23 UKUBOZA 2021 | YAHUJWE N’IGIHE KU ITARIKI YA 29 KANAMA 2023
U BURUSIYA

AMAKURU MASHYA—UMUGABO N’UMUGORE BAHAMIJWE ICYAHA | Inyigisho Yehova adutegurira zituma umuryango wa Postnikov ugira amahoro

FUNGURA

Ku itariki ya 23 Kanama 2023, urukiko rw’akarere ka Birobidzhanskiy, mu gace kayoborwa n’Abayahudi, rwahamije icyaha umuvandimwe Oleg Postnikov na mushiki wacu Agnessa Postnikova. Oleg yakatiwe imyaka itanu n’igice y’igifungo gisubitse naho Agnessa akatirwa ine n’igice. Ntibizaba ngombwa ko bajya muri gereza.

Ku itariki ya 11 Ukwakira 2022, urukiko rw’intara rwo mu gace kayoborwa n’Abayahudi rwanze umwanzuro w’urubanza uvuga ko umuvandimwe Oleg Postnikov na mushiki wacu Agnessa Postnikova bahamwa n’icyaha. Urubanza rwabo ruzasubirwamo.

Ku itariki ya 25 Mata 2022, urukiko rw’akarere ka Birobidzhanskiy mu gace kayoborwa n’Abayahudi rwahamije ibyaha Oleg na Agnessa. Kandi umwe yakatiwe imyaka itanu n’igice y’igifungo gisubitse naho undi akatirwa itanu. Ntibizaba ngombwa ko bajya muri gereza.

Uko ibintu byagiye bikurikirana

Ku itariki ya 12 Gashyantare 2021

Abaporisi bo mu rwego rushinzwe ubutasi batangiye gukurikirana Agnessa. Abagize umuryango wa Postnikov bashinjwa gushinga itsinda “ry’abagizi ba nabi” no kwamamaza intego zaryo z’“ubutagondwa.” Oleg na Agnessa babujijwe kurenga agace batuyemo, konti zabo zo muri banki zarahagaritswe kandi n’amazina yabo yashyizwe ku rutonde rw’abantu bakora ibikorwa by’iterabwoba mu gihugu cy’u Burusiya
Ku itariki ya 12 Gashyantare 2020

Urwego rushinzwe ubutasi bwatangiye gukurikirana Oleg

Icyo twamuvugaho

Oleg Postnikov

Igihe yavukiye: 1965 (Vyazemsky, mu gace ka Khabarovsk)

Ibimuranga: Yakoze mu bijyanye n’amazi. Akiri muto yinjiye mu gatsiko k’abagizi ba nabi. Yafunzwe azira ibikorwa by’urugomo. Yamenye ukuri ari muri gereza. Amaze gufungurwa, yabatijwe mu mwaka wa 1986

Mu mwaka wa 1989, yashakanye na Agnessa kandi bafite abana babiri bakuru

Ibyo yavuze

Ni gute wamenyeye ukuri muri gereza?

Hari Umuhamya wari ufunzwe azira ko yanze kujya mu gisirikare, . . . Twamaze igihe tuganira ku birebana n’ibimenyetso bigaragaza ko Imana iriho n’ibigaragaza ko inyigisho y’ubwihindurize atari ukuri. Nanone twavuze ku birebana n’ukuntu ibintu biri mu isanzure bihambaye kandi bikoranywe ubuhanga buhanitse. Icyo kiganiro cyahinduye uko nabonaga ibintu. . . . Nyuma yaho nasomye ibitabo bitandukanye by’Abahamya ba Yehova. . . . Maze kurekurwa, nakomeje kwiga Bibiliya nyuma ndabatizwa.

Ni iki wize ku bijyanye no kwiringira Yehova?

Nasengaga kenshi, cyane cyane iyo nabaga ndi buhure n’ushinzwe iperereza. Igihe nabaga ndi kumwe n’ushinzwe iperereza, nabonye ko ubwenge bwanjye n’imbaraga zanjye gusa, bitari bihagije ngo nkomeze kubera Yehova indahemuka, kubera ko bantegaga imitego ngo nihakane ukwizera kwanjye. Nasobanukiwe ko kugira ngo nkomeze gutuza no kugira icyizere, nari nkeneye kurushaho kwiringira Yehova cyane aho guhangayikishwa n’ibiri bube.

Ese haba hari umurongo w’Ibyanditswe ugutera inkunga?

Kenshi nkunda kwibuka amagambo ari muri Yosuwa 1:9 agira ati: “Yehova Imana yawe ari kumwe nawe aho uzajya hose.” Ibyo binyibutsa ko nshobora kujya ahantu ntifuzaga kujya. Icyakora ni nk’aho Yehova ampumuriza, akambwira ati: ‘Nzaba ndi kumwe na we aho uzajya hose, ntutinye. Nk’uko nabanye n’[abagabo b’indahemuka] nka Yozefu, nzabana nawe.’ Ibyo bimfasha kudahangayikira ibizaba ejo. Nanone byamfashije kudatekereza cyane ku bintu binca intege.

Agnessa Postnikova

Igihe yavukiye: 1963 (Kazakisitani)

Ibimuranga: Ni umwana wa gatanu mu bana barindwi. Akiri muto yakundaga kubyina no gukina ikinamico. Nanone akunda guserebeka ku rubura no gukora siporo yo ku rubura. Ubu akunda kuba ari mu rugo, kwita ku ndabo no kuzamuka imisozi. Akora mu iduka ridoda imyenda

Yabatijwe mu mwaka wa 1979. Yashakanye na Oleg mu mwaka wa 1989

Ibyo yavuze

Ni gute abandi bagufashije muri ibi bihe bitoroshye?

Nifuza gushimira Inteko Nyobozi kuba idutegurira amafunguro yo mu buryo bw’umwuka mu gihe gikwiriye. Nanone ndashimira abavandimwe na bashiki bacu bose bitanga bagafasha mu gutegura indirimbo, firimi, videwo, amakoraniro no mu guhindura Bibiliya. Nshimira Yehova cyane kuba mfite umuryango w’abavandimwe beza kandi bagira urugwiro, bantera inkunga muri ibi bihe bitoroshye.

Ni ibihe bintu byihariye Yehova yaguhaye byagufashije?

Isengesho hamwe no gutekereza ku ndirimbo urugero nk’ifite umutwe uvuga ngo ‘Paradizo iri hafi’ n’ivuga ngo ‘Isi nshya iri bugufi’ biramfasha cyane. Izo ndirimbo zivuga uko ubuzima mu isi nshya buzaba bumeze. Izo ndirimbo zituma numva ntuje kandi nkiringira ko Yehova ankunda.

Izi ngero z’ibyabaye zigaragaza ko Yehova ategura ubwoko bwe guhangana n’ibigeragezo kandi bugakomeza kuba indahemuka. Mureke twese dukomeze kwishingikiriza ku ‘rukundo rudahemuka rwa Yehova n’ukuri kwe.’—Zaburi 115:1.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU