1 UKWAKIRA 2021 | YAHUJWE N’IGIHE KU ITARIKI YA 29 KANAMA 2023
U BURUSIYA

AMAKURU MASHYA—ABAVANDIMWE BAHAMIJWE IBYAHA | Abavandimwe batanu biyemeje kwihangana nubwo batotezwa

FUNGURA

Ku itariki ya 28 Kanama 2023, urukiko rw’akarere ka Orenburg rwahamije icyaha umuvandimwe Vladimir Kochnev, Vladislav Kolbanov, Pavel Lekontsev, Sergey Logunov na Nikolay Zhugin. Abo bavandimwe bakatiwe igifungo gisubitse kiri hagati y’imyaka ibiri n’igice n’itatu n’igice. Ntibizaba ngombwa ko bajyanwa muri gereza.

Uko ibintu byagiye bikurikirana

Ku itariki ya 1 Werurwe 2021

Hari hashize umwaka urenga ikirego gisubijwe mu biro by’umushinjacyaha, ni na bwo batangiye kuburanira mu rukiko rw’akarere ka Promyshlenniy mu mujyi wa Orenburg
Ku itariki ya 14 Mutarama 2020

Ikirego cyashubijwe mu biro by’ubushinjacyaha kubera ko ibirego baregaga abavandimwe bacu bitari bisobanutse neza
Ku itariki ya 3 Kanama 2018

Nyuma y’uko Vladimir yamaze amezi abiri n’igice afunzwe yararekuwe, maze afungishwa ijisho
Ku itariki ya 16 Gicurasi 2018

Abayobozi basatse ingo 19 zo mu gace ka Orenburg. Vladimir na Vladislav boherejwe aho bari gufungirwa by’agateganyo. Nyuma y’iminsi itatu, Vladislav yararekuwe afungishwa ijisho
Ku itariki ya 14 Gicurasi 2018

Umugenzacyaha wo mu kigo gishinzwe iperereza mu gace ka Orenburg yatanze ikirego cye, ashinja ibyaha abo Bahamya batanu

Icyo twabavugaho

Vladimir Kochnev

Igihe yavukiye: Mu mwaka wa 1979 (Orenburg)

Ibimuranga: Akiri umwana yakundaga kuroba no gukina umupira. Yakoze mu bijyanye no gucura ibyuma, gukora tereviziyo na radiyo. Yabatijwe mu mwaka wa 1993. Yashakanye na Galina mu mwaka wa 2003

Ibyo yavuze

Ni gute ibitotezo wahuye na byo byatumye urushaho kuba incuti ya Yehova?

Nshobora kwemeza ko igihe namaze muri gereza ari cyo gihe numvaga ndi incuti y’Imana kurusha ikindi gihe cyose. Kuba nari ndi jyenyine kandi n’ibyambagaho nkaba nta cyo nabikoraho, byatumye niga kwiringira Yehova cyane.

Ni iyi he nama wagira abandi mu birebana no gukoresha neza igihe cyabo bitegura ibitotezo?

Mu by’ukuri ibitotezo si byo bituma umuntu aba mwiza cyangwa mubi. Ahubwo bigaragaza uwo umuntu ari we imbere mu mutima. Nidukomeza gahunda yacu ihoraho yo gukorera Imana, kandi tugakomeza gusenga, kwiga Ijambo ryayo no kujya mu materaniro, ukwizera kwacu kuzarushaho gukomera. Ntitugomba gutegereza ko habaho ikintu kihariye ngo abe ari bwo dutangira gukomeza ubucuti dufitanye na Yehova. Urugero, si ngombwa ko duhura n’ibitotezo kugira ngo dutangire gusenga buri gihe cyangwa gusoma Bibiliya.

Pavel Lekontsev

Igihe yavukiye: Mu mwaka wa1981 (Kytat, mu gace ka Krasnoyarsk)

Ibimuranga: Kuva akiri umwana yashimishwaga n’ibyaremwe. Akunda kuzamuka imisozi, kuroba no gushakisha ibihumyo. Yakoze mu bijyanye no kugurisha inyubako. Yatangiye kwigana Bibiliya n’Abahamya ba Yehova ahagana mu mwaka wa 1998. Yasobanukiwe ko kugira ngo umuntu agire ibyishimo, agomba kubaho akurikiza amahame yo muri Bibiliya. Yabatijwe mu mwaka wa 1999. Yashakanye na Oksana, mu mwaka wa 2017

Ibyo yavuze

Witwaye ute igihe bagusakaga, igihe baguhataga ibibazo no mu gihe cy’urubanza?

Igihe abapolisi binjiraga iwanjye, natangajwe n’ukuntu Yehova yashubije isengesho rigufi nasenze. Namusenze musaba gutuza. Ntiyatinze kunsubiza. Yahise amfasha gutuza.

Wiyemeje gukora iki uko umwanzuro w’urubanza uzaba umeze kose?

Biragoye kumenya umwanzuro w’urukiko. Icyakora nizeye ko Yehova azakomeza kumpa imbaraga. Nanone umwanzuro uwo ari wo wose urukiko ruzafata tuzakomeza gutsinda, kubera ko dukomeza kubera Yehova indahemuka. Yehova aduha umwuka we wera kugira ngo dukomeze guhangana n’ibigeragezo uko byaba bimeze kose. Ibyo rwose narabyiboneye mu gihe cyose maze nkorera Yehova. Ubwo rero niyemeje gukomeza isiganwa kugeza rirangiye.—2 Timoteyo 4:7.

Sergey Logunov

Igihe yavukiye: Mu mwaka wa 1962 (Orenburg)

Ibimuranga: Yahuguwe mu bijyanye no gukoresha imashini. Avuye mu gisirikare yakoze akazi ko gufotora. Vuba aha yakoraga akazi ko kwita ku busitani. Aracyakunda gufotora. Acuranga gitari. Yatangiye kwigana Bibiliya n’Abahamya ba Yehova ahagana mu mwaka wa 1990. Yabatijwe mu mwaka wa 1992. Yashakanye na Larisa mu mwaka wa 1994

Ibyo yavuze

Ni izihe nama waha abandi zabafasha kwitegura ibigeragezo?

Ni ibisanzwe ko iyo dufite ibibazo ari bwo tugaragaza ko dufite ukwizera cyangwa ko ntako. Kugira ngo twitegure neza ibigeragezo tugomba kurushaho kuba inshuti za Yehova na Yesu Kristo. Ni kimwe n’inkota, abayikora bakoresha icyuma gikomeye ku buryo itazavunika umuntu ageze ku rugamba. Iyo umusirikare afite inkota imeze neza, aba afite ikizere ko azatsinda. Yesu yavuze ko “Umuntu ukiranuka mu byoroheje aba akiranuka no mu bikomeye” (Luka 16:10). Ubwo rero, muri iki gihe iyo umuntu yitoje kumvira Yehova muri byose, bimufasha kuzaba indahemuka mu gihe azaba ari mu bitotezo bikomeye.

Biragaragara ko abo bavandimwe na bashiki bacu biyemeje gukomeza kubera Yehova indahemuka muri uru rugamba rumaze imyaka irenga itatu. Nanone biragaragara ko Yehova na we akomeje kubera indahemuka abamubera indahemuka.—2 Samweli 22:26.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU