27 NZERI 2022 | YAHUJWE N’IGIHE KU ITARIKI YA 22 WERURWE 2024
AMAKURU YO KU ISI HOSE

AMAKURU MASHYA—UMWANZURO W’URUBANZA UZASUBIRWAMO | Yehova yafashije abavandimwe ntibacika intege

FUNGURA

Ku itariki ya 21 WERURWE 2024, urukiko rw’ikirenga rwo muri Crimea rwasheshe icyemezo cyari cyarafatiwe umuvandimwe Taras Kuzo n’umugore we, mushiki wacu Darya Kuzo, umuvandimwe Sergey Lyulin n’umuvandimwe Petr Zhiltsov. Abo bavandimwe bahise barekurwa. Urubanza rwabo ruzasubizwa mu rukiko rw’umujyi wa Yalta ruherereye muri Crimea kugira ngo bongere kuburanishwa.

Ku itariki ya 27 Gashyantare 2023, urukiko rwo mu mujyi wa Yalta muri Crimea rwahamije icyaha umuvandimwe Taras Kuzo n’umugore we Darya Kuzo, Sergey Lyulin na Petr Zhiltsov. Darya yakatiwe imyaka itatu isubitse. Ntibizaba ngombwa ko ajyanwa muri gereza. Taras yakatiwe igifungo cy’imyaka itandatu n’igice. Sergey na Petr buri wese yakatiwe igifungo cy’imyaka itandatu n’ukwezi kumwe. Abavandimwe batatu bahise bajyanwa muri gereza bakiva mu rukiko.

Uko ibintu byagiye bikurikirana

Ku itariki ya 4 Werurwe 2021

Ni bwo batangiye gukurikirana Taras, yashinjwaga ko yashinze umuryango ushyigikiye ubutagondwa
Ku itariki ya 11 Werurwe 2021

Abantu bateye amazu ane y’Abahamya ba Yehova harimo n’inzu ya Kuzo n’iya Sergey. Taras yafunzwe by’agateganyo
Ku itariki ya 12 Werurwe 2021

Taras yararekuwe ariko afungishwa ijisho. Ntiyari yemerewe kubana n’abagize umuryango we
Ku itariki ya 29 Nyakanga 2021

Ni bwo Darya, Petr na Sergey batangiye gukurikiranwa mu rukiko. Petr bamujyanye kumufunga by’agateganyo
Ku itariki ya 30 Nyakanga 2021

Ibirego byombi byahurijwe hamwe. Petr yavuye muri gereza ajya gufungishwa ijisho
Ku itariki 10 Kanama 2021

Sergey yarafashwe bamujyana kumufunga by’agateganyo ku birometero bigera kuri 800. Muri urwo rugendo rw’amasaha 16, amaboko ye yari aziritse ku munyururu wari hejuru y’umutwe na ho amaguru aziritse ku ntebe
Ku itariki ya 1 Werurwe 2022

Sergey yarafunguwe avanwa muri gereza, afungishwa ijisho
Ku itariki 4 ya Mata 2022

Ni bwo urubanza rwatangiye
Ku itariki ya 11 Nyakanga 2022

Bategetse ko Petr, Sergey na Taras batakomeza gufungishwa ijisho ahubwo babuzwa kuva mu gace batuyemo

Icyo twabavugaho

Darya Kuzo

Igihe yavukiye: 1982 (Voronezh, mu gace ka Voronezh)

Ibimuranga: Yabaye umwarimu, umuyobozi muri hoteli, kandi yakoze akazi ko kwita ku misatsi. Muri iki gihe acuruza ibikoresho by’ubwiza

Yize ukuri ko muri Bibiliya akiri umwana. Yabatijwe mu mwaka wa 2000, aba Umuhamya wa Yehova. Yashakanye na Taras mu mwaka wa 2008. Bafite abana babiri, umuhungu n’umukobwa

Ibyo yavuze

Abana bawe bagufashije bate muri ibi bihe bigoye?

Ndibuka ko hari igihe nihishe aho twogera maze ngasenga ndira nsaba Yehova ko yamfasha kwihangana. Hashize igihe gito umuhungu wanjye w’imyaka icyenda yaraje arambwira ati: “Wirira.” Hanyuma yanyeretse amagambo y’igitero n’ay’inyikirizo y’indirimbo ya 61, igira iti: “Mwebwe Bahamya nimujye mbere!” Ayo magambo yo muri iyo ndirimbo yankoze ku mutima cyane. Nshimira Yehova cyane kuba yarakoresheje umuhungu wanjye akanyibutsa ko turi mu bihe bigoye bisaba kugira ubutwari.

Taras Kuzo

Igihe yavukiye: 1978 (Yalta)

Ibimuranga: Yize ibijyanye n’ubukungu

Yakundaga Bibiliya kuva akiri muto. Yahuye n’Abahamya ba Yehova mu mwaka wa 1999. Yatangajwe n’uko ibintu bamwigishaga byari bishingiye kuri Bibiliya. Yabatijwe mu mwaka wa 2001

Yashakanye na Darya mu mwaka wa 2008

Ibyo yavuze

Ni iki cyagufashije kigatuma udacika intege?

Hari ibintu bambujije byatumaga ntemererwa kubana n’abagize umuryango wanjye. Nanone sinari nemerewe gukoresha telefone na interinete kandi ibyo byatumaga kuganira na bo bigorana. Ubwo rero nagiraga irungu. Icyakora iyo nabaga mfite irungu abavandimwe bazaga kunsura. Iyo namaraga akanya ndimo kuvugana na bo numvaga nishimye. Nanone nagerageje gufata mu mutwe indirimbo z’Ubwami bituma nkoresha igihe neza. Nabonye bitworohera kwihanganira ibigeragezo iyo dutekereje ku bintu by’umwuka.

Abagaragu ba Yehova b’indahemuka, baba bafunzwe by’agateganyo cyangwa barakatiwe igifungo cyangwa se bafungishijwe ijisho, bashobora kumva ‘batsikamiwe ku buryo badashobora kwinyagambura.’ Ariko Yehova ntazigera atererana abatotezwa bazira izina rye.—2 Abakorinto 4:8, 9.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU