14 NZERI 2023 | YAHUJWE N’IGIHE KU ITARIKI YA 22 NZERI 2023
U BURUSIYA

AMAKURU MASHYA—BAHAMIJWE ICYAHA | Bashiki bacu batatu bakomezwa n’isengesho

FUNGURA

Ku itariki ya 21 Nzeri 2023, urukiko rw’akarere ka Zeya mu ntara ya Amur rwahamije icyaha mushiki wacu Margarita Moiseyenko, Galina Yatsik na Yelena Yatsyk kandi rwabakatiye igifungo gisubitse. Margarita yakatiwe imyaka itatu, Galina imyaka ibiri, naho Yelena imyaka ibiri n’igice. Ntibizaba ngombwa ko bajyanwa muri gereza.

Icyo twabavugaho

Margarita Moiseyenko

Igihe yavukiye: 1978 (Krasnoyarsk mu ntara ya Krasnoyarsk)

Ibimuranga: Akora akazi ko kudoda. Yashakanye na Konstantin mu mwaka wa 1998. Konstantin yahamijwe icyaha ku itariki 14 Nyakanga 2021, maze akatirwa igifungo gisubitse cy’imyaka itandatu

Yatangiye kwiga Bibiliya afite imyaka 18, mwene wabo wa bugufi amaze gupfa. Yabatijwe mu mwaka wa 2001

Ibyo yavuze

Ni iki cyagufashije gukomeza kwihangana?

I Ndibuka ko mu ikoraniro ry’iminsi itatu ryo mu mwaka wa 2028, ryari rifite umutwe ugira utu: “Gira ubutwari,” badusomeye umurongo wo mu Migani 21:31. Uwo murongo gira uti: “Ifarashi itegurirwa umunsi w’urugamba, ariko Yehova ni we utanga agakiza.” Ubusanzwe ifarashi izwiho gutinya. Ubwo rero kugira ngo zitazagira ubwoba zigeze ku rugamba, ziba zigomba “gutegurwa neza” cyangwa gutozwa. Natwe ni uko tumeze. Ubusanzwe ntituvukana ukwizera n’ubutwari. Tuba tugomba kwitegura urugamba turiho turushaho kugira iyo mico myiza. Nabonye ko ibyo byatumye ndushaho kuba incuti ya Yehova, ndushaho kujya niyigisha mu buryo bwimbitse kandi ngasenga nsaba ko uko ibintu byagenda kose ukwizera kwa njye kutahungabana.

Galina Yatsik a

Igihe yavukiye: 1950 (Zeya)

Ibimuranga: Yakoze mu rwego rw’umujyi rushinzwe ubugenzuzi bw’ibiciro no kubibungabunga. Ubu ari muri pansiyo

Yashakanye na Valeriy mu mwaka wa 1971. Bafite umuhungu n’umukobwa. Umugabo we yapfuye mu mwuka wa 1995

Yakuze atemera Imana ariko nanone yahoraga yibaza inkomoko y’ubuzima. Yaje gutangira gusoma igazeti y’Umunara w’Umurinzi na Nimukanguke! no kujya mu materaniro. Yabonye ibimenyetso simusiga bimwemeza ko hariho Umuremyi. Yabatijwe mu mwaka wa 1994

Ibyo yavuze

Ibihe bitoroshye wanyuzemo byakwigishije iki ku birebana n’imbaraga z’isengesho?

Namenye ko ari iby’ingenzi cyane kuvuga isengesho niyo ryaba ari rigufi cyane, mu gihe umuntu ahuye n’ibintu bimutunguye. Byamfashije kumenya kwifata no gusubiza neza. Nanone nashimishijwe cyane no kumenya ko abandi basenga bansabira. Muri Yakobo 5:16 hagira hati: “Iyo umukiranutsi asenganye umwete, isengesho rye rigira imbaraga kubera ko risubizwa.” Niboneye ko amasengesho basenga bansabira, ari yo atuma nkomeza kugira amahoro yo mu mutima kandi singire ubwoba. Amasengesho yanjye n’ay’abandi ni nk’ubwato bumfasha kutarohama mu nyanja y’ibibazo byugarije iyi si.

Yelena Yatsyk b

Igihe yavukiye: 1972 (Zeya)

Ibimuranga: Akora akazi ko kudoda imyenda

Yashakanye Andrey mu mwaka wa 1994. Bafite umukobwa umwe

Mama wa Yelena na musaza we Yevgeniy Bitusov ni bo batangiye kwigana Bibiliya n’abahamya ba Yehova. Yelena yiboneyeko Bibiliya irimo inama z’ingirakamaro kandi ko kuzikurikiza bituma umuntu agira ubuzima bwiza. Yabatijwe mu mwuka 1997

Ibyo yavuze

Ibitotezo wahuye na byo byakugizeho izihe ngaruka?

Byatumye ndushaho kuba incuti y’Imana. Nsenga Yehova musaba ngo ampe gutuza kandi aransubiza, agatuma ngira amahoro yo mu mutima. Nanone narushijeho gushimira abavandimwe na bashiki bacu. Mpumurizwa n’uko buri gihe baba biteguye kumfasha. Rwose numva ndi mu muryango mugari. Ikindi kandi narushijeho gusenga nsabira abavandimwe na bashiki bacu bari muri gereza, kimwe na musaza wanjye Yevgeniy. Mbasengera buri munsi.

Ibyabaye kuri bashiki bacu bitwibutsa ko Yehova yumva amasengesho kandi ko azadufasha kugira imico myiza dukeneye kugira ngo tubashe gutsinda ibigeragezo.—1 Yohana 5:14.

Uko ibintu byagiye bikurikirana

Ku itariki ya 21 Werurwe2019

Basatse urugo rwa Moiseyenko
Ku itariki ya 13 Ukwakira 2020

Basatse urugo rwa Yelena n’urwa Galina
Ku itariki ya 22 Ugushyingo 2021

Bakorewe dosiye
Ku itariki ya 15 Gashyantare 2022

Babujijwe kuva mu gace batuyemo
Ku itariki ya 24 Mata 2023

Nibwo urubanza rwatangiye

a b Mushiki wacu Galina Yatsik na Yelena Yatsyk nta cyo bapfana.

Reba nanone

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU