23 UKUBOZA 2022
U BURUSIYA

AMAKURU MASHYA—BAGABANYIRIJWE AMANDE | Bizeye ko Yehova azabafasha

FUNGURA

Ku itariki ya 13 Gashyantare 2023, Urukiko rw’Ikirenga rwo muri repubulika ya Chuvash, rwagabanyije amande yari yaciwe mushiki wacu Nina Martynova na Zoya Pavlova. Bari baciwe amande angana n’amafaranga y’u Rwanda asaga 5.000.000 ruyagira asaga 1.000.000. Igifungo gisubitse Andrey Martynov na Mikhail Yermakov bari barakatiwe nticyahindutse.

Ku itariki ya 22 Ukuboza, urukiko rw’Akarere ka Alatyrskiy ko muri Repubulika ya Chuvash rwahamije icyaha Andrey, Nina, Zoya na Mikhail. Nina na Zoya baciwe amande arenga 5.000.000 z’amafanga y’u Rwanda naho Andrey na Mikhail bo, bakatirwa igifungo gisubitse cy’imyaka itandatu. Ntibizaba ngombwa ko bahita bajyanwa muri gereza.

Icyo twabavugaho

Andrey Martynov

Igihe yavukiye: 1964 (Barnaul, mu gace ka Altai)

Ibimuranga: Yakoraga akazi k’ubushoferi

Andrey na Nina batangiye kwigira Bibiliya hamwe mbere y’uko bashakana. Baje gushakana babatizwa mu mwaka wa 1992. Bafite abakobwa babiri

Ibyo yavuze

Ni iki cyagufashije gukomeza kwiringira Yehova?

Iyo mpanganye n’ibibazo nkumva mpangayitse cyane, nibuka ko Yehova ari we uyoboye umuryango we mpuzamahanga. Yehova ni inararibonye kundusha kandi afite ubwenge butagira akagero. Kimwe n’undi mubyeyi mwiza wese, na we aha amabwiriza abagize umuryango we, nanjye ndimo. Nishimira ayo mabwiriza aduha kandi nifuza gufata iya mbere mu kuyashyira mu bikorwa. Kubera ukuntu Yehova yamfashije kwihanganira ibibazo byo mu buryo bw’umubiri no mu buryo bw’ibyiyumvo nagize igihe bampataga ibibazo, binyizeza ko atazigera antererana. Ibyo byatumye ubucuti mfitanye na we burushaho gukomera.

Zoya Pavlova

Igihe yavukiye: 1965 (Ibresi, muri Repubulika ya Chuvash)

Ibimuranga: Yabaye imfubyi afite imyaka ibiri gusa. Mbere y’uko ajya mu kiruhuko cy’iza bukuru, yakoze mu bigo bishinzwe kuranga amazu

Yatangiye kwiga Bibiliya mu mwaka wa 2016. Kumenya ukuntu Yehova akunda abantu n’ukuntu yishyira mu mwanya wabo byamukoze ku mutima. Yabatijwe mu mwaka wa 2018

Ibyo yavuze

Ni gute wibonera ko Yehova agufasha?

Mu mizo ya mbere byarangoye cyane, by’umwihariko igihe batangiraga kumpata ibibazo. Icyakora, ubwo ni bwo natangiye kwibonera ubufasha buturutse kuri Yehova mu buryo bwihariye. Buri munsi aramfasha, haba mu buryo bw’ibyiyumvo no mu buryo bw’umwuka, nk’uko yabidusezeranyije muri Yesaya 41:10. Nanone nshimira cyane umugabo n’umugore we bamfasha muri iki gihe. Nubwo bahanganye n’ibibazo byabo bwite kandi bakaba babakoraho iperereza kimwe nanjye, buri cyumweru bantumira muri gahunda y’iby’umwuka mu muryango. Buri gihe iyo duhuye bantera inkunga. Nubwo nzi ko ibyo nzahura na byo mu gihe kiri imbere ari byo bikomeye, nizeye ntashidikanya ko nzakomeza kubyihanganira kubera ko Yehova ari kumwe nanjye.

Kuba hari abavandimwe na bashiki bacu bakomeje kuba indahemuka mu gihe cy’ibitotezo, byerekana ko natwe dushobora kwigirira ‘icyizere nk’intare’ igihe duhanganye n’ibigeragezo, kuko twizeye ko Yehova adukunda kandi adushyigikiye.—Imigani 28:1.

Uko ibintu byagiye bikurikirana

Ku itariki ya 23 Kamena 2021

Ingo nyinshi zo muri Alatyr zarasatswe
Ku itariki ya 28 Ukwakira 2021

Iperereza ryaratangiye ku muvandimwe Andrey bamushinja gutegura ibikorwa by’umuryango ushinjwa ubutagondwa. Yabujijwe kuva mu gace atuyemo
Ku itariki ya 25 Mata 2022

Andrey baramureze. Umugore we Nina na we bamugejeje imbere y’urukiko bamurega kwifatanya mu bikorwa by’umuryango ushinjwa ubutagondwa
Ku itariki ya 26 Mata 2022

Zoya na we yashyizwe muri urwo rubanza, bamurega kwifatanya mu bikorwa by’umuryango ushinjwa ubutagondwa
Ku itariki ya 28 Mata 2022

Mikhail na we yashyizwe muri urwo rubanza, bamurega gutegura ibikorwa by’umuryango ushinjwa ubutagondwa
Ku itariki ya 31 Kanama 2022

Urubanza rwaratangiye

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU