1 MATA 2024| YAHUJWE N’IGIHE KU ITARIKI YA 30 NYAKANGA 2024
U BURUSIYA

AMAKURU MASHYA—ABAHAMYA BATATU BAHAMIJWE ICYAHA | “Gucika intege byo ntibirimo”

FUNGURA

Ku itariki ya 30 Nyakanga 2024, urukiko rw’umujyi wa Nikolaevsk-on-Amur ruherereye mu gace ka Khabarovsk rwahamije icyaha umuvandimwe Igor Kletkin, Nikolay Kononenko na mushiki wacu Nadezhda Korobochko. Muri urwo rubanza rwa Igor na Nikolay, buri wese yakatiwe igifungo gisubitse cy’imyaka itandatu. Naho Nadezhda we yakatiwe igifungo gisubitse cy’imyaka itanu. Ariko ntibizaba ngombwa ko bajyanwa muri gereza.

Icyo twabavugaho

Igor Kletkin

Igihe yavukiye: 1961 (Nikolaevsk-on-Amur)

Ibimuranga: Yari umushoferi

Igihe mama we yakoraga impanuka maze bigatuma agagara, Igor yatangiye kwibaza impamvu ibintu nk’ibyo bibaho. Yishimiye kubona ibisubizo byumvikana neza Bibiliya itanga kuri icyo kibazo. Yabatijwe mu mwaka wa 1999

Ibyo yavuze

Ni iki kigufasha gukomeza kubona ibintu mu buryo bukwiriye muri iki gihe cy’ibitotezo?

Nubwo ibigeragezo mpanganye na byo bitoroshye, ntibyigeze bituma ukwizera kwanjye kugabanuka. Ahubwo nkomeza kubona ko ari bimwe mu bigize umurimo nkorera Yehova. Mpora nzirikana amagambo yo muri Yohana 15:20, agira ati: “Niba barantoteje namwe bazabatoteza.” Kuri njye gucika intege byo ntibirimo. Ibyo byaba ari uguhemukira Yehova, Yesu ndetse n’abavandimwe na bashiki bacu. Niyemeje gukomeza kubera abandi urugero rwiza.

Nadezhda Korobochko

Igihe yavukiye: 1943 (Shakhty, mu gace ka Rostov)

Ibimuranga: Yakoraga mu bijyanye n’icungamari. Arera abana bane

Yasomaga Bibiliya, kuyisobanukirwa bikamugora. Ariko igihe yatangiraga kwigana Bibiliya n’Abahamya ba Yehova, yishimiye kumenya Imana ndetse n’imico yayo. Yabatijwe mu mwaka wa 1996

Ibyo yavuze

Ibihe bitoroshye wanyuzemo byakwigishije iki kuri Yehova?

Ibi bihe bitoroshye byanyigishije ko Yehova atareba gusa ibingeraho ahubwo ko aniyumvisha neza uko niyumva, kandi ibyo bituma ampa ibyo nari nkeneye. Iyo mpangayitse kandi gutekereza neza bikangora, Yehova aramfasha akampa amahoro. Nanone amfasha kwibuka imirongo yo muri Bibiliya, mba nkeneye muri ibyo bihe. Uko ibigeragezo mpanganye na byo birushaho gukomera, ni ko Yehova arushaho kumpa umwuka wera kandi nkarushaho kumwiringira.

Dushimira Yehova cyane kuba akomeje kwita no gushyigikira abantu bose bamwiringira kandi bavuga bati: “Uri Imana yanjye.”—Zaburi 31:14.

Uko ibintu byagiye bikurikirana

Ku itariki ya 11 Ukwakira 2021

Urugo rwa Igor na Nadezhda rwarasatswe. Igor yafunzwe by’agateganyo
Ku itariki ya 12 Ukwakira 2021

Nadezhda yajyanywe guhatwa ibibazo
Ku itariki ya 13 Ukwakira 2021

Igor wari ufunzwe by’agateganyo yararekuwe
Ku itariki ya 14 Ukwakira 2021

Igor na Nadezhda bamenyeshejwe ko batemerewe kurenga mu gace batuyemo
Ku itariki ya 27 Nzeri 2022

Nikolay yamenyeshejwe ko atemerewe kurenga mu gace atuyemo
Ku itariki ya 16 Mutarama 2023

Ni bwo urubanza rwatangiye

Reba nanone

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU