27 WERURWE 2024 | YAHUJWE N’IGIHE KU ITARIKI YA 13 GICURASI 2024
U BURUSIYA

AMAKURU MASHYA—ABAVANDIMWE BAHAMIJWE ICYAHA | Biringiye ko Yehova azabafasha, bahora biteguye ibitotezo kandi barishimye

FUNGURA

Ku itariki ya 13 Gicurasi 2024, urukiko rw’akarere ka Leninskiy ruherereye mu gace ka Barnaul, intara ya Altai rwahamije icyaha umuvandimwe Yuriy Kolotinskiy, Mikhail Reshetnikov na Anatoliy Sarychev. Buri wese yakatiwe igifungo gisubitse cy’imyaka ibiri n’amezi atatu. Ntibizaba ngombwa ko bajyanwa muri gereza.

Icyo twabavugaho

Yuriy Kolotinskiy

Igihe yavukiye: 1955 (Moludaviya)

Ibimuranga: Yakoreshaga imashini nini zikoreshwa mu bucukuzi bw’amabuye y’agaciro

Yashakanye na Nataliya mu mwaka wa 1977

Yibazaga impamvu hariho imibabaro myinshi. Amaze kwigana Bibiliya n’Abahamya ba Yehova, yishimiye kubona igisubizo cyumvikana neza Bibiliya itanga kuri icyo kibazo. Yuriy na Nataliya babatijwe mu mwaka wa 1995

Ibyo yavuze

Ni iyihe nkuru yo muri Bibiliya yagufashije kwizera ko Yehova agushyigikiye?

Inshuro nyinshi ntekereza ku nkuru y’Abisirayeli, bamaze kuva mu Misiri. Igihe cyose bamaze mu butayu, Yehova yarabayoboye kandi arabarinda. Nanjye numva ko ankorera ibintu bimeze nk’ibyo. Buri gihe iyo mpamagawe mu rukiko, mba numva ko Yehova angenda imbere. Kumva ko anshyigikiye binyemeza ko ankunda kandi ko azampa imbaraga zizatuma nihanganira ibigeragezo no gukomeza kumubera indahemuka, uko ibibazo nahura na byo byaba bimeze kose. Narushijeho kugira ukwizera n’ibyiringiro bihamye, kandi niteguye gukora ibishoboka byose ngo ndwanire ishyaka izina rya Yehova.

Mikhail Reshetnikov

Igihe yavukiye: 1949 (Maksiner, mu gace ka Kirov)

Ibimuranga: Yakoze akazi k’ubushoferi, atwara bisi n’amakamyo mu gihe cy’imyaka irenga 50

Yabyaranye n’umugore we wa mbere abana b’abakobwa babiri n’umuhungu umwe. Uwo mugore we yaje kwicwa na kanseri, nyuma ashakana n’undi witwa Antonina mu mwaka wa 2021

Yari afite ibibazo yibazaga kuri Bibiliya, ariko idini yasengeregamo ntiryamufashije kubona ibisubizo. Igihe yiganaga Bibiliya n’Abahamya ba Yehova, yashimishijwe no kumenya ukuri. Yabatijwe mu mwaka wa 2000

Ibyo yavuze

Kuba wari wariteguye ibitotezo byagufashije gute?

Bagitangira gufata abavandimwe na bashiki bacu no kubafunga, natangiye gusenga Yehova musaba kumpa ubwenge no kumenya kwifata kugira ngo bimfashe kwitegura icyo nakora ibyo biramutse bimbayeho. Kwibonera ko Yehova yagiye amfasha kenshi, byatumye nemera ko buri gihe asubiza amasengesho yacu mu gihe gikwiriye. Nizeye ntashidikanya ko azakomeza kumfasha. Ubwo rero, nta bwoba mfitiye umwanzuro uwo ari wo wose urukiko rushobora kumfatira. Nzi ko Yehova azamfasha, nkakomeza kumubera indahemuka.

Anatoliy Sarychev

Igihe yavukiye: 1949 (Karpovo, mu gace ka Altai)

Ibimuranga: Mbere y’uko ajya mu kiruhuko cy’izabukuru, yakoraga mu bijyanye no gushushanya

Yashakanye na Nadezhda mu mwaka wa 1990. Bafite umwana w’umuhungu

Yatangiye kuganira n’Abahamya ba Yehova, igihe yarimo yoroherwa nyuma yo kubagwa. Yashimishijwe cyane n’amasezerano ya Yehova yo gukuraho imibabaro n’urugomo. Nadezhda yabatijwe mu mwaka wa 2001 naho Anatoliy abatizwa mu mwaka wa 2002

Ibyo yavuze

Ni iki kigufasha gukomeza kugira ibyishimo?

Ntekereza ku magambo yanditswe muri 1 Petero 3:14 agira ati: “Ariko niyo mwababazwa muzira gukiranuka, murahirwa.” Abafarisayo batotezaga intumwa za Yesu kubera ko zanze kureka kubwiriza. Igihe intumwa zakozwaga isoni, zihanganiye ibyo bitotezo ku bw’izina rya Yesu kandi zabonaga ko iyo yari impamvu yari gutuma zigira ibyishimo. Nifuza gukurikiza urugero zadusigiye. Simbona impamvu yatuma ncika intege kubera ko ndi gutotezwa. Ahubwo, kwigana urugero rw’Abakristo bo mu kinyejana cya mbere no kugera ikirenge mu cya Yesu Kristo bituma mbona ihumure.

Dushimishwa n’ingero z’abavandimwe na bashiki bacu bo muri iki gihe bagaragaza ukwizera no kwiringira Yehova. Twemera tudashidikanya ko Yehova azakomeza kubafasha kandi akabitaho kuko agira urukundo rudahemuka.—Zaburi 25:10.

Uko ibintu byagiye bikurikirana

Ku itariki ya 25 Gicurasi 2021

Mikhail yatangiye gukurikiranwa mu nkiko
Ku itariki ya 27 Gicurasi 2021

Urugo rwa Mikhail rwarasatswe. We na Antonina bahaswe ibibazo. Mikhail yabujijwe kurenga mu gace atuyemo
Ku itariki ya 6 Ukwakira 2022

Anatoliy na Yuriy batangiye gukurikiranwa n’urukiko, maze dosiye yabo ihuzwa n’iya Mikhail
Ku itariki ya 7 Ukwakira 2022

Anatoliy na Yuriy babujijwe kurenga mu gace batuyemo
Ku itariki ya 19 Mutarama 2023

Ni bwo urubanza rwatangiye

Reba nanone

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU