13 GASHYANTARE 2023 | YAHUJWE N’IGIHE KU ITARIKI YA 6 UGUSHYINGO 2023
U BURUSIYA

AMAKURU MASHYA—UBUJURIRE | Imiryango itatu yo mu gace ka Yaroslavl yahuye n’ibitotezo

FUNGURA

Ku itariki ya 30 Ukwakira 2023, urukiko rw’akarere ka Dzerzhinsky mu ntara ya Yaroslavl rwemeye ubujurire bw’umuvandimwe Pyotr Filiznov na Andrey Vyushin. Ariko imyanzuro rwafashe yari itandukanye. Igifungo gisubitse cy’imyaka itandatu n’igice Pyotr Filiznov yari yarakatiwe cyaragabanyijwe kigirwa imyaka ibiri n’igice. Naho igifungo cy’umuvandimwe Aleksandr Kuznetsov n’umugore we Mariya, cyo nticyahindutse.

K itariki ya 3 Kanama 2023, urukiko rw’akarere ka Dzerzhinsky ruri mu ntara ya Yaroslavl, rwahamije icyaha umuvandimwe Pyotr Filiznov; Aleksandr Kuznetsov n’umugore we, Mariya Kuznetsova n’umuvandimwe Andrey Vyushin. Buri wese yakatiwe igifungo gisubitse. Andrey na Pyotr bakatiwe igifungo gisubitse cy’imyaka itandatu n’igice. Aleksandr na Mariya bakatiwe igifungo gisubitse cy’imyaka ibiri n’igice. Ntibizaba ngombwa ko bajyanwa muri gereza.

Icyo twabavugaho

Aleksandr Kuznetsov

Igihe yavukiye: 1982 (Moscow mu ntara ya Moscow)

Ibimuranga: Yigishaga imibare n’Icyongereza

Yatangiye kwiga Bibiliya muri Mata 2000. Yashimishijwe cyane n’urukundo ruranga Abahamya ba Yehova. Yabatijwe mu mwaka wa 2002

Yashakanye na Mariya mu mwaka wa 2017. Amaze kurekurwa, kwa muganga bamusanzemo kanseri

Ibyo yavuze

Ni iki kigufasha gukomeza kugira ibyishimo nubwo uhanganye n’uburwayi n’ibitotezo?

Incuro nyinshi mba numva nacitse intege, ubundi nkumva ntari bushobore kwihangana. Ariko buri gihe Yehova ‘ancira akanzu’ (1 Abakorinto 10:13). Mfashwa no gusenga Yehova mubwira uko niyumva n’ibindi ku mutima. Kandi rimwe na rimwe hari igihe ndira ndi gusenga. Nanone kuririmba indirimbo zacu, kwiyigisha no gutekereza ku byiringiro byacu birankomeza. Njye n’umugore wanjye twihatira gutera inkunga abavandimwe na bashiki bacu. Ibyo bituma tutibanda cyane ku bibazo byacu. Ikiruta byose twishimira uburyo Yehova akoresha umwuka we wera akaduhumuriza kandi akaduha amahoro yo mu mutima tuba dukeneye.

Mariya Kuznetsova

Igihe yavukiye: 1988 (Sharypovo mu gace ka Krasnoyarsk)

Ibimuranga: Arikorera

Ababyeyi be ni Abahamya ba Yehova. Yashimishwaga no kwiyigisha ubuhanuzi bwo muri Bibiliya bituma abukunda cyane. Yabatijwe mu mwaka wa 2002

Yashakanye na Aleksandr mu mwaka wa 2017

Ibyo yavuze

Ni uwuhe murongo w’ibyanditswe waguteye inkunga mu buryo bwihariye?

Umwe mu mirongo nkunda cyane ni uwo mu Bakolosayi 1:11, ugira uti: “Mukomezwa n’imbaraga zose zihuje n’ubushobozi bwayo bw’ikuzo, kugira ngo mushobore kwihangana mu buryo bwuzuye kandi mwihanganire ingorane zose mufite ibyishimo.” Ibyambayeho byatumye ndushaho kwizera ko ni nishingikiriza kuri Yehova kandi nkamusenga musaba kumfasha atazananirwa kubikora. Ibikorwa bye birangwa n’urukundo rudahemuka ni byinshi kandi ntazareka kugaragariza imbabazi abagaragu be b’indahemuka.

Andrey Vyushin

Igihe yavukiye: 1975 (Yaroslavl mu ntara ya Yaroslavl)

Ibimuranga: Yarezwe na mama we na nyirakuru. Akora mu bijyanye no kwita kuri rezo za mudasobwa. Yita kuri mama we wamugaye

Yamenyanye n’Abahamya ba Yehova igihe incuti ye yatangiraga kwiga Bibiliya. Abahamya bamushubije ibibazo byose yibazaga kandi asanga bashyira mu bikorwa ibyo bigisha abandi. Yabatijwe mu mwaka wa 1995

Yashakanye na Anastasiya mu mwaka wa 2013. Bafite umukobwa umwe

Ibyo yavuze

Wowe n’umugore wawe ibyababayeho mwabikoresheje mute mutera inkunga abandi?

Njye n’umugore wanjye twatewe inkunga n’uburyo Dennis Christensen yihanganiye ibigeragezo yahuye na byo. Ari mu bantu ba mbere bafunzwe, icyakora yakomeje kwitwara neza. Urugero rwe rwatweretse ko natwe dushobora kumwigana. Ubu iyo duhuye n’abavandimwe na bashiki bacu bafite ubwoba, dukora uko dushoboye tukabatera inkunga kandi tukabizeza ko ibintu bidateye ubwoba nk’uko babitekereza. Twibutsa incuti zacu ko zidakwiriye gutekereza uko ibitotezo bazahura na byo bizaba bimeze ku ko icyo nta kindi byamara usibye gutuma bagira ubwoba. Ahubwo dukwiriye kubona ko ibitotezo duhura na byo ari uburyo bwiza bwo gukomeza kwizera kwacu.

Twizeye ko kimwe n’abo bagaragu bane ba Yehova b’indahemuka, dushobora kuba mu ‘biringira Yehova kandi badashobora kunyeganyezwa.’—Zaburi 125:1.

Uko ibintu byagiye bikurikirana

Ku itariki ya 13 Mata 2021

Abayobozi barangije gusaka ingo za bo, babafunze by’agateganyo
Ku itariki ya 15 Mata 2021

Boherejwe gufungwa by’agateganyo
Ku itariki ya 14 Nyakanga 2021

Baretse kubafunga by’agateganyo ahubwo bafungishwa ijisho
Ku itariki ya 9 Nzeri 2022

Nibwo urubanza rwatangiye

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU