10 GASHYANTARE 2023 | YAHUJWE N’IGIHE KU ITARIKI YA 14 NYAKANGA 2023
U BURUSIYA

AMAKURU MASHYA—ABAVANDIMWE BARAFUNZWE | Abavandimwe batatu bari kuburanira mu rukiko rw’i Moscow

FUNGURA

Ku itariki ya 12 Nyakanga 2023, urukiko rw’akarere ka Savelovskiy mu mujyi wa Moscow, rwahamije icyaha umuvandimwe Roman Mareyev, Anatoliy Marunov na Sergey Tolokonnikov. Roman yakatiwe imyaka ine n’igice, Anatoliy akatirwa imyaka itandatu n’igice naho Sergey we akatirwa imyaka itanu. Anatoliy akimara kuva mu rukiko yahise ajyanwa muri gereza. Roman na Sergey bo bari basanzwe bafunzwe.

Icyo twabavugaho

Roman Mareyev

Igihe yavukiye: 1978 (I Moscow)

Ibimuranga: Yakoze mu kigo gishinzwe gutwa ibintu n’abantu cy’i Moscow. Mbere y’uko afungwa by’agateganyo niwe witaga ku babyeyi be bamugaye

Atangira gusoma Bibiliya yatangajwe n’uko ubuhanuzi bwo mu gitabo cya Daniyeli buhuje n’ukuri. Yabatijwe mu mwaka wa 2002

Ibyo yavuze

Ni iki cyagufashije gukomeza kurangwa n’ikizere mu gihe kitari gito wari ufunzwe?

Kuba narafunzwe by’agateganyo nzira kwizera Imana, byatumye mbona uburyo bwiza bwo kuyihesha ikuzo binyuriye ku myitwarire yanjye. Abo twari dufunganywe bamaze amezi menshi bitegereza ibyo nakoraga n’uko nitwaraga. Niyo mpamvu buri munsi nasabaga Yehova ngo ampe umwuka we wera, umfashe kugaragaza imico ye.

Namenye ko guhangayikishwa n’ibigeragezo dushobora kuzahura nabyo ari byo bibi kuruta guhura n’ibyo bigeragezo. Iyo twiringiye Imana, nayo idufata ukuboko ikatunyuza “ahantu hari umwijima mwinshi cyane” (Zaburi 23:4). Ikintu cy’ingenzi nagombaga gukora ni ukutemera ko indekura. Buri gihe Yehova yamfashaga gukomeza kurangwa n’icyizere kandi byamfashije gukomeza kugira amahoro n’ibyishimo.

Anatoliy Marunov

Igihe yavukiye: 1953 (Izmail muri Ukraine)

Ibimuranga: Mbere yo kujya mu kiruhuko cy’izabukuru yakoraga akazi ko gutunganya amashusho yashyirwaga mu kinyamakuru

Yashakanye na Alevtina mu mwaka wa 1975. Bafite abahungu babiri

Alevtina ni we watangiye kwiga Bibiliya maze abatizwa mu mwaka wa 1994. Kubera ko Anatoliy yakoraga mu icapiro ry’ikinyamakuru, yabanje gutangazwa n’uburyo icapiro ry’Abahamya ba Yehova ryasohoraga ibitabo byinshi. Yashishikazwaga n’ubuhanuzi bwo muri Bibiliya kandi yabatijwe mu mwaka wa 1999

Ibyo yavuze

Wakoze iki kugira ngo witegure ibitotezo?

Njye n’umugore wanjye twari twiteze ko hari igihe natwe tuzatotezwa. Ubwo rero twahaga agaciro cyane isomo ry’umunsi, ingingo zasohokaga nibintu byose twigiraga mu materaniro, hakubiyemo n’amatangazo. Twari twariyemeje kumvira amabwiriza yose duhawe.

Ni iki cyagufashije gukomeza kwihangana?

Guha agaciro ibyo Data wo mu ijuru udukunda yadukoreye njye n’umuryango wanjye, byatumye niyemeza kudacika intege. Kandi by’umwihariko nishimira cyane imigisha itagereranywa azaha abamwumvira bose. Tuzi neza ko imperuka iri hafi. Gucika intege muri iki gihe, ntibikwiriye by’umwihariko iyo ntekereje ibintu byose Yehova ankorera.

Sergey Tolokonnikov

Igihe yavukiye: 1972 (I Moscow)

Ibimuranga: Yakoraga mu kigo kirinda umutekano

Yashakanye na Mariya mu mwaka wa 2004. Mariya yatangiye kwiga Bibiliya mu mwaka wa 2003. Sergey yishimiye ko ibibazo yibazaga babimusubije bakoresheje Bibiliya, maze nawe yiyemeza gutangira kuyiga afatanyije n’umugore we. Bombi babatijwe mu mwaka wa 2005

Ibyo Mariya Pankova umugore wa Sergey yavuze a

Uganira n’umugabo wawe ukoresheje ubuhe buryo?

Inshuro nyinshi dukoresha amabaruwa. Mu mabaruwa anyandikira ashyiramo imirongo itandukanye n’inkuru zitandukanye byo muri Bibiliya. Akunda kunyoherereza udukarita n’ibindi bintu aba yashushanyije kandi biranshimisha. Vuba aha, ni bwo banyemereye kujya musura kabiri mu kwezi tukamarana isaha n’igice. Kugera aho afungiye hari urugendo rw’amasaha atatu, ubwo rero iyo gahunda yo kumusura ishobora gutwara umunsi wose.

Ibyababayeho byakwigishije iki?

Njye na Sergey twiboneye ko yaba abashinjacyaha, abacamanza cyangwa abagenzacyaha nta n’umwe ushobora gukora ibintu birenze ibyo Yehova yemeye ko biba. Yehoba aba ari kureba ibintu byose.

Twishimira kuba Roman, Anatoliy na Sergey batubera ugurego rwiza rwo kwizera Yehova. Kandi twizeye ko ibibazo twahura nabyo uko byaba bimeze kose, tudakwiriye ‘gutinya ikibi,’ kuko Yehova ari kumwe natwe.—Zaburi 23:4.

Uko ibintu byagiye bikurikirana

Ku itariki ya 20 Ukwakira 2021

Abayobozi basatse ingo umunani z’Abahamya ba Yehova bo mu mujyi wa Moscow. Roman, Anatoliy na Sergey bakorewe dosiye bashinjwa gutegura ibikorwa by’umuryango ushinjwa ubutagondwa no gushishikariza abandi kwifatanya muri ibyo bikorwa. Abo bavandimwe uko ari batatu bahise bafungwa by’abagateganyo
Ku itariki ya 22 Ukwakira 2021

Roman na Sergey bajyanywe muri gereza. Anatoliy yafungishijwe ijisho
Ku itariki ya 17 Kamena 2022

Nibwo urubanza rwatangiye

a Igihe iyi ngingo yategurwaga, umuvandimwe Tolokonnikov yari afunzwe kuburyo tutabashije kumuvugisha. Mushiki wacu Pankova, amaze gushaka yagumanye izina rye.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU