5 UGUSHYINGO 2021
U BURUSIYA

AMAKURU MASHYA | Gahunda zo gusenga Yehova zihoraho zifasha umuvandimwe Aleksey Yershov kudacika intege

FUNGURA

Ku itariki ya 7 Mata 2022, urukiko rw’intara ya Tomsk rwahinduye igifungo cyari cyarahawe umuvandimwe Aleksey Yershov. Rwamuhaye igifungo gisubitse cy’imyaka itatu. Yahise afungurwa.

Ku itariki ya 19 Mutarama 2022, urukiko rw’umugi wa Severskiy mu gace ka Tomsk rwahamije icyaha Aleksey kandi rumukatira igifungo cy’imyaka itatu. Yahise ajyanwa muri gereza

Uko ibintu byagiye bikurikirana

Ku itariki ya 22 Kamena 2021

Dosiye yo kumurega yashyikirijwe urukiko rw’umugi wa Severskiy mu gace ka Tomsk
Ku itariki ya 30 Werurwe 2021

Aleksey yashinjwe ibirego hashingiwe ku mavidewo yafashwe n’umuntu wiyoberanyije akigira nk’ushimishijwe no kwiga Bibiliya mu gihe kirenga umwaka
Ku itariki ya 14 Nyakanga 2020

Abapolisi bo mu rwego rushinzwe ubutasi na komite ishinzwe iperereza bigabije urugo rwa Aleksey bararusaka mu gihe kigera ku masaha arindwi. Abo bapolisi bafatiriye amakarita yo muri banki, ibikoresho bya elegitoronike, Bibiliya, pasiporo n’akuma gatanga interineti

Icyo twamuvugaho

Aleksey Yershov

Igihe yavukiye: 1953 Seversk (Mu gace ka Tomsk)

Ibimuranga: Papa we yapfuye mu mwaka Aleksey yavutsemo. Yarezwe na mama we. Yize mu mashuri y’imyuga kandi yabaye injenyeri

Yashakanye na Lyudmila mu mwaka wa 1976. Bafite abana babiri bakuze

Igihe umwe mu banyeshuri yigishaga yamutumiraga mu materaniro y’Abahamya ba Yehova, yifuje kwiga Bibiliya. Yashimishijwe n’ukuntu Bibiliya itanga inama nziza kandi ashimishwa n’ibyiringiro by’Ubwami bw’Imana. Yabatijwe mu mwaka wa 1994

Ibyo yavuze

Ni iki cyatumye urushaho gukunda Yehova igihe wari uhanganye n’ibigeragezo?

Njye n’umugore wanjye dukunda gusengera hamwe. Namenye ko ntari gushobora guhangana n’ibyo bigeragezo iyo Yehova atamfasha. Ibyo byatumye nkomeza gahunda yanjye yo kwiyigisha no gusoma Bibiliya buri munsi. Buri gitondo njye n’umugore wanjye tuganira ku isomo ry’umunsi kandi tugasengera hamwe.

Ni iki cyagufashije kudakomeza kumva ucitse intege?

Kwiyigisha bimfasha guhangana n’ikibazo cyo gucika intege. Ntekereza ku ngero z’abagaragu ba Yehova ba kera babaye indahemuka. Hari inkuru nyinshi zo muri Bibiliya zigaragaza ko ari iby’ingenzi gukomeza gutuza no kwiringira Yehova. Kuzitekerezaho byatumye nsobanukirwa icyafashije abo bagaragu b’Imana gukomeza gutuza. Mu Byakozwe 5:29 hagira hati: “Tugomba kumvira Imana yo mutegetsi aho kumvira abantu.” Igihe Urukiko rw’Ikirenga rwa Kiyahudi rwabuzaga intumwa kubwiriza, izo ntumwa ntizahiye ubwoba. N’igihe zakubitwaga ntizahahamutse. Intumwa zari zizi ko Yehova azishyigikiye kandi ko yishimira ibyo zikora.

Gusoma Bibiliya buri munsi no gusenga bizakomeza gufasha no guhumuriza abavandimwe na bashiki bacu bo mu Burusiya. Muri Zaburi 9:9 hatwizeza ko “Yehova azaba igihome kirekire gikingira umuntu wese ufite intimba; azaba igihome kirekire mu bihe by’amakuba.”

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU