1 UGUSHYINGO 2021 | YAHUJWE N’IGIHE KU ITARIKI YA 7 GASHYANTARE 2024
U BURUSIYA

AMAKURU MASHYA—UMUVANDIMWE YAFUNGUWE | Umuvandimwe Dmitriy Barmakin akomeje kugira ibyishimo nubwo amaze igihe afunzwe

FUNGURA

Ku itariki ya 6 Gashyantare 2024, rw’Intara ya Primorye muri Vladivostok rwashyigikiye icyemezo cyari cyarafashwe cy’uko umuvandimwe Dmitriy Barmakin ahamwa n’icyaha kandi rutegeka ko igifungo yari yarakatiwe cy’imyaka umunani cyubahirizwa. Yahise ajyanwa muri gereza akiva mu rukiko.

Ku itariki ya 8 Kanama 2023, urukiko rw’intara ya Primorye rwemeye ubujurire bw’umuvandimwe Dmitriy Barmakin maze rutesha agaciro umwanzuro wo kumuhamya ibyaha. Yahise afungurwa. Icyakora urubanza rwe rwasubijwe mu bushinjacyaha ku buryo ruzongera kuburanishwa ku nshuro ya gatatu.

Ku itariki ya 27 Mata 2023, urukiko rw’akarere ka Pervorechenskiy ruri mu mujyi wa Vladivostok mu ntara ya Primorye, rwahamije icyaha Dmitriy kandi rumukatira igifungo cy’imyaka umunani. Akiva mu rukiko, yahise ajyanwa muri gereza.

Ku itariki ya 8 Mata 2022, urukiko rwo mu ntara ya Primorye rwatesheje agaciro umwanzuro wo kugira umwere umuvandimwe Dmitriy Barmakin. Urubanza rwe ruzasubirwamo.

Uko ibintu byagiye bikurikirana

Ku itariki ya 22 Ugushyingo 2021, urukiko rw’akarere ka Vladivostok mu ntara ya Primorye rwasanze umuvandimwe Dmitriy Barmakin ari umwere kandi ko ahanaguweho ibyaha byose ashinjwa. Bwari ubwa mbere urukiko rwo mu Burusiya ruvuze ko rusanze Umuhamya wa Yehova adahamwa n’icyaha kandi yari yashinjwe ibyaha hashingiwe ku ngingo ya 282.2(1) yo mu gitabo cy’amategeko Mpanabyaha yo mu Burusiya (iyo ngingo ivuga ibirebana no gutegura ibikorwa by’umuryango ushinjwa ubutagondwa). Urukiko ruzakuraho ibintu byose byamubuzaga gukora imirimo ye yisanzuye. Uwo mwanzuro uzatangira gukurikizwa tariki ya 3 Ukuboza 2021, niba umushinjacyaha atazajurira
Ku itariki ya 20 Mata 2021

Dosiye ye yarasubukuweye
Ku itariki ya 18 Ukuboza 2020

Dosiye ye yasubijwe mu bushinjacyaha kuko nta bihamya bifatika byari bihari. Icyakora ntiyari yemerewe kugira icyo akora
Ku itariki ya 18 Ukwakira 2019

Nyuma yo kumara umwaka n’amezi ane afunzwe by’agateganyo, Dmitriy yararekuwe ariko amenyeshwa ko hari ibintu atemerewe gukora. Urukiko rwongereye igifungo cy’agateganyo yari yarakatiwe incuro icumi
Ku itariki ya 28 Nyakanga 2018

Ku itariki ya 28 Nyakanga saa moya za mu gitondo, itsinda ry’abagabo bipfutse mu maso kandi bitwaje intwaro ryinjiye ku ngufu mu nzu aho Dmitriy na Yelena, bari baragiye kwita kuri nyirakuru wa Yelena ufite imyaka 90. Dmitriy na Yelena bombi bahise bajyanwa i Vladivostok mu mugi batuyemo uri ku birometero 177 uvuye kwa nyirakuru. Dmitriy yarafashwe kandi ahita ajyanwa gufungwa by’agateganyo
Ku itariki ya 27 Nyakanga 2018

Umuvandimwe Dmitriy Barmakin yatangiye gukurikiranwaho ibyaha
Mu Kwakira 2017

Hari umugore ufite imyaka 30 ukorana n’urwego rushinzwe ubutasi, wigize nk’aho ashimishijwe no kwiga Bibiliya. Yagiye afata videwo mu ibanga ibiganiro bitandukanye yagiranye n’abavandimwe na bashiki bacu

Icyo twamuvugaho

Dmitriy Barmakin

Igihe yavukiye: 1974 (Alushta, muri Crimea)

Ibimuranga: Igihe Barmakin yari afite imyaka icumi, mama we yarapfuye. Yize ibijyanye no guteka, nyuma yiga ibijyanye no gukora porogaramu za mudasobwa. Yashakanye na Yelena mu mwaka wa 2006. Bakunda gutembera no gufotora inyamaswa

Yaguze Bibiliya bwa mbere igihe yari mu mwaka wa munani w’amashuri abanza. Yashishikajwe n’inama zirangwa n’ubwenge ziri mu Byanditswe bituma atangira kwigana Bibiliya n’Abahamya ba Yehova. Yabatijwe mu mwaka wa 1994

Ibyo yavuze

Igihe wari ufunzwe ni iki cyagufashije gukomeza kuba incuti ya Yehova?

Mbere y’uko mfungwa, nari nsanzwe menyereye gusoma Bibiliya buri munsi. Kubera ko muri gereza nta kintu umuntu aba akora, uba ufite igihe gihagije cyo gutekereza. Umuntu aba ashobora kwibuka no gutekereza ku bintu byose. Ntiwareka gutekereza. Niba utarabitse ibintu byiza wabitse mu bwenge bwawe, byakugora gukomeza kuba indahemuka.

Ni uwuhe muco wagufashije kwihangana igihe wari ufunzwe?

Incuro nyinshi nasabaga Yehova kugira ibyishimo kandi yarabimpaye ku buryo nabo twari turi kumwe barabyiboneraga. Mu gitondo iyo babaga baduhamagara, umwe mu bacungagereza yarambazaga ati: “Barmakin, kuki uhora useka?” Naramushubije nti: “Impamvu nseka nuko nishimye.” Yarongeye arambaza ati: “Kuba ufunzwe ni byo bigushimishije?” Naramubwiye nti: “Oya. Nuko ubusanzwe ndi umuntu uhora wishimye kandi kuba ndi muri gereza ntibyambuza.” Ikintu gishishikaje ni uko nanjye ubwanjye ntabaga nzi ko ndimo guseka. Byarizanaga.

Utitaye ku mwanzuro urukiko ruzafata, ni iki wiyemeje?

Nsobanukiwe ko Imana ireka ibi byose bikatugeraho kubera ko izina ryayo rigomba guheshwa ikuzo. Nubwo abanzi bacu bazagerageza gukanga abagaragu ba Yehova no guhagarika umurimo wo kubwiriza, ngenda nibonera ko abacamanza, abashinjacyaha n’abandi bamenya ko Abahamya ba Yehova ari abantu beza. Ubwo rero, niyemeje gukomeza guhesha ikuzo izina rya Yehova

Nubwo Dmitriy na Yelena batandukanyijwe na gereza, bombi bakomeje kutubera urugero rwiza bareka ‘ibyishimo bituruka kuri Yehova bigakomeza kuba igihome cyabo.’—Nehemiya 8:10.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU