8 MATA 2024 | YAHUJWE N’IGIHE KU ITARIKI YA 1 NYAKANGA 2024
U BURUSIYA

AMAKURU MASHYA—BARAKATIWE |Biboneye ukuntu Yehova yabitayeho igihe bari bafunzwe

FUNGURA

Ku itariki ya 26 Kamena 2024, urukiko rw’umujyi wa Novocherkassk mu gace ka Rostov, rwahamije icyaha mushiki wacu Lyubov Galitsyna n’umuvandimwe Garegin Khachaturyan na Gevorg Yeritsyan. Lyubov yakatiwe igifungo cy’imyaka ibiri n’amezi atatu, ariko basanze yari yarayifunzwe by’agateganyo. Ubwo rero ntibizaba ngombwa ko ajyanwa muri gereza. Garegin we yakatiwe imyaka itandatu n’amezi atandatu na ho Gevorg akatirwa imyaka itandatu n’amezi abiri. Abo bavandimwe bombi bazaguma muri gereza.

Icyo twabavugaho

Lyubov Galitsyna

Igihe yavukiye: 1959 (Plastunovskaya, mu gace ka Krasnodar)

Ibimuranga: Yari umwenjeniyeri w’imashini zo mu nganda mbere y’uko ajya mu kiruhuko cy’izabukuru

Igihe yamenyaga ko abantu bazabaho iteka kandi batarwara, byatumye yifuza kwiga Bibiliya. Yabatijwe mu mwaka wa 1995

Umugabo we yapfuye mu mwaka wa 2015

Ibyo yavuze

Yehova yagufashije ate mu gihe cy’umwaka n’amezi ane wamaze ufunzwe by’agateganyo?

Gufungirwa hamwe n’abanywi b’ibiyobyabwenge, abajura n’abandi bantu baba bakoze ibyaha bikomeye ntibyanyoroheye. Akenshi haba hari ibintu bituma umuntu ahangayika. Nasengaga Yehova, ndetse hari n’igihe namaraga ijoro ryose musenga, mwinginga ngo anyereke icyo nakora muri iyo mimerere. Muri cyo gihe namaze mfunzwe by’agateganyo, nafunganywe n’abantu batandukanye barenga 25. Yehova yaramfashije, ngerageza kubana neza n’abo bantu bose. Nanone yamfashije gukoresha neza ibyo bihe, ntahura aho mfite intege nke kandi ndahakosora. Nishimiye kuba narabonye uburyo bwo kurushaho kugaragaza imico ya Gikristo.

Garegin Khachaturyan

Igihe Yavukiye: 1967 (Azerubayijani)

Ibimuranga: Yari umubaji. Yimukiye mu Burusiya mu mwaka wa 1995, avuye muri Polonye no mu Budage

Yakozwe ku mutima n’ukuntu ibintu Bibiliya yigisha ari ukuri ndetse n’ukuntu gukurikiza amahame yayo bifite akamaro. Yabatijwe mu mwaka wa 1994

Yashakanye na Kseniya mu mwaka wa 2008. Bafite umwana umwe w’umuhungu

Ibyo Kseniya umugore wa Garegin yavuze a

Ni iki cyagufashije kwihangana wowe n’umugabo wawe?

Garegin yaranyandikiye ati: “Nshimira Yehova cyane, kubera ukuntu amfasha. Amabaruwa incuti zo mu itorero zagiye zinyandikira arimo amagambo ashingiye kuri Bibiliya arampumuriza. Kandi kumenya ko bakwitaho na byo byamfashije gutuza. Numva nararushijeho kwegera Yehova kuruta mbere hose.” Nanjye nemeranya na Garegin. Twembi twumva twararushijeho kwegera Yehova, kandi twarushijeho kwibonera ukuntu Yehova adufasha mu buzima bwacu.

Twizeye ko nubwo abaturwanya batugirira nabi kandi bakatubabaza, Yehova azakomeza guha imigisha abagaragu be b’indahemuka kandi iyo nabi azayinduramo ibyiza.—Intangiriro 50:20.

Uko ibintu byagiye bikurikirana

Ku itariki ya 11 Kanama 2022

Lyubov, Garegin na Gevorg batangiye gukurikiranwaho icyaha. Ingo zabo zarasatswe. Garegin na Gevorg bajyanywe muri kasho
Ku itariki ya 12 Kanama 2022

Garegin na Gevorg baje gufungwa by’agateganyo
Ku itariki ya 16 Kanama 2022

Lyubov yajyanywe muri kasho
Ku itariki ya 17 Kanama 2022

Lyubov yafunzwe by’agateganyo
Ku itariki ya 20 Nzeri 2023

Ni bwo urubanza rwatangiye
Ku itariki ya 25 Ukuboza 2023

Lyubov yavanywe muri gereza, ariko afungirwa iwe

a b Igihe iyi nkuru yategurwaga umuvandimwe Khachaturyan na Yeritsyan bari bafunzwe by’agateganyo kandi byatumye tutabona uko tugira icyo tubabaza.

Reba nanone

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU