19 WERURWE 2024 | YAHUJWE N’IGIHE KU ITARIKI YA 23 MATA 2024
U BURUSIYA

AMAKURU MASHYA—UMUGABO N’UMUGORE BAHAMIJWE ICYAHA | ‘Yehova ni we umpumuriza’

FUNGURA

Ku itariki ya 22 Mata 2024, urukiko rw’umujyi wa Petropavlovsk-Kamchatskiy rwo mu gace ka Kamchatka rwahamije icyaha umuvandimwe Sergey Chechulin n’umugore we Yelena Chechulina. Buri wese bamuhaye igihano gisubitse cy’imyaka ibiri. Ntibizaba ngombwa ko bajyanwa muri gereza.

Icyo twabavugaho

Sergey Chechulin

Igihe yavukiye: 1968 (Tymlat, mu gace ka Kamchatka)

Ibimuranga: Yakuriye mu kigo cy’imfubyi. Akora akazi ko gusana mu ruganda rukora ibyuma bitanga ubushyuhe

Incuti ye yari yaratangiye kwiga Bibiliya, yamutumiye mu materaniro y’Abahamya ba Yehova. Sergey yabonye ibisubizo byumvikana ku bibazo yibazaga. Yabatijwe mu mwaka wa 1995

Yashakanye na Yelena mu mwaka wa 2000. Bafite umwana umwe w’umuhungu

Ibyo yavuze

Ese hari umurongo wa Bibiliya wabafashije cyane wowe n’umugore wawe?

Ubu ntabwo twemerewe kurenga agace dutuyemo, imodoka yacu yarafashwe, kandi konti zacu za banki zarafatiriwe. Icyakora ubu twiyumvisha cyane amagambo yo muri Zaburi 55:22, agira ati: “Ikoreze Yehova ibiguhangayikisha byose, na we azagufasha. Ntazigera yemera ko umukiranutsi agwa.” Yehova yadusezeranyije kuzajya akomeza kuduha imbaraga. Kubera iyo mpamvu, ibi bibazo duhanganye na byo ntabwo byaduciye intege. Ibyo byatumye tubona ko dukwiriye kurushaho kwishingikiriza kuri Yehova n’umuryango w’abavandimwe, kandi twiyemeje kurushaho gukomeza gukorera Yehova uko dushoboye kose.

Yelena Chechulina

Igihe yavukiye: 1978 (Petropavlovsk-Kamchatskiy)

Ibimuranga: Ni umuforomo

Mama wa Yelena yatangiye kwigana Bibiliya n’Abahamya ba Yehova. Ibi byafashije Yelena kubona ko akeneye kumenya ibyerekeye Imana, maze asaba kwiga Bibiliya. Yabatijwe mu mwaka wa 2000

Yashakanye na Sergey mu mwaka wa 2000

Ibyo yavuze

Ibi bihe bitoroshye murimo byakwigishije iki kuri Yehova?

Nabonye ko uko ibintu bigenda bihinduka mu buzima, ari ko ndushaho gusobanukirwa Bibiliya. Urugero, muri ibi bihe by’ibitotezo, narushijeho gusobanukirwa ibyo Pawulo yanditse mu Baroma 8:38, 39, agira ati: “Nemera ntashidikanya ko naho rwaba urupfu cyangwa ubuzima cyangwa abamarayika cyangwa ubutegetsi cyangwa ibintu biriho ubu cyangwa ibizaza cyangwa ububasha cyangwa ubuhagarike cyangwa ubujyakuzimu cyangwa ikindi cyaremwe cyose, bitazashobora kudutandukanya n’urukundo rw’Imana ruri muri Kristo Yesu Umwami wacu.” Iyo Yehova ashaka kunyizeza ko ankunda, nta kintu na kimwe gishobora kumubuza kubikora. Kandi arabikora ku buryo ntashidikanya ko ari we umpumuriza. Yehova ntaceceka cyangwa ngo ahishe urukundo akunda abagaragu be. Nzi ko ibi bihe nyuramo bizamfasha kwihanganira ibigeragezo byose bizaza mu gihe kiri imbere.

Kimwe na Sergey na Yelena, natwe duha agaciro impano nziza y’Ijambo ry’Imana, kuko idusubizamo imbaraga kandi ikaduha ubwenge dukeneye kugira ngo dukomeze kuba abizerwa nubwo tugeragezwa.—Zaburi 19:7.

Uko ibintu byagiye bikurikirana

Ku itariki ya 25 Nzeri 2022

Ni bwo batangiye gukurikiranwa mu nkiko
Ku itariki ya 17 Ukwakira 2022

Urugo rwabo rwarasatswe
Ku itariki ya 6 Nzeri 2023

Sergey yabujijwe kurenga mu gace atuyemo
Ku itariki ya 7 Nzeri 2023

Yelena yabujijwe kurenga mu gace atuyemo
Ku itariki ya 26 Ukuboza 2023

Ni bwo urubanza rwatangiye

Reba nanone

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU