31 MUTARAMA 2022 | YAHUJWE N’IGIHE KU ITARIKI YA 27 WERURWE 2023
U BURUSIYA

AMAKURU MASHYA—IGIFUNGO CYE BARAKIGABANYIJE | Yehova akomeje guhumuriza no gutera inkunga mushiki wacu Lyudmila Salikova

FUNGURA

Ku itariki ya 23 Werurwe 2023, urukiko rw’intara ya Chelyabinsk rwatangaje umwanzuro w’urubanza rw’ubujurire bwa kabiri bwa Lyudmila Salikova. Urukiko rwagabanyije igifungo gisubitse cy’imyaka itandatu yari yarakatiwe rukigira imyaka ibiri n’igice. Ntibizaba ngombwa ko ajyanwa muri gereza.

Ku itariki ya 17 Werurwe 2022, urukiko rw’intara ya Chelyabinsk rwatesheje agaciro ubujurire bwa Lyudmila.

Ku itariki ya 20 Mutarama 2022, urukiko rw’umugi wa Snezhinsk ruri mu ntara ya Chelyabinsk rwahamije icyaha mushiki wacu Lyudmila Salikova kandi rumukatira igifungo gisubitse k’imyaka itandatu.

Uko ibintu byagiye bikurikirana

Mu Gushyingo 2020

Abaporisi bo mu mugi wa Snezhinsk basatse ingo enye z’Abahamya ba Yehova harimo n’urwa mushiki wacu Lyudmila. Abaporisi bagiye no gusaka aho akorera. Nyuma y’ibyo yahatiwe gusezera ku kazi ke
Ku itariki ya 26 Kanama 2021

Lyudmila yatangiye gukurikiranwa, ashinjwa icyaha cyo gutegura amateraniro y’idini ryahagaritswe no gutwara ibitabo byabuzanyijwe
Ku itariki ya 8 Ukuboza 2021

Ni bwo urubanza rwatangiye

Icyo twamuvugaho

Lyudmila Salikova

Igihe yavukiye: 1951 (Snezhinsk)

Ibimuranga: Yashatse mu mwaka wa 1971. Afite abahungu batatu. Umugabo we yapfuye mu mwaka wa 2009. Yakoze mu ruganda rw’ingufu z’amashanyarazi rwo mu mugi wa Snezhinsk. Akunda gutembera

Mukuru we yatangiye kwiga Bibiliya mu mwaka wa 1999. Nyuma y’amezi atandatu Lyudmila na we yatangiye kuyiga. Yasobanukiwe intego y’ubuzima amenya n’impamvu ku isi hari akarengane, urugomo n’intambara. Yabatijwe mu mwaka wa 2002

Ibyo yavuze

Ni mu buhe buryo iki kigeragezo cyatumye urushaho kuba inshuti ya Yehova?

Mbere y’uko ibi bibazo bitangira, nahoraga nisuzugura ntekereza ko Yehova atampa agaciro . . . Ariko nahinduye ibitekerezo, kandi ubu nemera ntashidikanya ko Yehova ampa agaciro. Kuba yaremeye ko ngira uruhare mu kweza izina rye imbere y’urukiko rw’umugi wa Snezhinsk, byanyemeje ko ankunda kandi ko amfitiye ikizere. Ibintu byose Yehova yemera ko bingeraho, mbona ko ari uburyo akoresha anyereke ko akimfitiye ikizere.

Ese hari ikintu giteye inkunga umuvandimwe cyangwa mushiki wacu yigeze kukubwira kikaba cyaragufashije kwihangana?

Mbere y’iburanisha rya mbere, numvaga mpangayitse cyane . . . Nasenze Yehova, ndamubwira nti: “. . . Ndakwinginze mpa umwuka wera. Mbigusabye rwose nkwinginga Yehova!” Nyuma y’igihe gito, hari mushiki wacu wanyoherereje ubutumwa, buvuga ngo: “. . . Iyo duhuye n’ikintu kigerageza ukwizera kwacu, dushobora kukigereranya n’imashini ifura. Kiratuzunguza kikatuzunguza inshuro nyinshi, cyarangiza kikatwunyuguza, ubundi kikadukamura. Iyo ibyo byose birangiye tugisohokamo dusa neza kandi turi beza kurusha mbere. Ibintu byose wahuye na byo, igihe abaporisi bazaga kugusaka, igihe bajyaga kuguhata ibibazo, iperereza ryose bagukozeho byarakuzunguje kandi biragukaraga. Ariko ibyo bihe byose wari uhangayitse kubera ibigeragezo, byatumye urushaho kugira agaciro kuri Yehova no kuri twe . . . Twiringiye rwose ko ejo mu gitondo utazaba uhagaze imbere y’urukiko gusa, ahubwo ko uzaba uri no mu maboko akomeye ya Yehova.” Numvise Yehova yabonye uko numvaga merewe maze akoresha uwo mushiki wacu kugira ngo anyereke ko ankunda.

Yehova akomeje guhumuriza no gutera inkunga abavandimwe na bashiki bacu bo mu Burusiya. Imana yacu idukunda itwizeza ko ‘icira urubanza imfubyi n’ushenjaguwe, maze umuntu buntu wo ku isi ntiyongere kubahindisha umushyitsi.’—Zaburi 10:18.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU