30 GICURASI 2023| YAHUJWE N’IGIHE KU ITARIKI YA 6 WERURWE 2024
U BURUSIYA

AMAKURU MASHYA—BACIWE AMANDE | Abavandimwe bo mu mujyi wa Teykovo bibanda cyane ku buryo Yehova abafasha

FUNGURA

Ku itariki ya 29 Werurwe 2024, urukiko rw’akarere ka Teykovskiy ruherereye mu ntara ya Ivanovo rwahamije icyaha umuvandimwe Sergey Galyamin, Anatoliy Lyamo, Vladimir Spivak na Aleksandr Vasichkin. Buri muvandimwe yaciwe amande. Vladimir yaciwe amande arenga 8.400.000 y’amafaranga y’u Rwanda, Sergey yaciwe arenga 9.100.000 naho Aleksandr na Anatoliy buri wese yaciwe amafaranga arenga 15.400.000.

Icyo twabavugaho

Sergey Galyamin

Igihe yavukiye: 1967 (Teykovo mu ntara ya Ivanovo)

Ibimuranga: Afite kompanyi idoda inkweto

Yashakanye na Lyudmila mu mwaka wa 1991. Bafite abakobwa batatu

Yashimishijwe cyane no kumenya izina ry’Imana. Uburyo bamwakiranye urugwiro igihe yajyaga mu materaniro y’Abahamya ba Yehova bwa mbere, byamwemeje ko yabonye idini ry’ukuri. Sergey yabatijwe mu mwaka 2001, Lyudmila we yabatijwe mu mwaka wa 2002

Ibyo yavuze

Ibintu bitoroshye wanyuzemo byakwigishije ayahe masomo?

Numva bwa mbere uburyo bavandimwe na bashiki bacu bafatwaga, byarandakaje. Kandi natangiye guhangayikishwa n’ibyo nari kuzahura na byo. Icyakora nibutse amagambo ari muri Zaburi 73:26, agira ati: “Umubiri wanjye n’umutima wanjye byacitse intege. Ariko Imana ni yo gitare cy’umutima wanjye.” Ibyo ni byo nari nkeneye. Namenye ko ntakwiriye kurakazwa n’ibintu bibi bishobora kubaho kuko nta cyo byamarira. Ikintu gikwiriye ngomba gukora ni ukurushaho kuba incuti ya Yehova no kumwishingikirizaho.

Anatoliy Lyamo

Igihe yavukiye: 1963 (Pogar mu ntara Bryansk)

Ibimuranga: Yakoze ibijyanye no kubaka imihanda yo munsi y’ubutaka

Yashakanye na Galina mu mwaka wa 1993. Bafite abana babiri n’abuzukuru babiri

Igihe yashakishaga ukuri yatewe inkunga n’uburyo Bibiliya irimo ibitekerezo bihuje n’ubwenge. Anatoliy yabatijwe mu mwaka wa 1995 naho Galina abatizwa mu mwaka wa 1997

Ibyo yavuze

Ni mu buhe buryo abavandimwe na bashiki bacu baguteye inkunga?

Nshimira cyane abavandimwe na bashiki bacu. Sinabona amagambo nakoresha nsobanura uburyo Yehova yabakoresheje kugira ngo amfashe. Mu gihe cy’iperereza nahuye n’ingorane nyinshi, ariko Yehova yitaye ku muryango wanjye akoresheje abavandimwe na bashiki bacu batugaragarije ineza. Nanone baje kunshyigikira mu rukiko kandi byabasabye ubutwari. Ikindi kandi buri munsi banyohererezaga ubutumwa bugufi bambwira ko njye n’umuryango wanjye batuzirikana mu masengesho yabo. Byanyigishije ko nanjye nkwiriye kujya nshaka uburyo bwo gushyigikira abandi mu gihe bahanganye n’ibigeragezo.

Vladimir Spivak

Igihe yavukiye: 1955 (Litin muri Ukraine)

Ibimuranga: Mbere yo kuba Umuhamya wa Yehova yari umusirikare

Yashakanye na Nellie mu mwaka wa 1979. Nellie ni we watangiye kwiga Bibiliya bwa mbere. Mu mwaka wa 1992 bombi bajyiye mu ikoraniro ry’iminsi itatu ry’Abahamya ba Yehova. Vladimir yashimishijwe cyane n’ibyo yahabonye n’ibyo yahumvishe. Nellie yabatijwe mu mwaka wa 1994 naho Vladimir abatizwa mu mwaka wa 1997

Ibyo yavuze

Ni iki cyagufashije kudakomeza gucika intege?

Kimwe mu bintu nkumbuye ni ukujya mu makoraniro. Kutayajyamo n’ibindi bintu mbujijwe bishobora kunca intege. Icyakora nzi neza ko ntari njyenyine. Yehova n’abavandimwe na bashiki bacu baba biteguye kumfasha. Nizeye ntashidikanya ko buri gihe Yehova aba yiteguye kumfasha, kundinda no kunshyigikira mu bigeragezo byose mpura na byo.

Aleksandr Vasichkin

Igihe yavukiye: 1969 (Bryansk mu ntara ya Bryansk)

Ibimuranga: Mbere yo kuba Umuhamya wa Yehova yari umusirikare. Vuba aha yakoraga akazi ko kwita ku busitani

Yashakanye na Nataliya mu mwaka 1993. Bafite abana babiri

Yashimishijwe cyane n’uburyo igihe yajyaga mu materaniro y’Abahamya ba Yehova bamwakiranye urugwiro. We n’umugore we bombi batangiye kwiga Bibiliya. Nataliya yabatijwe mu mwaka wa 1994 naho Aleksandr abatizwa mu mwaka wa 1995

Ibyo yavuze

Ni iki cyagufashije kutibanda cyane ku bigeragezo wahuye na byo?

Naje kubona ko iyo ntangiye kwigirira impuhwe ari bwo ncika intege cyane. Aho gutekereza impamvu ibintu runaka biri kumbaho nibanda cyane ku nshingano mfite yo kubwira abandi ibyerekeye Yehova. Nanone nzirikana ko ibintu mba mpanganye na byo ari iby’akanya gato. Vuba ibyo bibazo byose bizashira. Gukomeza kuba indahemuka, bizamfasha kurushaho kuba incuti ya Yehova n’iy’abavandimwe na bashiki bacu.

Tuzi ko ibibazo twahura na byo uko byaba bingana kose muri iyi si, ari iby’igihe gito ubigereranyije n’imigisha y’iteka Yehova ahishiye abagaragu be b’indahemuka.—2 Abakorinto 4:17, 18.

Uko ibintu byagiye bikurikirana

Ku itariki ya 10 Mata 2020

Yakorewe dosiye
Ku itariki ya 11 Mata 2020

Urugo rwe bararusatse
Ku itariki ya 16 Mata 2020

Yabujijwe kuva mu gace atuyemo
Ku itariki ya 2 Gashyantare 2023

Ni bwo urubanza rwe rwatangiye

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU