27 UKUBOZA 2023 | YAHUJWE N’IGIHE KU ITARIKI YA 6 WERURWE 2024
U BURUSIYA

AMAKURU MASHYA—ABAVANDIMWE BARAFUNZWE | Abavandimwe bakomeje kwihangana nubwo bamaze igihe bafunzwe

FUNGURA

Ku itariki ya 5 Werurwe 2024, urukiko rw’akarere ka Oktyabrskiy ruherereye mu gace ka Irkutsk rwahamije icyaha umuvandimwe Nikolay Martynov, Sergey Kosteyev, Yaroslav Kalin, Mikhail Moysah, Igor Popov, Denis Sarazhakov, Aleksey Solnechniy, Andrey Tolmachev na Sergey Vasiliyev. Nikolay, Sergey Kosteyev, Yaroslav, Mikhail, Aleksey na Andrey buri wese yakatiwe imyaka irindwi muri gereza. Igor na Denis bo bakatiwe imyaka itandatu n’amezi ane. Sergey Vasiliyev na we yakatiwe igifungo cy’imyaka itatu kandi yahise ajyanwa muri gereza akiva mu rukiko. Abandi bavandimwe bari bafunzwe by’agateganyo bazakomeza gufungwa.

Icyo twabavugaho

Nikolay Martynov

Igihe yavukiye: 1958 (Bandarka, mu karere ka Irkutsk)

Ibyamuranze: Yakoraga akazi k’ubushoferi

Yashakanye na Irina mu mwaka 1982. Ubu bafite abana babiri

Irina yatangiye kwigana Bibiliya n’Abahamya ba Yehova mu mwaka wa 1997. Ubuhanuzi bwo muri Bibiliya bwagiye busohora, bwatumye Nikolay yemera ko yabonye ukuri. We n’umugore we babatirijwe rimwe mu mwaka wa 1998

Ibyo Irina, umugore wa Nikolay yavuze a

Ni iki cyafashije umugabo wawe kwihangana mu myaka ibiri yamaze afunzwe?

Nikolay yakomeje gahunda ye yo gusoma Bibiliya no kuyitekerezaho kandi akajya atahura kenshi uko Yehova asubiza amasengesho ye. Ariko gutandukana na we ntibyari byoroshye, kuko ari umutware w’umuryango mwiza. Kuba atarashoboraga kutwitaho, nk’uko yabikoraga mbere, byamuteraga agahinda. Ubwo rero, iyo tumubwiye ko Yehova akomeje kutwitaho akoresheje abavandimwe na bashiki bacu, bituma yumva atuje. Nanone yavuze ko ikindi kintu kimufasha ari gusa nk’ureba twese abagize umuryango turi kumwe mu isi nshya. Yamaze guteganya inzu azabuka mu isi nshya n’ibiti by’imbuto azatera.

Yaroslav Kalin

Igihe yavukiye: 1969 (Pivovarikha, mu karere ka Irkutsk)

Ibyamuranze: Yakuriye mu muryango w’Abahamya ba Yehova. Ababyeyi be na ba sekuru bajyanywe muri Siberiya mu mwaka wa 1951

Akora amateleviziyo n’amaradiyo

Yabatijwe mu mwaka wa 1987

Yashakanye na Tatyana mu mwaka wa 1991. Bari bafite abahungu babiri n’abakobwa babiri. Ariko umuhungu wabo muto yapfuye mu mwaka wa 2007

Ibyo Tatyana umugore wa Yaroslav yavuze b

Ni ibihe bibazo umugabo wawe yahuye na byo igihe yari afunze, kandi se ni iki cyamufashije kwihangana?

Yaroslav yamaze imyaka ibiri afungiye muri gereza ya wenyine, kandi icyo gihe ntibyari byoroshye. Ubusanzwe, ni umuntu ukunda gusabana. Ubwo rero gufungirwa ahantu ha wenyine byatumye arushaho guhangayika. Ariko ntiyigeze acika intege cyangwa ngo aheranwe n’agahinda. Mu mabaruwa yanditse, yakundaga kugaruka ku magambo yo mu Bakolosayi 1:11, agira ati: “Mukomezwa n’imbaraga zose zihuje n’ubushobozi bwayo bw’ikuzo, kugira ngo mushobore kwihangana mu buryo bwuzuye kandi mwihanganire ingorane zose mufite ibyishimo.” Yiyemeje gukomeza kuba indahemuka no kwiringira Yehova. Nzi neza ko Yaroslav aha agaciro kenshi ibyo gukomeza gukora ibyo Imana ishaka ubu ndetse n’iteka ryose.

Mikhail Moysh

Igihe yavukiye: 1987 (Ukraine)

Ibyamuranze: Yakoraga ibyo kubaka no kugurisha

Yashakanye na Yelena mu mwaka wa 2009. Bafite abana babiri

Umugore we Yelena yabatijwe mu mwaka wa 2010. Nyuma yaho Mikhail yatangiye kujyana na we mu materaniro. Aza kubatizwa muri 2016

Ibyo Yelena umugore wa Mikhail yavuze c

Ni gute Mikhail yakomeje kukwitaho wowe n’abana bawe mu buryo bw’umwuka nubwo yamaze imyaka ibiri afunzwe?

Umuhungu wacu mukuru afite imyaka 12. Umuto afite imyaka ibiri n’igice, kandi igihe umugabo wanjye yafungwaga yari afite amezi atandatu. Ntabwo yumvaga impamvu papa we atari mu rugo. Bakumbuye papa wabo cyane. Ariko Mikhail akunda kubandikira imivugo, akabigisha ibirebana n’inyamaswa, inyoni, akabakorera imikino bashobora gukina kandi akabaha n’ibintu bazakoraho ubushakashatsi. Kandi nanjye aramfasha, iyo mfite ibitekerezo bitari byiza. Hari igihe nibazaga nti: “Kuki ari twe twahuye n’ibi bibazo?” Mu ibaruwa imwe yanyandikiye, yamfashije kwibonera ko ibyo bitagaragazaga ko nari mfite ikibazo cyo mu buryo bw’umwuka. Yaranyandikiye ati: “Ikintu cy’ingenzi ni ukuntu twitwara bitewe n’ibyo bitekerezo. Iyo twemereye Yehova ko adukosora kimwe na Yobu, adufasha kongera kugira ukwizera gukomeye no kubona ibintu mu buryo bukwiriye.” Iyo baruwa yansubijemo imbaraga rwose.

Igor Popov

Igihe yavukiye: 1987 (Kazakhstan)

Ibyamuranze: Avuka mu muryango w’abana umunani. Papa we yapfuye afite imyaka 11

Yakoraga akazi k’ubwubatsi n’ibijyanye n’amazi

Papa we amaze gupfa, mama we na bakuru be batangiye kwiga Bibiliya. Nyuma yaho na we yaje gutangira kwiga kandi akorwa ku mutima cyane n’inyigisho y’umuzuko. Igor yabatijwe mu mwaka wa 2006, abatirizwa rimwe n’abagize umuryango we bagera kuri barindwi

Yashakanye na Mangira muri 2013

Ibyo Mangira umugore wa Igor yavuze d

Ni uwuhe murongo wa Bibiliya wafashije umuryango wawe kwihanganira ibibazo ibibazo mwahuye na byo?

Igor yamaze igihe afungiwe ahantu ha wenyine. Hari ibaruwa yanditse, maze ashyiramo umurongo wo muri Zaburi 118:5, ugira uti: “Nageze mu mimerere ibabaje ntakambira Yah, maze Yah aransubiza anshyira ahantu hagari.” Igor yaranditse ati: “Aha hantu hagari hashobora guhindurwamo ‘ahantu hari umutekano.’ Mu gihe twumva ibitekerezo biduca intege byatubanye byinshi, Yehova aba yiteguye gusubiza amasengesho yacu, akadufasha kwikuramo ibyo bitekerezo kandi akaduha amahoro yo mu mutima.” Ibyo byatwibukije ko buri gihe Yehova adashobora kubura uko adufasha kandi ko atazigera adutererana, uko ibibazo twaba turimo byaba bimeze kose.

Denis Sarazhakov

Igihe yavukiye: 1988 (Sayanogorsk, muri Repubulika ya Khakassia)

Ibyamuranze: Yakoraga akazi ko kwamamaza

Yakuriye mu muryango w’Abahamya ba Yehova. Ababyeyi bamufashije kuba incuti ya Yehova. Igihe yari amaze kubona ko gukurikiza amahame ya Bibiliya bigira akamaro, yabatijwe mu mwaka wa 2004

Yashakanye na Olesiya mu mwaka wa 2007

Ibyo Olesiya umugore wa Denis yavuze e

Ni gute Denis yaguteraga inkunga?

Njye na Denis dukunda kuvugana dukoresheje amabaruwa. Ariko twemerewe kuvugana kuri telefone rimwe mu cyumweru, iminota igera kuri itanu. Nanone nemerewe kumusura tukamarana isaha, incuro ebyiri mu kwezi. Iyo tuvugana kuri telefone haba hari urukuta rw’ikirahure hagati yacu. Igihe cyose tuvuganye ambwira ikintu cyo muri Bibiliya giteye inkunga. Nanone anyibutsa ko tutagomba na rimwe kwiheba. Dufite impamvu nyinshi zikwiriye gutuma twishima bitewe n’ibyo tuba twakoze. Ibi bibazo twahuye na byo ntibyaduciye intege, ahubwo byatumye turushaho gukomera.

Aleksey Solnechniy

Igihe yavukiye: 1976 (Abakan, mu gace ka Krasnoyarsk)

Ibyamuranze: Yakoraga iby’amashanyarazi

Mama we na mushiki we batangiye kwiga Bibiliya, igihe yari mu gisirikare. Igihe yakivagamo, yatangiye gushishikazwa na Bibiliya maze atangira kuyiga, maze abatizwa mu mwaka wa 2004

Yashakanye na Alyona mu mwaka wa 2011

Ibyo Alyona umugore wa Aleksey yavuze f

Ni iki cyafashije umugabo wawe gukomeza kubona ibintu mu buryo bukwiriye igihe yari afunzwe?

Aleksey asenga Yehova buri munsi kandi bimufasha kwibuka ko Yehova amukunda. Nanone agerageza kwibuka ko abapolisi n’abacamanza baba bari mu kazi kabo. Ibyo bimufasha guhoza ubwenge ku kintu cy’ingenzi, ni ukuvuga guhesha icyubahiro izina rya Yehova, aho kwitekerezaho cyangwa gutekereza kuri ibyo bitotezo ahanganye na byo. Nubwo ajya adukumbura njye n’abandi bagize umuryango hamwe n’incuti ze, akomeje kurangwa n’icyizere kandi aracyasetsa nka mbere.

Nubwo aba bavandimwe batandukanyijwe n’imiryango yabo mu gihe runaka, nta kintu na kimwe gishobora kubatandukanya n’urukundo rwa Yehova, mu gihe bakomeje kuba indahemuka.—Abaroma 8:35-39.

Uko ibintu byagiye bikurikirana

Ku itariki ya 4 Ukwakira 2021

Ingo z’Abahamya ba Yehova bo mu karere ka Irkutsk zarasatswe. Umuvandimwe Nikolay, Sergey Kosteyev, Yaroslav, Mikhail, Aleksey, Andrey na Sergey Vasiliyev, bashinjwe ibyaha kandi barafungwa
Ku itariki ya 5 Ukwakira 2021

Yaroslav, Mikhail na Aleksey boherejwe aho bari gufungirwa by’agateganyo
Ku itariki ya 6 Ukwakira 2021

Sergey Kosteyev, Nikolay na Andrey na bo boherejwe aho bari gufungirwa by’agateganyo. Sergey Vasiliyev yararekuwe ariko bamutegeka kutava mu rugo
Ku itariki ya 30 Ugushyingo 2021

Ingo nyinshi z’abavandimwe zarasatswe. Denis na Igor barafashwe bajyanwa mu karere ka Irkutsk, ahantu hareshya n’ibirometero birenga 1500
Ku itariki ya 1 Ukuboza 2021

Igor yafunzwe by’agateganyo
Ku itariki 2 Ukuboza 2021

Denis yafunzwe by’agateganyo
Ku itariki ya 29 Ukuboza 2022

Urubanza rwaratangiye

a b c d e f Ntibyakunze ko tuganira n’umuvandimmwe Martynov, Kalin, Moysh, Popov, Sarazhakov na Solnechniy kubera ko bafunze.

Reba nanone

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU