22 NYAKANGA 2022 | YAHUJWE N’IGIHE KU ITARIKI YA 30 MUTARAMA 2024
U BURUSIYA

AMAKURU MASHYA—BACIWE AMANDE | Abahamya ba Yehova bo mu mujyi wa Shuya bakomeje kwihanganira akarengane

FUNGURA

Ku itariki ya 29 Mutarama 2024, urukiko rw’umujyi wa Shuya, ruherereye mu gace ka Ivanovo rwahamije icyaha umuvandimwe Aleksey Arkhipov, Dmitriy Mikhaylov n’umugore we Yelena na mushiki wacu Svetlana Ryzhkova na Svetlana Shishina. Kandi baciwe amande akurikira: Arkhipov yaciwe amande angana na agera hafi kuri miliyoni 5 y’amafaranga y’u Rwanda, Mikhaylov yaciwe arenga miliyoni 13 y’amafaranga y’u Rwanda, umugore we Yelena yaciwe agera hafi kuri miliyoni 8, mushiki wacu Ryzhkova yaciwe agera hafi kuri miliyoni 7 y’amafaranga y’u Rwanda naho mushiki wacu Shishina we acibwa amande arenga miliyoni 5 z’amafaranga y’u Rwanda.

Uko ibintu byagiye bikurikirana

Ku itariki ya 21 Nzeri 2017

Umucamanza yatanze uburenganzira bwo kumviriza ibiganiro Mikhaylovs agirana n’abandi kuri telefone
Ku itariki ya 15 Mutarama 2018

Umucamanza yatanze uburenganzira bwo kumviriza ibiganiro mushiki wacu Svetlana Ryzhkova agirana n’abandi kuri telefone no gushyiraho kamera zo kugenzura ibibera mu rugo rwe
Ku itariki ya 20 Mata 2018

Abayobozi basatse ingo z’abo Bahamya bose uko ari batanu
Ku itariki ya 29 Gicurasi 2018

Abapolisi bafashe Dmitriy kandi batangira kumukurikirana mu nkiko bamushinja ko atanga amafaranga yo gushyigikira ibikorwa by’umuryango ushinjwa ubutagondwa. Yabaye afunzwe by’agateganyo
Ku itariki ya 22 Kamena 2018

Aleksey yongewe muri uru rubanza kandi ategekwa kutarenga agace atuyemo
Ku itariki ya 27 Kamena 2018

Mushiki wacu Yelena Mikhaylova, Svetlana Ryzhkova na Svetlana Shishina bongewe muri uru rubanza
Ku itariki ya 15 Ugushyingo 2018

Urukiko rw’ubujurire rwategetse ko Dmitriy arekurwa nyuma yo kumara amezi arenga atandatu afunzwe by’agateganyo
Ku itariki ya 10 Kanama 2021

Ni bwo urubanza rwatangiye
Ku itariki ya 16 Nzeri 2021

Idosiye yasubijwe mu bushinjacyaha kugira ngo yongere ayisuzume
Ku itariki ya 25 Gicurasi 2022

Urubanza rwasubiwemo

Icyo twabavugaho

Aleksey Arkhipov

Igihe yavukiye: 1960 (Arkhangelsk, mu gace ka Arkhangelsk)

Ibimuranga: Yabaye umusirikare. Kandi yigeze kuba umushoferi wa bisi.

Yashakanye na Natalya mu mwaka wa 1984. Arera abana babiri. Amaze kujya mu kiruhuko cy’iza bukuru yimukiye mu mujyi wa Shuya kujya kwita ku babyeyi ba Natalya bageze mu za bukuru

Umukozi bakoranaga ni we wamufashije kumenya ukuri ko muri Bibiliya. Yabatijwe mu mwaka wa 2017

Ibyo yavuze

Ni uwuhe murongo wo muri Bibiliya wagufashije gukomeza kurangwa n’icyizere muri ibi bihe?

Inama iboneka mu 1 Abakorinto 10:24 yaramfashije cyane. Igira iti: “Buri wese ntakomeze gushaka inyungu ze bwite, ahubwo ashake iza mugenzi we.” Ibyo binyibutsa ko ntagomba kwibanda ku bibazo byanjye gusa ngo nibagirwe ko ngomba kwita ku bandi.

Amagambo ya Yesu ari muri Matayo 5:10-12, na yo yanteye inkunga. Agira ati: “Hahirwa abatotezwa bazira gukiranuka, kuko ubwami bwo mu ijuru ari ubwabo. “Muzishime abantu nibabatuka, bakabatoteza. . . . Muzishime kandi munezerwe cyane, kuko ingororano zanyu ari nyinshi mu ijuru; kuko uko ari ko batoteje abahanuzi bababanjirije.” Iyi mirongo ituma ngira ubutwari, kwihangana n’ibyiringiro.

Dmitriy Mikhaylov

Igihe yavukiye: 1977 (Kupchanovka, Kazakisitani)

Ibimuranga: Yize ibijyanye na elegitoronike. Yakoze mu bijyanye na porogaramu za mudasobwa. Akunda gufotora no gukora za videwo

Yize Bibiliya igihe yari afite imyaka 15. Yabatijwe mu mwaka wa 1993. Yashakanye na Yelena mu mwaka wa 2003

Ibyo yavuze

Wowe n’umugore wawe mwakoze iki ngo muterane inkunga nubwo mutari muri kumwe igihe wari ufunzwe?

Igihe nari muri gereza, umugore wanjye yanyandikiraga amabaruwa yihariye yanteye inkunga cyane. Ayo mabaruwa ntiyari yihariye gusa kubera ko nayandikiwe n’umugore wanjye, ahubwo yanteye inkunga yo gukomeza kubera Yehova indahemuka no kurushaho kumukunda, kandi yatumye ngira ukwizera gukomeye n’ibyiringiro. Numvaga ari nk’aho Yehova afasha Yelena kubona amagambo akwiriye yo kumpumuriza no kumfasha gutuza. Nyuma yaho naje kumenya impamvu amabaruwa ya Yelena yabaga ateye inkunga. Mbere y’uko yandika amabaruwa, yarasengaga cyane agasaba Yehova kumufasha gukora ubushakashatsi kandi akagenzura Ibyanditswe abyitondeye.

Nanjye nandikiraga Yelena amabaruwa yo kumutera inkunga, kandi nakundaga kumubwira ibintu by’agaciro nasomye muri Bibiliya. Namubwiraga imigisha Yehova yaduhaye nkanamushimira ukuntu ankunda, n’ukuntu yitanga kandi akaba yiteguye gukomeza kubera Yehova indahemuka igihe cyose.

Yelena Mikhaylova

Igihe yavukiye: 1983 (Shuya)

Ibimuranga: Arangije amashuri yisumbuye, yababaye umwarimu w’imibare na fiziki.

Yapfushije papa we igihe yari afite imyaka icyenda. Yatangiye kwibaza niba Imana iriho nuko bigenda iyo umuntu apfuye. Yabatijwe mu mwaka wa 1999. Yabonye ibisubizo bimunyuze. Yashakanye na Dmitriy mu mwaka wa 2003

Ibyo yavuze

Ni ibihe bibazo wahuye na byo igihe umugabo wawe yari afunzwe?

Kubera ko nitaga kuri mabukwe ufite imyaka 80, nagombaga gukora cyane. Igihe Dmitriy yafatwaga mama we yarushijeho kuremba. Nanone gereza yari ku birometero 35 kuvuye mu rugo. Kujyayo byasabaga igihe n’imbaraga. Ikindi nanone abashinzwe iperereza bansabye ko ngomba kujya nitaba kenshi kandi banteraga ubwoba. Nyuma yaho nanjye batangiye kunkurikiranaho ibyaha.

Ni iki cyagufashije guhangana n’ibyo bibazo byose?

Nasenze Yehova cyane kandi musaba by’umwihariko kumpa imbaraga nyinshi kugira ngo mbashe kwihanganira ibintu byose byangeragaho. Sinasinziraga neza. Ariko iyo nabyukaga buri gitondo nabaga nzi ko hari ibintu byinshi ngomba gukora. Yehova yaramfashije mbasha kugera ku bintu byose natekerezaga ko ntashobora ntari kumwe n’umugabo wanjye.

Svetlana Shishina

Igihe yavukiye: 1975 (Orenburg, mu gace ka Orenburg)

Ibimuranga: Akora ibijyanye n’ubwiza

Yashatse mu mwaka wa 1995. We n’umugabo we bafite umwana w’umuhungu n’umukobwa

Afite imyaka itandatu, yabonye Bibiliya y’abana. Imyaka myinshi nyuma y’aho, yamenye ko Imana ifite izina kandi yiyemeza kwiga Bibiliya n’Abahamya ba Yehova. Yabatijwe mu mwaka wa 2002

Ibyo yavuze

Umugabo wawe utari Umuhamya yakiriye ate ibyo ushinjwa?

igihe bazaga kudusaka, nagize ubwoba bwinshi ko ari bundakarire. Ubwo rero muriyumvisha ukuntu natangajwe no kubona ampobera maze akambwira ati: “Humura. Biragenda neza. Tuzafatanya kubyihanganira.” Ntiyiyumvishaga ukuntu abayobozi bantoteza. Kuba yari anshyigikiye byatumye numva ntuje. Ni nk’aho bari bantuye umutwaro uremereye nari nikoreye.

Ni iki cyashimishije umugabo wawe igihe yabonaga abavandimwe na bashiki bacu baza kugufasha?

Yehova yakoresheje abavandimwe na bashiki bacu maze baradufasha baduha ibyo twari dukeneye incuro zirenze imwe. Nanone batuzaniye ikarito irimo ibiribwa. Umugabo wanjye ntiyiyumvishaga ukuntu babikora n’impamvu ituma bitanga bakadufasha nta mafaranga turibubishyure. Numvaga ntewe ishema no kumubwira ko Yehova ari we utuma babikora. Kubera ko aba azi ibyo dukeneye kandi ko yita ku bagaragu be b’indahemuka.

Ubutwari no kwihangana abavandimwe na bashiki bacu bo mu Burusiya bagaragaza bituma batubera isoko y’umunezero.—1 Abatesalonike 2:20.

Hejuru (ibumoso ugana iburyo): Umuvandimwe Aleksey Arkhipov n’umugore we, Natalya; umuvandimwe Dmitriy Mikhaylov n’umugore we Yelena

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU