21 UKWAKIRA 2021 | AMAKURU MASHYA: 26 UKUBOZA 2022
U BURUSIYA

AMAKURU MASHYA—BONGEREWE IGIHANO | Abahamya bo mu Burusiya bakomeje kurangwa n’ibyishimo nubwo igifungo cyabo kigenda cyongerwa

FUNGURA

Ku itariki ya 22 Ukuboza 2022, urugereko rwa kane rw’Urukiko Rusesa Imanza rwakajije ibihano byahawe umuvandimwe Rustam Diarov, Sergey Klikunov na Yevgeniy Ivanov n’umugore we Olga. Umucamanza yategetse ko nibarangiza igifungo cyabo, bazaba batemerewe no gukomeza gutura mu gace ka Astrakhan. Abavandimwe na bashiki bacu bakurikiranye urubanza hifashishijwe.

Ku itariki ya 3 Werurwe 2022, urukiko rw’Intara ya Astrakhan rwasheshe ubujurire bw’umuvandimwe Rustam Diarov, Sergey Klikunov, Yevgeniy Ivanov n’umugore we Olga. Bose uko ari bane baracyafunzwe.

Uko ibintu byagiye bikurikirana

Ku itariki ya 25 Ukwakira 2021

Urukiko rw’akarere ka Trusovskiy mu gace ka Astrakhan rwakatiye igifungo Abahamya bane. Batatu muri bo ni abagabo bakatiwe igifungo k’imyaka umunani. Abo ni Rustam Diarov, Yevgeniy Ivanov na Sergey Klikunov. Naho umugore wa Ivanov, witwa Olga yakatiwe igifungo k’imyaka itatu n’amezi atandatu. Abo bavandimwe bari basanzwe bari muri gereza. Mushiki wacu Ivanova yahise ajyanwa muri kasho
Ku itariki ya 11 Kamena 2020

Umuvandimwe Rustam, Yevgeniy na Sergey bafunzwe by’agateganyo. Naho Olga yafungishijwe ijisho
Ku itariki ya 9 Kamena 2020

Abaporisi barenga 100 bigabije ingo 27 z’Abahamya ba Yehova bo mu mugi wa Astrakhan. Icyo gihe Rustam, Yevgeniy, Olga na Sergey bajyanywe gufungwa by’agateganyo
Ku itariki ya 8 Kamena 2020

Ni bwo Rustam, Yevgeniy, Olga na Sergey batangiye gukurikiranwaho ibyaha. Abo bavandimwe batatu bashinjwaga gutegura no gutera inkunga ibikorwa by’ubutagondwa. Naho mushiki wacu Olga yashinjwe kwifatanya mu bikorwa by’ubutagondwa

Icyo twabavugaho

Olga Ivanova

Igihe yavukiye: 1982 (Volzhsky, mu gace ka Volgograd)

Ibimuranga: Akiri umwana yize gucuranga icyuma cy’umuziki. Yize indimi kandi nyuma aza kwigisha Icyongereza

Akiri muto yatinyaga urupfu. Igihe Olga yari umwangavu, nyina yatangiye kwigana Bibiliya n’Abahamya ba Yehova, nuko na we atangira kwigisha Bibiliya Olga. Yabatijwe mu mwaka wa 1997

Ibyo yavuze

Ni iki cyatumye udacika intege igihe bagutandukanyaga n’umugabo wawe?

Urugero Yehova na Yesu batanze rwamfashije kwihangana. Yehova yamaze imyaka irenga 33 atari kumwe n’inshuti ye Yesu, kubera ko byari kugirira akamaro abantu bose nange ndimo. Umugabo wange n’inshuti yange magara kandi rwose ndamukumbuye. Ariko twe ntituramara igihe kirekire tutari kumwe nk’icyo [Yehova na Yesu bamaze]. Nizeye ntashidikanya ko tuzakomeza kwihangana, kubera ko Yehova adushyigikiye.

Sergey Klikunov

Igihe yavukiye: 1975 (Astrakhan)

Ibimuranga: Mbere y’uko afungwa by’agateganyo yakoraga akazi ko gusudira. We n’umugore we Irina, batangiriye kwiga Bibibliya igihe kimwe. Amahame yo muri Bibiliya yamufashije kureka itabi. Yabatijwe mu mwaka wa 2007. Bafite abakobwa babiri. Akunda kuroba no gucuranga gitari

Ibyo yavuze

Ni iki cyagufashije gukomeza kuba indahemuka uri muri gereza?

Kuva nafungwa narushijeho guha agaciro impano y’isengesho. Isengesho riramfasha cyane. Maze amezi atandatu mfungiwe muri kasho ya ngenyine. Birumvikana ko bitoroshye ariko isengesho rimfasha kwihanganira ibintu byose. Iyo numva ibintu bindenze, ndapfukama nkabwira Yehova ibindi ku mutima byose. Iyo maze gusenga numva mpumurijwe kandi nkagira amahoro, maze nkamererwa neza. Birashishikaje kubona ukuntu Yehova adufasha mu gihe tubikeneye. Nta bwoba ngira kuko mwiringira cyane.

Bidutera inkunga cyane kumenya ko buri gihe Yehova aba ari hafi y’abagaragu be b’indahemuka mu gihe batotezwa.—Zaburi 139:5, 10.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU