6 GICURASI 2024 | BYAHUJWE N’IGIHE KU ITARIKI YA 11 NYAKANGA 2024
U BURUSIYA

AMAKURU MASHYA—BARAKATIWE | “Yehova adufasha kwihanganira ibibazo uko byaba bimeze kose”

FUNGURA

Ku itariki ya 10 Nyakanga 2024, urukiko rw’akarere ka Khorolskiy ruherereye mu gace ka Primorye rwahamije icyaha umuvandimwe Boris Andreyev, Anatoliy Li na mushiki wacu Nataliya Sharapova. Boris yakatiwe imyaka itandatu, Anatoliy akatirwa imyaka itandatu n’amezi atandatu naho Nataliya akatirwa imyaka itatu. Bose bari basanzwe bafunzwe by’agatenganyo kandi bazakomeza gufungwa.

Icyo twabavugaho

Boris Andreyev

Igihe yavukiye: 1951 (Monastyrishche, mu gace ka Primorye)

Ibimuranga: Yakoraga mu bijyanye n’ubutabazi

Yemeye ukuri amaze kubona ibisubizo Bibiliya itanga ku bibazo yibazaga. Yabatijwe mu mwaka wa 2004

Yashakanye na Aleksandra mu mwaka wa 2020

Ibyo Aleksandra a, umugore wa Boris yavuze

Umugabo wawe yagufashije ate kwihangana muri ibi bihe bitoroshye?

Nibuka ko hari umunsi wangoye cyane igihe umugabo wanjye Boris yari yarafunzwe. Icyo gihe numvise ncitse intege, ngira agahinda maze ntangira kurira cyane. Namwandikiye ibaruwa mubwira ibyambayeho n’uko niyumvaga. Yanshubije ampumuriza, ambwira ko yiyumvisha uko merewe. Icyakora ikintu cy’ingenzi yakoze, ni uko yanyibukije ibibazo byose twahuye na byo n’uburyo Yehova yadufashije tukabisohokamo neza. Ibyo ni byo nari nkeneye rwose, kandi ibyo byatumye ndushaho kwizera ko Yehova atazigera adutererana.

Anatoliy Li

Igihe yavukiye: 1985 (Uzubekisitani)

Ibimuranga: Yagiye mu madini anyuranye, ariko ntiyamufasha kubona ibisubizo by’ibibazo yari afite. Amaze gutangira kwigana Bibiliya n’Abahamya ba Yehova, yashimishijwe n’ukuri ko muri Bibiliya yamenye. Yabatijwe mu mwaka wa 2010

Yashakanye na Raisa mu mwaka wa 2011

Ibyo Raisa b, umugore wa Anatoliy yavuze

Wowe n’umugabo wawe Yehova yabafashije ate?

Hashize igihe gito ari muri gereza ategereje kuburana, Anatoliy yambwiye ko yari ampangayikiye cyane kubera ko nabaga njyenyine. Mbere y’uko afungwa, buri munsi twasomeraga hamwe Bibiliya kandi tukanasengera hamwe. Icyakora, amaze kumenya ko Yehova yakoresheje abavandimwe bakamfasha kandi bakampa ibyo nari nkeneye, ntiyongeye guhangayika. Twembi twiboneye neza ko Yehova atwitaho kandi ko atazigera adutererana.

Nk’uko Yehova yasubije amasengesho ya Anatoliy, Boris na Nataliya, twiringiye tudashidikanya ko niduhura n’ibibazo, azaduha imbaraga zo kubyihanganira kandi agakomeza gusubiza amasengesho yacu.—Zaburi 20:1.

Uko ibintu byagiye bikurikirana

Ku itariki ya 28 Nyakanga 2022

Batangiye gukurikiranwa mu nkiko
Ku itariki ya 6 Ukwakira 2022

Ingo cumi n’ebyiri zo mu mudugudu wa Yaroslavsky zarasatswe, Boris na Nataliya bajyanwa muri kasho
Ku itariki ya 7 Ukwakira 2022

Boris na Nataliya bafunzwe by’agateganyo
Ku itariki ya 12 Ukwakira 2022

Anatoliy yajyanywe muri Kasho
Ku itariki ya 13 Ukwakira 2022

Anatoliy yafunzwe by’agateganyo
Ku itariki ya 5 Ukwakira 2023

Ni bwo urubanza rwatangiye

a b c Igihe twateguraga iyi nkuru, umuvandimwe Andreyev, Li na mushiki wacu Sharapova bari bafunzwe by’agateganyo kandi ntibyadukundiye kugira icyo tubabaza.

Reba nanone

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU