17 UKWAKIRA 2022| YAHUJWE N’IGIHE KU ITARIKI YA 7 WERURWE 2024
U BURUSIYA

AMAKURU MASHYA—BAHAMIJWE ICYAHA | Urubanza rw’Abahamya cumi na batatu bo mu karere ka Magadan rurakomeje

FUNGURA

Ku itariki ya 6 Werurwe 2024, urukiko rw’umujyi wa Magadan ruherereye mu ntara ya Magadan rwahamije icyaha abavandimwe na bashiki bacu bakurikira: umuvandimwe Sergey Agadzhanov, Lyubov Asatryan, Galina Dergacheva, Inna Kardakova, Irina Khvostova, Galina Pechko, Konstantin Petrov, Ivan Puyda, Viktor Revyakin, Mikhail Solntsev, Oksana Solntseva, Sergey Yerkin, na Yevgeniy Zyablov.

Sergey Agadzhanov, Lyubov, Galina Dergacheva, Inna, Irina, Galina Pechko, Viktor, Mikhail na Oksana buri wese muri bo yakatiwe igifungo gisubitse cy’imyaka itatu. Yevgeniy we yakatiwe igifungo gisubitse cy’imyaka itanu. Konstantin, Ivan na Sergey Yerkin bo bakatiwe igifungo gisubitse cy’imyaka irindwi. Ntibiziba ngombwa ko bajyanwa muri gereza.

Uko ibintu byagiye bikurikirana

Ku itariki ya 30 Gicurasi 2018

Urukiko rwatangiye gukurikirana Ivan, Konstantin, Sergey Yerkin na Yevgeniy rubashinja gutegura ibikorwa by’umuryango ushinjwa ubutagondwa
Ku itariki ya 1 Kamena 2018

Abo bavandimwe bose uko ari bane babafunze by’agateganyo
Ku itariki ya 3 Kanama 2018

Konstantin bamuvanye aho yari afungiwe by’agateganyo bajya kumufungisha ijisho
Ku itariki ya 5 Ukwakira 2018

Ivan, Sergey Yerkin na Yevgeniy bavanywe aho bari bafungiwe by’agateganyo bajya kubafungisha ijisho
Ku itariki ya 20 Werurwe 2019

Urukiko rwatangiye gukurikirana Sergey Agadzhanov, Galina Dergacheva, Inna, Irina, Lyubov, Mikhail, Oksana, na Viktor. Bose bari babujijwe kugira aho bajya
Ku itariki ya 27 Werurwe 2019

Ivan, Konstantin, Sergey Yerkin na Yevgeniy babakuye aho bari bafungishijwe ijisho, ariko noneho bababuza kugira aho bajya
Ku itariki ya 1 Mata 2019

Ibirego byabo byose byahurijwe hamwe
Ku itariki ya 2 Werurwe 2021

Galina Pechko yabujijwe kugira aho ajya
Ku itariki ya 5 Werurwe 2021

Galina Pechko bamureze kwifatanya mu bikorwa by’umuryango ushinjwa ubutagondwa kandi ikirego cye bahise bagihuriza hamwe n’ibindi birego by’abavandimwe na bashiki bacu 12
Ku itariki ya 25 Mata 2022

Iburanisha ryaratangiye

Icyo twabavugaho

Lyubov Asatryan

Igihe yavukiye: 1951 (Ganja muri Azerubayijani)

Ibimuranga: Avuka mu muryango w’abana batandatu akaba ari umuhererezi. Yari umutekinisiye muri laboratwari y’ikigo gikora imiti

Buri gihe yahangayikishwaga n’ibikorwa by’urugomo yabonaga mu gace atuyemo. Igihe yigaga Bibiliya, yashimishijwe cyane no kumenya ko vuba aha Imana izakuraho ibikorwa byose by’urugomo. Uyu mushiki wacu yabatijwe mu mwaka wa 1991

Ibyo yavuze

Ni iki cyagufashije gukomeza gutuza?

Sinigeze nemera kuganzwa n’ubwoba, kubera ko nzi ko ubwoba bushobora gutuma nshidikanya. Nari nzi ko ngomba gufata ingamba zitajenjetse: gusenga buri gihe, kubwira Yehova uko niyumva nta cyo mukinze, nkamwishingikirazaho mu buryo bwuzuye, kandi nkiringira ko afite imbaraga zo kumfasha. Nari nzi ko ninkomeza gukora ibyo byose, bizashimisha Papa wo mu ijuru.—Imigani 27:11.

Inna Kardakova

Igihe yavukiye: 1980 (Blagoveshchensk mu gace ka Amur)

Ibimuranga: Akora mu nzu y’ibitabo

Ababyeyi be batangiye kwigana Bibiliya n’Abahamya ba Yehova igihe yari afite imyaka 15. Yabatijwe mu mwaka wa 1997

Ibyo yavuze

Gukurikiza amabwiriza y’umuryango wacu byagufashije bite?

Igihe numvaga bwa mbere ko mu gihugu cyacu batangiye gutoteza Abahamya ba Yehova siniyumvishaga ko nanjye byangeraho. Ariko hari amabwiriza menshi twahawe adusaba gusoma inyandiko zo mu bitabo byacu zari kudufasha kwitegura guhangana n’ibitotezo. Twahawe n’andi mabwiriza atwereka ingamba twashoboraga gufata. Ubu ndishimye cyane kuba narakurikije ayo mabwriza twahawe. Kubera ko noneho nari naramaze kwitegura ko nanjye bishobora kungeraho, nakomeje gutuza igihe bansakaga kandi bakampata ibibazo.

Viktor Revyakin

Igihe yavukiye: 1957 (Novosibirsk, mu gace ka Novosibirsk)

Ibimuranga: Yigisha ibijyanye n’imyitozo ngororamubiri

Yamenyanye n’Abahamya ba Yehova bwa mbere igihe yemeraga ubutumire bamuhaye akaza kwifatanya na bo kwizihiza urwibutso rw’urupfu rwa Yesu. Yabatijwe mu mwaka wa 2002

Yashakanye na Nataliya mu mwaka wa 2013

Ibyo yavuze

Ni iki kigufasha gukomeza kurangwa n’icyizere mu bigeragezo uhanganye na byo?

Ngerageza gukomeza gukorana ishyaka umurimo w’Umwami, ngashyikirana n’abavandimwe na bashiki bacu kandi ngatekereza ku ngero z’abantu bavugwa muri Bibiliya babaye indahemuka. Nanone nzi ko kuba ngerwaho n’ibintu bishobora kunca intege, bituma ndushaho kwihangana kandi nkagira n’indi mico iranga Abakristo. Ubu kwegera Yehova ni byo by’ingenzi kuri njye kandi mbona ubucuti mfitanye na we bwararushijeho gukomera.

Mikhail Solntsev

Igihe yavukiye: 1962 (Novosibirsk, mu karere ka Novosibirsk)

Ibimuranga: Yari umugenzuzi w’iby’ingendo zo mu kirere akaba yaranahuguraga abantu

Yashakanye na Oksana mu mwaka wa 1988

Igihe yatangiraga kwiga Bibiliya, yatangajwe no kubona ko ibiyikubiyemo bihuje n’ubwenge. Yabatijwe mu mwaka wa 2013

Ibyo yavuze

Ni ayahe magambo atera inkunga yagufashije?

Nibuka amagambo umuvandimwe yambwiye njye n’umugore wanjye. Yatubajije niba twari dufite ubwoba. Twamushubije ko muri icyo gihe Yehova yatumye dutuza. Nanone yatwibukije ko icyo Satani n’abadayimoni be baba bifuza ari ukudutera ubwoba. Icyakora nitwirinda gushya ubwoba mu gihe duhanganye n’ibitotezo ni bwo tuzabasha kubitsinda. Nkunda cyane amagambo yo muri Yesaya 44:8 agira ati: “Ntimutinye kandi ntimutangare . . . Muri abahamya banjye.”

Twishimira kubona abavandimwe na bashiki bacu bakomeza kurangwa n’ibyishimo nubwo ‘babatuka babahora izina rya Kristo, kuko umwuka w’Imana uri kuri bo.’—1 Petero 4:14.

a Nta magambo yavuzwe n’umuvandimwe Sergey Agadzhanov twashoboye kubona.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU