8 UKUBOZA 2022
AMAKURU YO KU ISI HOSE

Abavandimwe Dubovenko na Litvinyuk bakatiwe igifungo cy’imyaka itandatu

FUNGURA

Ku itariki ya 30 Ugushyingo 2022, Urukiko rw’akarere ka Armyanskiy muri Repubulika ya Crimée, rwahamije ibyaha Abahamya babiri ari bo Aleksandr Dubovenko na Aleksandr Litvinyuk. Abo bavandimwe bombi bakatiwe igifungo cy’imyaka itandatu kandi bahise bajyanwa muri gereza.

Icyo twabavugaho

Aleksandr Dubovenko

Igihe yavukiye: 1973 (Ochakiv muri Ukraine)

Ibimuranga: Akora ibijyanye no gusudira, amashanyarazi n’ububaji. Yashakanye na Irina mu mwaka wa 1999

Mama we ni we wabanje kuba Umuhamya wa Yehova maze amufasha kumenya ukuri. Yashimishijwe no kumenya isezerano ryo muri Bibiliya rivuga ko isi izahinduka paradizo. Yabatijwe mu mwaka wa 1999

Ibyo yavuze a

Ni iki cyagufashije kwihangana igihe wari ufungishijwe ijisho?

Namaze umwaka urenga nta wundi muntu nemerewe kuvugisha uretse abo twabanaga mu nzu, abagenzacyaha n’abavoka. Nta n’ubwo nemerewe kuvugisha umuntu wese tuvukana witwa ko ari Umuhamya wa Yehova. Icyakora natekereje ku rugero rwa Eliya. Hari igihe na we yari mu butayu kandi ahangayitse. Yehova yateye inkunga Eliya kandi amwizeza ko atari wenyine. Kuba Yehova atarigeze atererana Eliya byatumye nizera ko nanjye atazigera antererana.

Aleksandr Litvinyuk

Igihe yavukiye: 1960 (Amangeldi muri Kazakisitani)

Ibimuranga: Yakoraga ibyo gusudira mu ruganda. Yashakanye na Nadezhda mu mwaka wa 1979. Bafite umwana umwe w’umuhungu

Yajyaga yibaza impamvu Imana ireka ibibi n’imibabaro bikabaho. Yabonye igisubizo cy’icyo kibazo igihe we n’umugore we Nadezhda, batangiraga kwigana Bibiliya n’Abahamya ba Yehova. Yabatijwe mu mwaka wa 1993

Ibyo yavuze b

Ni iki wakoze ngo witegure guhangana n’ibitotezo?

Igihe natangiraga kumva ibyabaga ku bavandimwe na bashiki bacu, nibajije niba koko nanjye nari niteguye guhangana n’ibitotezo. Nabonye ko ntari niteguye. Ubwo rero natangiye gusoma no gutekereza ku nkuru zo muri Bibiliya z’abantu bihanganiye ibigeragezo bikomeye. Nibandaga ku cyabafashije kwihangana no kwiringira Yehova. Nakoze ubushakashatsi kuri izo nkuru mfite intego yo kugerageza kwishyira mu mwanya w’abavugwamo. Nanone jye n’umugore wanjye twasomye inkuru nyinshi, z’abavandimwe na bashiki bacu bagaragaje ubudahemuka muri iki gihe. Ibyo byatumye ukwizera kwacu kurushaho gukomera kandi bituma twumva twiteguye guhangana n’ibyari kutugeraho.

None se kuba abandi barasengaga bagusabira, byagufashije bite?

Iyo numvise ukuntu abavandimwe na bashiki bacu basenga cyane bansabira, amarira anzenga mu maso. Basenga Yehova bamusaba ko yamfasha gutuza, nkagira ubutwari n’imbaraga. Buri gihe mbere y’uko nitaba urukiko, hari umuvandimwe umbaza ibiba bimpangayikishije bifitanye isano n’ikirego ndegwa, mba ngiye kubwira Yehova mu isengesho. Na we ahita abibwira Yehova mu isengesho mu gihe aba antegerereje hanze. Binkora ku mutima cyane.

Duhumurizwa no kumenya ko buri gihe Yehova aba adushyigikiye, uko ibigeragezo twahura na byo byaba biri kose.—Zaburi 139:7-12.

Uko ibintu byagiye bikurikirana

Ku itariki ya 2 Kanama 2021

Ikirego cyagejejwe mu rukiko. Abo bavandimwe bombi baregwaga gukoresha ikoranabuhanga rya videwo mu gushyigikira umuryango ushinjwa ibikorwa by’ubutagondwa
Ku itariki ya 5 Kanama 2021

Basatse amazu umunani y’Abahamya ba Yehova harimo iya Dubovenko n’iya Litvinyuk. Bafashe umuvandimwe Litvinyuk bajya kumufunga by’agateganyo
Ku itariki ya 6 Kanama 2021

Umuvandimwe Litvinyuk yararekuwe avanwa aho yari afungiwe by’agateganyo afungishwa ijisho
Ku itariki ya 9 Kanama 2021

Abayobozi basatse urugo rwa Dubovenko ku nshuro ya kabiri. Bamuhase ibibazo nyuma yaho afungishwa ijisho
Ku itariki ya 11 Kanama 2021

Umuvandimwe Litvinyuk bamushinje ku mugaragaro gutegura ibikorwa by’umuryango ushinjwa ubutagondwa
Ku itariki ya 8 Gashyantare 2022

Umuvandimwe Dubovenko bamushinje ku mugaragaro gutegura ibikorwa by’umuryango ushinjwa ubutagondwa
Ku itariki ya 29 Mata 2022

Urubanza rwaratangiye. Umucamanza yanze icyifuzo cy’umuvandimwe Litvinyuk cyo kujya kwa muganga no kuvurwa igihe yari afungishijwe ijisho
Ku itariki ya 8 Nzeri 2022

Abo bavandimwe bombi bemerewe kujya bava mu rugo hagati ya saa moya za mu gitondo na saa moya za nimugoroba.
Ku itariki ya 30 Ugushyingo 2022

Abo bavandimwe bombi bakatiwe igifungo cy’imyaka itandatu

a b Ibyo batangaje babivuze mbere y’uko bafungwa.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU