7 KAMENA 2022 | YAHUJWE N’IGIHE: 3 MATA 2023
U BURUSIYA

AMAKURU MASHYA—BAKATIWE IGIFUNGO | Kwiringira Yehova byafashije abavandimwe kwihangana

FUNGURA

Ku itariki ya31 Werurwe 2023, urukiko rwa Babushkinskiy rwo mu karere ka Moscow rwahamije icyaha umuvandimwe Ivan Chaykovskiy, Yuriy Chernyshev, Vitaliy Komarov, Sergey Shatalov na Vardan Zakaryan. Ivan, Yuriy, Vitaliy na Sergey baakatiwe igifungo cy’imyaka itandatu n’amezi atatu. Vardan yakatiwe igifungo cy’imyaka ine n’amezi atatu. Bahise bajyanwa muri gereza bakiva mu rukiko.

Uko ibintu byagiye bikurikirana

Ku itariki ya 24 Ugushyingo 2020

Abayobozi b’u Burusiya bagabye ibitero nibura ku ngo 20 z’Abahamya ba Yehova bo mu mujyi wa Moscow. Abapolisi bafashe Ivan, Yuriy, Vitaliy na Sergey bajya kubafunga by’agateganyo kandi bafungirwa muri kasho yihariye. Igihe Yuriy n’umuryango we babasakaga kandi bakabahata ibibazo hafashwe amashusho, yaje kwerekanwa mu makuru yo kuri televiziyo
Ku itariki ya 26 Ugushyingo 2020

Sergey yarafunguwe ava muri kasho afungishwa ijisho. Vardan wari mu bitaro kubera ko yakomeretse igihe babasakaga, na we yafunzwe by’agateganyo, ariko ashyirwa muri kasho ya wenyine
Ku itariki ya 27 Ugushyingo 2020

Urukiko rwategetse ko Ivan, Yuriy na Vitaliy barekurwa bagafungishwa ijisho
Ku itariki ya 30 Ugushyingo 2020

Vardan yavuye muri kasho, afungishwa ijisho, nyuma yaho yohereje ikirego cye mu bushinjacyaha avuga ko yarenganyijwe
Ku itariki ya 16 Gashyantare 2022

Urubanza ni bwo rwatangiye

Icyo twabavugaho

Vitaliy Komarov

Igihe yavukiye: 1976 (i Moscow)

Ibimuranga: Yabaye umuyobozi mu kigo cy’itangazamakuru cy’i Moscow. Akunda korora inzuki

Yashakanye na Yelena mu mwaka wa 1999. Kubona ukuntu ubuhanuzi bwo muri Bibiliya bugenda busohora, byatumye yemera ko ibyo ivuga ari ukuri . Yabatijwe mu mwaka wa 2003

Ibyo yavuze

Ni irihe somo wigiye muri ibi bigeragezo?

Mbere y’uko mfungwa nari nararebye videwo ifite umutwe uvuga ngo: Ibibazo urubyiruko rwibaza—Ni iki nteganya kuzakora? Nakunze cyane igice kigaragaza umuvandimwe ugeze mu zabukuru abwira umuvandimwe ukiri muto amasomo yigiye mu kigo cyakoranyirizwagamo imfungwa igihe yari afunzwe. Ntiyari akeneye ibintu byinshi. Uretse gusa isahane n’ikiyiko kugira ngo arye abashe kubaho. Igihe nari maze iminsi ibiri mfunzwe niboneye ko ibyo byari ukuri. Niriwe mu rukiko kugeza ubwo nasubiye kuri gereza saa tatu z’ijoro. Naherukaga kurya nijoro.Uwo twari dufunganywe yantije igikombe kugira ngo nsabe abacungagereza bampe amazi ashyushye nkore icyayi. Nahise nibuka ya videwo narebye. Muri icyo gihe, igikombe cy’icyayi ni cyo cyari gifite agaciro kuruta imodoka cyangwa telefone ihenze kandi mbere najyaga mvuga ko nta cyo nageraho nta bifite.

Sergey Shatalov

Igihe yavukiye: 1969 (i Stavropo, mu gace ka Stavropol)

Ibimuranga: Akiri muto yakundaga umukino wa esheki, tenisi yo ku meza na vole. Yabaye umusirikare ari naho yavanye ubumuga afite. Akora ibijyanye no kohereza ibintu

We na Yelena bashakanye mu mwaka wa 1995, babatijwe nyuma gato muri uwo mwaka

Ibyo yavuze

Ni iki cyatumaga wizera ko Yehova azakomeza kugufasha kwihanganira ibi ibigeragezo?

Nzi neza ko Yehova yumva amasengesho yose abagaragu be bo hirya no hino basenga bansabira. Icyo cyizere ntigishingiye gusa ku bumenyi bwo muri Bibiliya ahubwo kinashingira ku mahoro n’ibyishimo Yehova yampaye.

Ni iki wasenze usaba by’umwihariko kandi se bigufasha bite?

Kenshi nasenze Yehova musaba kumpa kugira ubutwari nk’intare. Ibyo byari kumfasha kudatinya umuntu cyangwa ikintu cyari kumbaho. Nanone nasengaga nsabira abavandimwe bari muri gereza, imiryango yabo ndetse n’abandi, nubwo batari muri gereza ariko bahura n’ibibazo bibakomereye nkanjye.

Duterwa inkunga no kubona ukuntu Yehova akomeje kuba hafi y’abavandimwe bacu n’imiryango yabo mu gihe nabo bakomeza kumwegera.—Yakobo 4:8.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU