4 UGUSHYINGO 2022
U BURUSIYA

AMAKURU MASHYA—UMUGABO N’UMUGORE WE BAHAMIJWE IBYAHA | Bakomejwe n’ingero zo muri Bibiliya z’abantu bagaragaje ukwizera

FUNGURA

Ku itariki ya 8 Ugushyingo urukiko rw’umujyi wa Petropavlovsk-Kamchatskiy ruherereye mu ntara ya Kamchatka rwahamije icyaha umuvandimwe Dmitriy Semenov n’umugore we Nadezhda. Buri wese yakatiwe igifungo gisubitse cy’imyaka ine. Ntibizaba ngombwa ko bajyanwa muri gereza.

Uko ibintu byagiye bikurikirana

Ku itariki ya 3 Nzeri 2021

Umugore wiganaga Bibiliya na Dmitriy na Nadezhda yatangiye gukorana n’urwego rushinzwe ubutasi. Batangiye kubakurikiranwa mu nkiko kubera amakuru uwo mugore yatanze. Bashinjwe gukangurira abandi no kubemeza kujya mu muryango ukora ibikorwa by’ubutagondwa no kwifatanya mu bikorwa byawo
Ku itariki ya 6 Nzeri 2021

Inzu yabo yarasatswe. Bajyanywe guhatwa ibibazo kandi babategeka kutarenga agace batuyemo
Ku itariki ya 26 Nyakanga 2022

Ni bwo urubanza rwatangiye

Icyo twabavugaho

Dmitriy Semenov

Igihe yavukiye: 1984 (Petropavlovsk-Kamchatskiy)

Ibimuranga: Yize imibare na mudasobwa. Akora porogaramu za mudasobwa

Yamenye Abahamya ba Yehova bwa mbere binyuze kuri mwene wabo. Yabatijwe mu mwaka wa 2006. Yakoze imirimo ya gisivili isimbura iya gisirikare

Yashakanye na Nadezhda mu mwaka wa 2010

Ibyo yavuze

Ni uruhe rugero rwo muri Bibiliya rwatumye urushaho kwiringira Yehova?

Na mbere y’uko ibitotezo bitangira nakundaga gutekereza ku rugero rwa Yeremiya. Cyane cyane, igihe yashyirwaga mu nzu y’imbohe mu gihe Yerusalemu yarigoswe n’ingabo z’Abanyababuloni. Byagaragara ko nta cyizere yari afite, ariko Yehova yamurinze mu buryo budasanzwe. Igihe abaturage b’i Yerusalemu barimo kwicwa n’inzara, Yeremiya we yakomeje kubona ibyokurya kandi yarokotse irimbuka rya Yerusalemu (Yeremiya 37:21). Yehova abona ibitugeraho mu buryo butandukanye nuko tubibona kandi aba azi n’ibitugeraho. Hari igihe tuba tubona ntaho twacikira, ariko mu gihe gikwiriye Yehova akaducira inzira.

Nadezhda Semenova

Igihe yavukiye: 1985 (Yekaterinburg, mu gace ka Sverdlovsk)

Ibimuranga: Akiri umwana, yakundaga kuririmba muri korari yo ku ishuri no kubyina. Akora mu iduka

Mukuru we ni we watumye amenya Abahamya ba Yehova, kuko ari we wabanje kwiga Bibiliya. Nadezhda, mama we na mukuru we babaye Abahamya ba Yehova. Yabatijwe mu mwaka wa 1997

Yashakanye na Dmitriy mu mwaka 2010

Ibyo yavuze

Ni iyihe nkuru yo muri Bibiliya yakomeje ukwizera kwawe?

Vuba aha twasuzumye inkuru y’umupfakazi w’i Sarefati n’ukuntu yagaragaje ukwizera nyuma akabona imigisha. Iyo ngingo yaravuze iti: “Imana iha umugisha abagaragaza ukwizera.” Yasubiragamo amagambo yo mu Munara w’Umurinzi w’i Siyoni yasohotse mu mwaka wa 1898, yakomeje igira iti: “Iyo ngingo yakomeje ivuga ko natwe hari igihe Yehova yemera ko ukwizera kwacu kugeragezwa. Nitugaragaza ukwizera “tuzabona imigisha; nitutakugaragaza tuzayibura.”

Ibi byanyigishije ko ikigeragezo uko cyaba gikomeye kose, ari iby’ingenzi ko ngomba gukomeza kuba indahemuka kuri Yehova n’abavandimwe na bashiki bacu. Nimbigenza ntyo, Yehova azamfasha kubyihanganira ampa kugira ubutwari, ukwizera n’imbaraga nkeneye.

Dmitriy na Nadezhda bibonera ko Yehova afasha abagaragu be kugira ubutwari no gushikama mu bitotezo. Ntazigera abatererana.—Yosuwa 1:9.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU