20 GICURASI 2022 | YAHUJWE N’IGIHE KU ITARIKI YA 17 UKWAKIRA 2023
U BURUSIYA

AMAKURU MASHYA—BAKATIWE IGIFUNGO | Yehova yafashije imiryango myinshi kwihanganira ibitotezo

FUNGURA

Ku itariki ya 13 Ukwakira 2023, urukiko rw’akarere ka Sovietskiy rwo mu mugi Oryol rwahamije icyaha umuvandimwe Vladimir Melnik, Vladimir Piskarev na Artur Putintsev. Buri wese yakatiwe igifungo cy’imyaka itandatu. Bose bafunzwe guhera mu Kuboza 2020 kandi bazaguma muri gereza.

Uko ibintu byagiye bikurikirana

Ku itariki ya 8 Ukuboza 2020

Urubanza rwa Melnik, Piskarev na Putintsev rwaratangiye
Ku itariki ya 9 Ukuboza 2020

Abategetsi bagiye gusaka amazu umunani y’Abahamya ba Yehova bo mu mugi wa Oryol, harimo n’amazu y’abo bavandimwe batatu. Babajyanye mu kigo bafungirwamo by’agateganyo
Ku itariki ya 11 Ukuboza 2020

Umuvandimwe Melnik na Piskarev bafunzwe by’agateganyo
Ku itariki 14 Ukuboza 2020

Umuvandimwe Putintsev yafunzwe by’agateganyo
Ku itariki ya 19 Mutarama 2021

Abayobozi bamenyeshejwe ko umuvandimwe Piskarev agomba kujya kwa muganga byihutirwa ariko banga kumuha uruhushya rwo kujya kwivuza
Ku itariki ya 21 Mutarama 2021

Umuvandimwe Piskarev bamwemereye kwakira imiti umugore we yari azanye ariko banga ko ajya kubonana na muganga
Ku itariki ya 24 Kamena 2021

Umuvandimwe Piskarev yagiye kwa muganga bamubwira ko yaturitse agatsi ko mu bwonko. Bamushubije muri cya kigo akomeza gufungwa n’ubwo byari byagaragaye ko arembye
Ku itariki ya 29 Ukwakira 2021

Abo bavandimwe bashinjwe icyaha cyo kuba mu muryango ukora ibikorwa by’ubutagondwa
Ku itariki ya 31 Mutarama 2022

Urubanza rwaratangiye

Icyo twabavugaho

Vladimir Melnik

Igihe yavukiye: 1965 (Donetsk, Ukraine)

Ibimuranga: Yabanje kuba umusirikare. Nanone yabaye injenyeri

Mu mwaka wa 1987 yashakanye na Irina. Babyaranye abana batatu b’abakobwa. Umuhungu we yapfuye mu mwaka wa 1991

Yakuze atemera Imana. We n’umugore batangiye gukunda Bibiliya igihe bigaga ibijyanye n’ubuzima bwa Yesu. Yabatijwe mu mwaka wa 1992

Ibyo umugore wa Vladimir witwa Irina yavuze a

Ni gute Vladimir yafashije abandi bari bafunganywe?

Vladimir yakomeje kwita ku muryango we mu buryo bw’umwuka akatwitaho nge n’abakobwa bacu atwandikira amabaruwa. Yatwandikiraga ibisigo, agakoresha imigani, ingero, inkuru zo muri Bibiliya n’ibindi.

Hari n’umuntu bari bafunganywe yigishije Bibiliya. . . . Kuva icyo gihe yagiye afungirwa mu migi itandukanye. Vladimir yavuze ko aho ageze hose agenda abwiriza abo bafunganywe.

Vladimir Piskarev

Igihe yavukiye: 1956 (Karpinsk mu ntara ya Sverdlovsk)

Ibimuranga: Yabaye enjeniyeri. Yashakanye na Tatyana mu mwaka wa 1976. Bafite umwana w’umuhungu n’uw’umukobwa. Kumenya ukuri ku byerekeye Yesu byatumye we n’umugore we batangira kwigana Bibiliya n’Abahamya ba Yehova. Yabatijwe mu mwaka wa 1995

Ibyo umugore wa Vladimir witwa Tatyana yavuze b

Ni iki cyafashije umugabo wawe kwihangana igihe yari afunze?

Vladimir yavuze ko ari imigisha kandi ko guhura n’abantu bamubaza ibibazo byinshi bimutera inkunga. Yaravuze ati “Nkunda guhugira mu murimo n’ubwo naba nywukorera muri gereza.” Uko byagenda kose aririmba indirimbo z’Ubwami. Akunda indirimbo ivuga ngo “Tuzakomeza kwihangana.” Bikomeza ukwizera kwe kandi bituma akomeza kubera Yehova indahemuka. Yagiye anyandikira kenshi amagambo yo muri iyo ndirimbo agira ati: “Tuzakomeza kwihangana./Nitwihangana kandi tukizera./Urukundo rw’Imana./ Ruzatuma dushikama rwose.”

Artur Putintsev

Igihe yavukiye: 1970 (Chita mu gace ka Trans-Baikal)

Ibimuranga: Ni we mukuru mu bana batandatu. Yakoze akazi kajyanye n’amashanyarazi, ubworozi kandi yatwaye tagisi. Yashakanye na Lyudmila mu mwaka wa 1993. Yabatijwe mu mwaka wa 2005

Ibyavuzwe n’umugore wa Artur Lyudmila c

Ese hari igihe wibuka Yehova yagufashije mu buryo bwihariye?

Igihe umugabo wange yafatwaga agafungwa, abaporisi batwaye ibikoresho byacu byose bya eregitoronike harimo na terefone. Nari ngenyine [kandi nta muntu nashoboraga kuvugisha]. Nari mbabaye cyane kandi nasabye Yehova kugira ngo amfashe. Namusabye ko yamfasha nkabona uko mvugana n’abavandimwe kugira ngo mbabwire ibyari byatubayeho. Imodoka yatwaye Artur imaze kugenda abavandimwe bahise bahagera. Baduteye inkunga kandi bampaye terefone. Uwo mwaka wose ntibantereranye kandi n’ubu bakomeje kunyitaho. Nzi neza ko Yehova azasubiza amasengesho yacu mu gihe gikwiriye kandi ko azi uko niyumva.

Nubwo abagize imiryango batari kumwe, duhumurizwa n’uko nta cyadutandukanya n’urukundo rw’Imana kandi ko izakomeza kuturinda.—Abaroma 8:38, 39.

a b c Ntitwabonye uko tuvugana na Melnik, Piskarev, na Putintsev kubera ko igihe iyi nkuru yakorwaga bari bafunzwe by’agateganyo.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU