15 KAMENA 2022 | YAHUJWE N’IGIHE: 23 UKUBOZA 2022
U BURUSIYA

AMAKURU MASHYA—UBUJURIRE | Mushiki wacu Galina Kobeleva yiyemeje kubwiriza mu rukiko

FUNGURA

Ku itariki ya 21Ukuboza 2022, urukiko rw’intara ya Primorye rwemereye mushiki wacu Galina Kobeleva kujurira. Ntibizaba ngombwa ko yishyura amafaranga asabwa n’urukiko. Igifungo gisubitse cy’imyaka itandatu yakatiwe kiracyubahirizwa.

Urukiko rw’akarere ka Lesozavodskiy mu ntara ya Primorye ruzatangaza umwanzuro w’urubanza ruregwamo mushiki wacu Galina Kobeleva. Ubushinjacyaha nta gihano buramusabira.

Uko ibintu byagiye bikurikirana

Ku itariki ya 12 Gicurasi 2020

Abapolisi bo mu ntara ya Primorye basatse ingo eshatu z’Abahamya ba Yehova, harimo n’urugo rwa mushiki wacu Galina. We n’umuhungu we witwa Sergey Kobelev babahase ibibazo kandi nyuma yaho batangira kubakoraho iperereza
Ku itariki ya 8 Werurwe 2021

Galina yatangiye gukurikiranwaho ibyaha. Yashinjwe kwifatanya mu bikorwa by’umuryango ukekwaho ubutagondwa
Ku itariki ya 7 Mata 2021

Yamenyeshejwe ko atemerewe kurenga agace atuyemo
Ku itariki ya 29 Ukwakira 2021

Ni bwo urubanza rwatangiye

Icyo twamuvugaho

Galina Kobeleva

Igihe yavukiye: 1956 (Verkhniye Mully, mu gace ka Perm)

Ibimuranga: Yakoze mu bijyanye no kugura no kugurisha. Akunda gukora ubusitani

Yamenye Abahamya ba Yehova bwa mbere kubera mama we. Urukundo yabonye hagati y’abavandimwe na bashiki bacu bo mu itorero rwatumye yemera adashidikanya ko yabonye ukuri. Yabatijwe mu mwaka wa 1998

Ibyo yavuze

Ni iki gituma ugira ubutwari bwo kubwiriza?

Njye mbona urukiko ari nk’ifasi yihariye nahawe. Numva Yehova na Yesu biteze ko igihe mba ndi mu rukiko mba ngomba kubavuganira.

Nanone, abavandimwe na bashiki bacu baranshyigikira buri gihe iyo ngiye mu rukiko. Nubwo mba ndi jyenyine mu rubanza, ariko nkomeza kumva ntari jyenyine kuko hari abantu banshyira mu masengesho yabo buri gihe.

Ni uwuhe murongo wo muri Bibiliya ugufasha kwihangana?

Umurongo nkunda cyane, ni uwo muri Yesaya 48:17, 18, ugira uti: “Jyewe Yehova ndi Imana yawe. Ni jye ukwigisha ibikugirira umumaro, nkakunyuza mu nzira ukwiriye kunyuramo.” . . . Nkunda gutekereza ku kamaro ko gukurikira inzira za Yehova n’ibyishimo byinshi umuntu agira iyo azigendeyemo. Dufite ibyiringiro byiza cyane by’ejo hazaza, aho tuzaba mu isi nshya ibintu byose bitunganye. Muri iki gihe dufite uburyo bwiza bwo kwibonera ko incuti yacu ikomeye ituri iruhande mu bigeragezo duhura na byo no gukomeza kuyegera. . . . Ubwo rero ndamutse ndetse inzira Yehova ansaba kunyura, n’ubundi nahura n’ibibazo. Ariko kugira ngo mpangane na byo nkeneye umpumuriza kandi umfasha by’ukuri.

Twishimira ko Yehova akomeje gushyira abagaragu be b’indahemuka nka Galina ahantu hari umutekano mu gihe bavuganira izina rye.—2 Samweli 22:18-21.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU