18 KANAMA 20222022 | YAHUJWE N’IGIHE KU ITARIKI YA 19 UKUBOZA 2023
U BURUSIYA

AMAKURU MASHYA—UMUVANDIMWE NA MUSHIKI WACU BARAFUNZWE | Kwizera Yehova byatumye badatinya ibitotezo

FUNGURA

Ku itariki ya18 Ukuboza 2023, urukiko rw’akarere ka Novosibirsk, mu gace ka Novosibirsk, rwahamije icyaha umuvandimwe Valeriy Maletskov na mushiki wacu Marina Chaplykina. Valeriy yakatiwe igifungo cy’imyaka itandatu naho Marina we yakatiwe imyaka ine. Bombi bahise bajyanwa muri gereza bakiva mu rukiko.

Uko ibintu byakurikiranye

Mu mwaka wa 2018

Umuntu wigaga Bibiliya kandi wajyaga mu materaniro y’Abahamya ba Yehova, mbere y’uko Abahamya ba Yehova bacibwa mu Burusiya, yatangiye gukorana n’abashinzwe ubutasi bo mu mujyi wa Novosibirsk, maze ababwira amakuru yose y’abantu bajyaga mu materaniro
Ku itariki ya 19 Mata 2019

Abashinzwe umutekano bifashishije ayo makuru, basaka amazu atandatu y’Abahamya ba Yehova bo mu mujyi wa Novosibirsk. Urubanza ruregwamo Valeriy Maletskov na Marina Chaplykina rwaratangiye. Bombi barafashwe bafungwa by’agateganyo
Ku itariki 21 Mata 2019

Bombi bavanywe mu kigo bari bafungiyemo by’agateganyo. Valeriy yafungiwe mu rugo naho Marina Chaplykina asabwa kutarenga ahantu runaka
Ku itariki 21 Gashyantare 2022

Valeriy bamushinje ko ayobora ibikorwa by’umuryango ukora ibikorwa by’ubutagondwa. Marina Chaplykina yashinjwe gutera inkunga no gukora imirimo y’umuryango ukora ibikorwa by’ubutagondwa
Ku itariki ya 30 Werurwe 2022

Urubanza rwaratangiye

Icyo twabavugaho

Marina Chaplykina

Igihe yavukiye: 1971 (Novosibirsk)

Ibimuranga: Yakoze akazi ko gutunganya imisatsi. Afite umwana w’umukobwa kandi nta mugabo agira

Igihe Abahamya ba Yehova bamubwirizaga ku nzu n’inzu akabona izina bwite ry’Imana muri Bibiliya, yatangiye kwigana Bibiliya na bo. Yabatijwe mu mwaka wa 2004

Ibyo yavuze

Gukurikiza inama zitangwa n’umuryango wacu byakugiriye akahe kamaro?

Igihe abategetsi batangiraga gutoteza Abahamya ba Yehova, niboneye ko ari ngombwa kwitondera inama zitangwa n’abavandimwe no guhita nzikurikiza vuba uko bishoboka kose. Igihe batangiraga gufunga abantu bo mu kandi gace, namenye uko byagendaga n’ukuntu abavandimwe bitwaraga. Ibyo byose byamfashije kwitegura ibyari bigiye gukurikiraho.

Ni mu buhe buryo isengesho ryagufashije?

Igihe bazaga kumfata, ikintu cya mbere natekereje ni urugero rwa Nehemiya. Kimwe na we nasenze isengesho rigufi nsaba Yehova ko ampa gutuza nkagira amahoro yo mu mutima. Nari ntuje cyane igihe bamfataga n’igihe barimo gusaka. Abo bantu baje kumfata nabonaga ari abapolisi barimo gukora akazi kabo. Umukobwa wanjye Nataliya yageze mu rugo atinze. Abapolisi batangajwe n’uko adatunguwe n’uko barimo gusaka inzu yacu. Umwe muri bo yabajije umukobwa wanjye impamvu atagize ubwoba, undi aramusubiza ati: “Bari biteguye ko tuza.” Icyo gihe niboneye ko Yehova yasubije isengesho ryanjye kuko n’abandi bantu babonaga ko dutuje.”

Valeriy Maletskov

Igihe yavukiye: 1974 (Novosibirsk)

Ibimuranga: Yakoze umurimo wo kubaza kandi yakoze mu busitani

Yatangajwe n’ukuntu Abahamya ba Yehova bamusobanuriye ibyo bizera bakoresheje Bibiliya. Yabatijwe mu mwaka wa 1994

Yashakanye na Marina mu mwaka wa 2004. Bafite umwana w’umuhungu

Ibyo yavuze

Ni iki cyatumye wowe n’umuryango wawe mudatinya ibitotezo?

Igihe twatangiraga kubona raporo za bagenzi bacu bafunze twagerageje kwishyira mu mwanya wabo. Twibajije icyo batekerezaga n’uko biyumvaga. Iyo nasengaga ndi njyenyine cyangwa ndi kumwe n’abagize umuryango wanjye nasabaga Yehova ko yaduha ubutwari ntidutinye ibigeragezo. Twabonye ingero nyinshi z’abavandimwe na bashiki bacu bahuye n’ibigeragezo nk’ibyacu ariko bagashakisha uburyo bwo kubwiriza.

Nanjye igihe nahuraga n’ibigeragezo narushijeho kwegera Yehova, kandi natangiye kubona abantu bantoteza nk’uko Yehova ababona. Nubwo bashobora kuntera ubwoba, nibonera ko bakeneye kumenya ukuri, kandi ko bashobora kukumenya bitiwe n’uko mbahaye urugero rwiza.

Kuba abavandimwe na bashiki bacu bahura n’ibigeragezo bagakomeza kwihangana bigaragaza ko Yehova abaha imigisha kandi akabarinda.—1 Yohana 5:4.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU