5 GASHYANTARE 2024| YAHUJWE N’IGIHE KU ITARIKI YA 9 UKWAKIRA 2024
U BURUSIYA

AMAKURU MASHYA—UMUVANDIMWE ALEKSANDR YACIWE AMANDE | “Jya ureka Yehova akuyobore mu byo uteganya gukora byose”

FUNGURA

Ku itariki ya 7 Ukwakira 2024, Urukiko rw’Akarere ka Shadrinskiy, ruherereye mu gace ka Kurgan, rwahamije icyaha umuvandimwe Aleksandr Lubin, maze rutegeka ko acibwa amande agera hafi kuri miliyoni 7 z’amafaranga y’u Rwanda.

Icyo twamuvugaho

Aleksandr Lubin

Igihe yavukiye: 1956 (Ogonek, mu gace ka Kurgan)

Ibimuranga: Yari umwenjeniyeri mu byo kwirinda impanuka mu kigo gishinzwe iby’ingufu, mbere y’uko ajya mu kiruhuko cy’izabukuru

Yashakanye na Tatyana muri Kanama 2001. Bafite abana babiri

Tatyana yatangiye kwigana Bibiliya n’Abahamya ba Yehova, nyuma yaho aza guturika agatsi ko mu bwonko, bisaba ko Aleksandr yajya amusomera Bibiliya. Ibyo byatumye Aleksandr atangira gukunda inyigisho zo muri Bibiliya. Aleksandr, Tatyana n’abana babo babiri bose babatirijwe rimwe mu mwaka wa 2003

Ubu Aleksandr agendera ku mbago, bitewe n’uko yarwaye indwara ituma amaraso yipfundika, kandi banamusanzemo indwara ituma abasirikare b’umubiri badakora neza.

Ibyo yavuze

Ni iki cyagufashije kudacika intege igihe wari ufunzwe?

Kuba muri gereza ntabwo biba byoroshye. Sinari nemerewe gufata imiti igabanya ububabare nterwa n’uburwayi. Nkimara gufungwa, nasabaga Yehova ko yamfasha ngafungurwa vuba uko bishoboka kose. Nyuma yaho ariko natangiye kumusaba ko yamfasha nkihangana kandi nkakomeza gutuza. Nanone nasengeraga abandi bavandimwe na bashiki bacu bafunzwe. Naribwiye nti: “Ibi bintu ntabwo bizahoraho.” Kuva ubwo nahise ntangira kwibanda ku migisha Yehova ampa. Ibyo byamfashije gukomeza kugira ibyishimo. Amaherezo, naje gufungurwa. Natewe inkunga cyane na Zaburi ya 37:5 igira iti: “Jya ureka Yehova akuyobore mu byo uteganya gukora byose. Ujye umwishingikirizaho na we azagufasha.” Nizeye ko Yehova adashobora kwemera ko tugeragezwa ibirenze ibyo dushobora kwihanganira. Igihe cyose twiringiye Yehova kandi tukamwishingikirizaho, ntabwo azigera ananirwa kudufasha, ibibazo twaba duhanganye na byo uko byaba bimeze kose.

Kimwe na Aleksandr, twizeye ko nitwiringira Yehova tuzabasha gukomeza kuba indahemuka, ibibazo twaba duhanganye na byo byose.—Yesaya 38:14.

Uko ibintu byagiye bikurikirana

Ku itariki ya 13 Nyakanga 2021

Ni bwo yatangiye gukurikiranwa mu nkiko
Ku itariki ya 14 Nyakanga 2021

Ingo umunani z’Abahamya ba Yehova zarasatswe. Aleksandr arafatwa, ahatwa ibibazo kandi afungwa by’agateganyo
Ku itariki ya 16 Nyakanga 2021

Yoherejwe muri gereza
Ku itariki ya 19 Nyakanga 2021

Yarajuriye kubera ko afite ibibazo bikomeye by’uburwayi
Ku itariki ya 28 Kanama 2021

Aleksandr yararekuwe nyuma y’aho Urukiko rw’u Burayi Ruharanira Uburenganzira bw’Ikiremwamuntu ndetse n’indi miryango iharanira uburenganzira bw’ikiremwamuntu bibisabye
Ku itariki ya 14 Nyakanga 2023

Ni bwo urubanza rwatangiye
Ku itariki ya 7 Nzeri 2023

Urubanza rwarasubitswe kubera ko Aleksandr yari ari mu bitaro

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU