwe, kandi yajyanywe gufungwa by’agateganyo
Ku itariki ya 30 Nzeri 2022

Sergey yajyanywe muri gereza
Ku itariki ya 15 Ugushyingo 2022

Sergey yavanywe muri gereza afungirwa mu rugo
Ku itariki ya 22 Werurwe 2023

Urubanza rwa Yuriy rwaratangiye. Yarafashwe, bamuhata ibibazo kandi arafungwa
Ku itariki ya 24 Werurwe 2023

Yuriy yavanywe muri gereza afungirwa mu rugo
Ku itariki ya 12 Nyakanga 2023

Sergey na Yuriy ntiyari agifunze ariko ntiyari yemerewe gukora ingendo
Ku itariki ya 28 Nyakanga 2023

Ni bwo urubanza rwatangiye. Umushinjacyaha yavuze ko Sergey na Yuriy bashinjwa ibyaha kubera ko “bifatanyije mu bikorwa by’Abahamya by’urugomo n’iterabwoba.” Kubera ko nta bimenyetso bibahamya icyaha, yongeye gusaba ko bafungirwa mu rugo ku nshuro ya kabiri

Reba nanone

AMAKURU

Bafunzwe bazira ukwizera kwabo—Crimée

Abahamya ba Yehova bo muri Crimée bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU