29 WERURWE 2023 | YAHUJWE N’IGIHE KU ITARIKI YA 18 MATA 2023
U BURUSIYA

AMAKURU MASHYA—ABAVANDIMWE BARAFUNZWE | Yehova yafashije abavandimwe bafunzwe

FUNGURA

Ku itariki ya 17 Mata 2023, urukiko rw’akarere ka Ahktubinskiy ruri mu ntara ya Astrakhan, rwahamije icyaha umuvandimwe Rinat Kiramov, Sergey Korolev na Sergey Kosyanenko. Buri wese yakatiwe igifungo cy’imyaka irindwi. Bose bafunzwe by’agateganyo guhera mu Gushyingo 2021 kandi bazaguma muri gereza.

Icyo twabavugaho

Rinat Kiramov

Igihe yavukiye: 1987 (Moscow mu ntara ya Moscow)

Ibimuranga: Mbere y’uko afatwa yigaga ibijyane no gukora imbuga za interineti. Afite impano yo gucuranga. Igihe yakoraga imirimo ya gisivili isimbura iya gisirikare, yari yarahawe akazi ko gushyira amabaruwa ba nyirayo.

Mama we, ni we wamwigishije Bibiliya. Yashimishijwe cyane n’urukundo ruranga Abahamya ba Yehova. Yabatijwe mu mwaka wa 2001

Yashakanye na Galina mu mwaka wa 2009

Ibyo umugore we, Galina yavuze a

Ni iki cyafashije Rinat kwihangana igihe yari afunzwe?

Rinat yishyiriyeho intego yo gusenga asabira abavandimwe na bashiki bacu bafunzwe. Kandi iyo asenga buri wese amuvuga mu izina. Buri kwezi iyo musuye, muha urutonde rw’abavandimwe na bashiki bacu bo hirya no hino ku isi bafunzwe bazira ukwizera kwabo. Gufata umwanya agasenga asabira buri wese, bituma arushaho kuba incuti ya Yehova kandi bikamurinda guhora atekereza ku bibazo bye. Nanone, njye nawe twibukiranya akamaro ko kwihangana, kuko iyo twihanganye bibera abandi ubuhamya kandi tukaba dushyigikiye ubutegetsi bw’ikirenga bwa Yehova. Mu ibaruwa Rinat yanditse, yaravuze ati: “Uko imbaraga z’abaturwanya zaba zingana kose, iyo Papa wacu wo mu ijuru adufashije turatsinda. Icyakora ibyo ntibisobanura ko byanze bikunze tuba tubonye umudendezo. Kuri twe intsinzi ikomeye ni ugukomeza kuba indahemuka kugeza ku iherezo.”

Ni mu buhe buryo mwiboneye ko Yehova abashyigikiye?

Rinat yanyandikiye ibintu niboneye ko ari ukuri, yaravuze ati: “Kubera ko ubu ntabasha kukwitaho, Yehova yafashe iyo nshingano, ayigira iye.” Kandi kuva ibibazo duhanganye na byo byatangira nagiye nibonera uburyo Yehova amfasha akoresheje umwuka we wera. Zaburi ya 91:1 irimo isezerano rigira riti: “Umuntu wese utuye mu bwihisho bw’Isumbabyose, azaba mu gicucu cy’Ishoborabyose.” Mu gihe cyashize, nasomaga uyu “murongo,” ariko ubu ni bwo nibonera ko Yehova andinda kurusha mbere hose. Ibyo byatumye ndushaho kumwiringira kandi bimfasha kwihangana mfite ibyishimo.

Sergey Korolev

Igihe yavukiye: 1973 (Penza mu ntara ya Penza)

Ibimuranga: Akunda gufotora no gukora ibikoresho byo mu nzu

Igihe yahuraga n’Abahamya ba Yehova bakamwigisha ibyerekeye Umuremyi, yahinduye uko yabonaga amadini. Yabatijwe mu mwaka wa 1996

Yashakanye na Yekaterina mu mwaka wa 2005

Ibyo yavuze

Ni mu buhe buryo ubucuti ufitanye na Yehova bwarushijeho kwiyongera muri iki gihe?

Iyo umuntu afunzwe kwirinda ibitekerezo bimuca intege ntibiba byoroshye. Iyo ahuye n’ibigeragezo; gukomeza kwihangana, kugira ukwizera, ibyiringiro n’urukundo bimusaba imbaraga. Ubwo rero gusenga ni byo byamfashije cyane. Igihe mara nganira na Papa wanjye wo mu ijuru cyariyongereye cyane. Nta kindi gihe nigeze nsenga amasengesho menshi kandi amvuye ku mutima nk’ubu. Ubu ni bwo niyumvisha ukuntu Yesu yamaze ijoro ryose asenga Papa we. Gufungwa byanyigishije ko ngombwa kwishingikiriza ku Mana mu buryo bwuzuye, kandi icyo ni cyo kintu gikomeye kurusha ibindi gufungwa byanyigishije.

Sergey Kosyanenko

Igihe yavukiye: 1961 (Yelan mu ntara ya Volgograd)

Ibimuranga: Yigisha abandi gukora imyitozo ngororamubiri

Yashakanye na Olga mu mwaka wa 1983. Yashimishijwe cyane n’uburyo ubuhanuzi n’amateka bivugwa muri Bibiliya bihuje n’ukuri. Yabatijwe mu mwaka wa 2002

Ibyo umugore we Olga yavuze b

Ni iki cyagufashije kudakomeza gucika intege?

Njyerageza guhugira mu bintu bimfitiye akamaro. Nsoma imfashanyigisho za Bibiliya, nsenga Yehova musaba kumpa imbaraga zo kumfasha kurwanya ibitekerezo binca intege. Amabaruwa Sergey anyoherereza nyasoma inshuro nyinshi kandi ngatekereza uko ibintu bizaba bimeze twongeye guhura ibi byose byarangiye. Nanone kumva no kuririmba indirimbo z’umuryango wacu biramfasha.

Ese haba hari umurongo wo muri Bibiliya wagufashije kwihangana?

Nkunda cyane amagambo ari mu 1 Abakorinto 10:13, agaragaza ko Imana idusezeranya ko ‘itazatureka ngo tugeragezwe ibirenze ibyo dushobora kwihanganira.’ Nzi neza ko njye ubwanjye ntashobora kwihanganira ibyo bintu byose kandi ko nta kizabuza Yehova kumfasha kwihangana. Iyo ibintu nk’ibi bitubayeho tuba dushobora kubitsinda kuko biba bitazahoraho.

Duhumurizwa no kumenya ko Yehova azakomeza kurinda abagaragu be b’indahemuka kandi ko ‘amaboko ye y’iteka ryose adukomeza.’—Gutegeka kwa Kabiri 33:27.

Uko ibintu byagiye bikurikirana

Ku itariki ya 9 Ugushyingo 2021

Yakorewe dosiye. Abayobozi basatse ingo 15 z’Abahamya ba Yehova bo mu gace ka Akhtubinsk n’abo mu gace ka Znamensk, harimo n’urw’umuvandimwe Kiramov, urwa Korolev n’urwa Kosyanenko
Ku itariki ya 10 Ugushyingo 2021

Sergey Korolev yarafashwe
Ku itariki ya 11 Ugushyingo 2021

Rinat Kiramov na Sergey Kosyanenko barafashwe. Bose uko ari batatu bafunzwe by’agateganyo
Ku itariki ya 14 Ugushyingo 2022

Ni bwo urubanza rwatangiye

a b Ntitwabashije kuvugana n’umuvandimwe Kiramov na Kosyanenko

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU