20 UKUBOZA 2021
U BURUSIYA

AMAKURU MASHYA | Abahamya bane mu gace ka Trans-Baikal bategereje umwanzuro w’urukiko nyuma yo kugabwaho igitero

FUNGURA

Ku itariki ya 20 Nzeri 2022, urukiko rwo mu gace ka Trans-Baikal rwanze ubujurire bw’abavandimwe Brothers Vladimir Ermolaev, Sergey Kirilyuk, Igor Mamalimov na Aleksandr Putintsev. Vladimir, Igor na Aleksandr bakomeje gufungwa. Sergey we ntiyajyanywe muri gereza.

Ku itariki ya 6 Kamena 2022, urukiko rw’akarere ruherereye mu gace ka Chita rwahamije icyaha Vladimir, Sergey, Igor na Aleksandr. Sergey yakatiwe igifungo gisubitse cy’imyaka itandatu. Naho Vladimir, Igor na Aleksandr bo, buri wese yakatiwe igifungo cy‘imyaka itandatu n’igice. Igihano bakatiwe kizahita gitangira.

Uko ibintu byagiye bikurikirana

Ku itariki ya 16 Werurwe 2021

Ni bwo urubanza rwatangiye
Ku itariki ya 2 Gashyantare 2021

Vladimir, Sergey, Igor na Aleksandr bashinjwe gutegura ibikorwa by’umuryango wabuzanyijwe
Ku itariki ya 3 Mata 2020

Vladimir yavaniweho gufungishwa ijisho
Ku itariki ya 15 Gashyantare 2020

Sergey yafunguwe hashize iminsi itanu afunzwe
Ku itariki ya 12 Gashyantare 2020

Igor na Aleksandr barafunguwe. Igifungo cya Sergey kiyongereyeho amasaha 72. Vladimir we yakatiwe iminsi 52 afungishijwe ijisho
Ku itariki ya 10 Gashyantare 2020

Abasirikare bo mu rwego rushinzwe ubutasi basatse ingo 50 z’Abahamya ba Yehova mu gace ka Trans-Baikal. Nanone basatse ingo z’Abahamya bageze mu zabukuru n’abamugaye. Mu muryango umwe, Umuhamya ukiri muto yakubitiwe imbere ya nyina na mushiki we muto. Undi muvandimwe nawe yakorewe ibikorwa by’iyicarubozo. Gusaka birangiye, abasirikare bagiye gufunga Abahamya 10 harimo Igor, Aleksandr, Sergey na Vladimir

Icyo twabavugaho

Sergey Kirilyuk

Igihe yavukiye: 1972 (Cheremkhovo, mu gace ka Irkutsk)

Ibimuranga: Yakuriye mu muryango w’abana batandatu. Akora akazi ko gusudira. Yashakanye na Olga mu mwaka wa 1992. Bafite abana batatu

Sergey na Olga batangiye no gushishikazwa n’inyigisho zo muri Bibiliya ahagana mu mwaka wa 1995. Yabatijwe mu mwaka wa 1998

Ibyo yavuze

Ni mu buhe buryo uko witwaye igihe wari ufunzwe byagize ingaruka ku bandi?

Muri kasho nari ndi kumwe n’umuntu wari wongeye gufungwa. Yagiye afungwa kenshi ku buryo igihe kinini yakimaze muri gereza. . . . Igihe cyose nabaga mvuye guhatwa ibibazo yarambazaga ati: “Ese hari icyo wabatangarije?” Nuko nkamusubiza nti: “oya.” Yaranyubahaga cyane. Iyo [abayobozi] bampataga ibibazo umunsi wose, ntibampaga ibyokurya. Ariko uwo muntu twari dufunganywe yamfatiraga ibyokurya akabinzanira. Sinigeze nicwa n’inzara.

Igor Mamalimov

Igihe yavukiye: 1976 (Akarere ka Ilishevsky, muri Repuburika Bashkortostan)

Ibimuranga: We n’abandi bana babiri bavukana bakuriye mu muryango w’abahinzi. Acuranga icyuma cy’umuziki kitwa akorudewo. Akora igihe gito mu bijyanye no kubaka kandi ni umukanishi. Yashakanye na Natalya mu mwaka wa 2007. Bafite abana batatu

Mu ntangiriro y’umwaka wa 2000, uburwayi yahuye na bwo hamwe n’urupfu rwa mushiki we muto byatumye yibaza ibibazo byinshi ku byerekeye Imana, ubuzima n’urupfu. Igihe yatangiraga kwigana Bibiliya n’Abahamya ba Yehova yabonye ibisubizo by’ibibazo yibazaga. Yabatijwe mu mwaka wa 2008

Ibyo yavuze

Ese abagize umuryango wawe barushijeho kuba inshuti za Yehova mu bitotezo wahuye na byo?

Umuryango wacu warushijeho kunga ubumwe no kuba inshuti za Yehova. Abana bacu bagize amajyambere yo mu buryo bw’umwuka. Bakunda Yehova cyane. . . . Batanga ibisubizo byiza mu materaniro kandi babaza ibibazo byinshi bishishikaje. . . . Bakunda gusenga Yehova kenshi kandi bajya batubwira ukuntu yashubije amasengesho yabo. Ibitotezo nahuye na byo byahinduye byinshi mu buzima bwacu, kandi buri wese mu bagize umuryango hari icyo byamumariye ku giti ke.

Aleksandr Putintsev

Igihe yavukiye: 1974 (Verkhnyaya Khila, mu gace ka Trans-Baikal)

Ibimuranga: Avuka wenyine. Akunda gusoma no gufotora. Yashakanye na Galina mu mwaka wa 1994. Bakora ku giti cyabo kandi bafite umwana umwe w’umuhungu

Mu mwaka wa 1990, yabonye ko kunywa inzoga nyinshi cyane byagiraga ingaruka ku muryango we. Yatangiye kwiga Bibiliya kandi abona ko gushyira mu bikorwa inama zirangwa n’ubwenge Bibiliya itanga byahinduye ubuzima bwe. Yabatijwe mu mwaka wa 1997

Ibyo yavuze

Ni gute isengesho ryagufashije?

Igihe bampataga ibibazo bwa mbere, byambereye ikibazo gikomeye. Nari mpangayitse cyane kandi nihebye. Nasenze kenshi. Nari nzi ko abenshi mu nshuti zange n’abagize umuryango basenga bansabira. Nanone nibuka ko iyo nabaga ndi mu nzira ngiye guhatwa ibibazo nagendaga nsenga. Igihe nari mu biro by’umushinjacyaha numvise ntuje kandi niringira ko Yehova anshyigikiye. Inshuro zakurikiyeho nabaga nizeye ko Yehova atantererana.

Tuzakomeza kwigana ukwizera gukomeye abavandimwe na bashiki bacu bagaragaza, bigana Daniyeli na bagenzi be batatu bari ‘bariyemeje mu mutima wabo’ gukomeza kubera Yehova indahemuka nubwo bahuraga n’ibitotezo bivuye ku bategetsi bo mu gihe cyabo.—Daniyeli 1:8.

Umurongo wo hejuru (ibumoso ugana iburyo): Umuvandimwe Vladimir Ermolaev n’umugore we Valeriya; umuvandimwe Sergey Kirilyuk n’umugore we Olga

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU