20 MATA 2023 | YAHUJWE N’IGIHE KU ITARIKI YA: 14 KANAMA 2024
U BURUSIYA

AMAKURU MASHYA—UMUVANDIMWE OKHAPKIN YACIWE AMANDE | Kwitegereza ibyaremwe bikomeza umuvandimwe Okhapkin

FUNGURA

Ku itariki ya 13 Kanama 2024, urukiko rw’umujyi wa Kineshemskiy mu ntara ya Ivanovo rwahamije icyaha umuvandimwe Andrey Okhapkin, maze rutegekwa ko acibwa amande y’amafaranga arenga miliyoni umunani z’amafaranga y’u Rwanda.

Icyo twamuvugaho

Andrey Okhapkin

Igihe yavukiye: 1962 (Zavolzhsk, intara Ivanovo)

Ibimuranga: Yakoze akazi ko gukora porogarmu za mudasobwa kandi yigishije fizike

Yashakanye na Irina mu mwaka wa 1987. Abahamya ba Yehova batangiye kwigisha Irina Bibiliya mu mwaka wa 1994. Andrey amaze kwemera ko hariho Umuremyi nawe yatangiye gufatanya n’umugore we kwiga Bibiliya. Bombi babatijwe mu mwaka wa 1995

Ibyo yavuze

Igihe wari ufungishijwe ijisho ni iki cyatumye udakomeza kumva ucitse intege?

Gusenga Yehova ngusha ku ngingo, niyo ryaba isengesho rigufi, byamfashije kutihangayikira. Icyakora, iyo nabaga numva nacitse intege natekerezaga ku rugero rwa Yobu. Yehova yakoresheje ibyaremwe kugira ngo yibutse Yobu imico ye itangaje. Nanjye nagerageje kumwigana. Nkunda cyane kwitegereza akazuba kari kurasa. Nanone nkunda kwitegereza ibicu byo mu kirere, ikirere ubwacyo n’ibiti. Ikindi kandi nkunda uburyo inyoni ziguruka mu buryo butangaje. Nitegereza imikino y’udupusi n’utumbwa tuba hafi yo mu rugo. Namaze amezi agera kuri atanu nitegereza ibyo byose, mpagaze ku rubaraza rw’inzu twabagamo. Ibyo byamfashije gusobanukirwa imico ya Yehova igaragarira mu byaremwe. Ubu namenye neza uburyo Papa wacu wo mu ijuru Yehova adukunda.

Ni mu buhe buryo abandi bantu bihanganiye ibigeragezo, baguteye inkunga?

Igihe nari mfuzwe by’agateganyo, naboneye ibaruwa y’undi muvandimwe wari muri gereza. Yanyandikiye agira ati: “Abantu barambajije bati: ‘Ese wumvaga ufite ubwoba?’ Iyo mbasubiza ko ntabugize nari kuba mbeshye. Ariko tuba tugomba gukora uko dushoboye tukanesha ubwo bwoba kandi ibyo bisaba ubutwari. Kubera ko turi abagaragu ba Yehova, tuba tugomba kugira ubutwari kuko niyo dutangiye gucika intege, Yehova ashobora kutwongerera ubutwari. Ujye uzirikana ko icy’igenzi atari ukwibanda ku bibazo byinshi duhura nabyo, ahubwo ko ari ukugira ukwizera gukomeye.” Gusoma inkuru y’ibyamubayeho n’ibyabaye ku bandi byanyibukije ko nkeneye kurushaho kuba incuti ya Yehova kandi nkuzuza mu bwenge bwanjye no mu mutima wanjye amafunguro yo mu buryo bw’umwuka.

Kimwe na Andrey, twishimira “imirimo itangaje y’Imana,” kuko itwibutsa urukundo idukunda n’uburyo itwitaho.—Yobu 37:14.

Uko ibintu byagiye bikurikirana

Ku itariki ya 18 Ugushyingo 2021

Ni bwo dosiye ye yatangiye
Ku itariki ya 23 Ugushyingo 2021

Basatse ingo esheshatu z’Abahamya ba Yehova harimo n’urwa Andrey. Andrey yarafashwe maze afungwa by’agateganyo
Ku itariki ya 24 Ugushyingo 2021

Bamushinjije ibyaha
Ku itariki ya 25 Ugushyingo 2021

Yafunzwe by’agategenyo
Ku itariki ya 17 Gashyantare 2022

Yararekuwe ariko akomeza gufungishwa ijisho
Ku itariki ya 14 Nyakanga 2022

Baretse kumufungisha ijisho ariko abuzwa kuva mu gace atuyemo
Ku itariki ya 15 Ukuboza 2022

Nibwo urubanza rwe rwatangiye

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU