26 MATA 2023 | YAHUJWE N’IGIHE TARIKI YA 3 UKWAKIRA 2023
U BURUSIYA

AMAKURU MASHYA—UMUVANDIMWE YAHAMIJWE ICYAHA | “Yehova aradushyigikiye”

FUNGURA

Ku itariki ya 28 Nzeri 2023, urukiko rw’akarere rwo muri Prokopyevsk rwahamije icyaha umuvandimwe Yuriy Chernykh kandi rumukatira imyaka itatu akora imirimo y’agahato. a Ntibizaba ngombwa ko ajya muri gereza.

Icyo twamuvugaho

Yuriy Chernykh

Igihe yavukiye: 1975 (Kimovsk, mu gace ka Tula)

Ibimuranga: Yamaze imyaka irenga 20 akora mu bijyanye no gucukura amabuye y’agaciro

Yashakanye na Yelena mu mwaka wa 2006. Bafite abahungu batatu

Yashishikajwe n’ukuntu ubuhanuzi bwo muri Bibiliya bwagiye busohora nk’uko bwari bwarahanuwe. Yabatijwe mu mwaka wa 2007

Ibyo yavuze

Ese hari umurongo wo muri Bibiliya wagufashije muri ibi bihe?

Kuva ibitotezo byatangira, umurongo wo muri Yesaya 30:15 waramfashije cyane. Muri uwo murongo, Yehova aravuga ati: “Nimukomeza gutuza no kurangwa n’icyizere, ni bwo gusa muzakomera.” Igihe njye n’umugore wanjye, batujyanaga kuduhata ibibazo, nasengeye abagize umuryango wanjye bose. Maze gusenga, nahise numva ntuje kandi mfite amahoro nk’uko umuraba uza ugakubura inkombe. Mu bintu byose byatubayeho njye n’umuryango wanjye, twiboneye ko Yehova adushyigikiye cyane.

Ni uwuhe muco ibigeragezo wahuye na byo byatumye witoza?

Kwihangana byajyaga bingora cyane, ariko ibigeragezo byatumye ndushaho kwihangana. Nasobanukiwe ko Yehova asubiza amasengesho yanjye mu gihe gikwiriye.

Twizeye ko Yehova azakomeza guha abagaragu be b’indahemuka ‘amahoro ameze nk’uruzi,’ igihe cyose bakomeza gukora uko bashoboye ngo bakomeze kumubera indahemuka.—Yesaya 48:18.

Ukuntu byagiye bikurikirana

Ku itariki ya 12 Nyakanga 2020

Basatse urugo rwe. Yuriy na Yelena bajyanywe guhatwa ibibazo
Ku itariki ya 5 Ugushyingo 2021

Bamukoreye idosiye
Ku itariki ya 10 Ugushyingo 2021

Urugo rwe rwasatswe ku nshuro ya kabiri
Ku itariki ya 26 Mata 2022

Yuriy yamenyeshejwe ko atemerewe kurenga agace atuyemo
Ku itariki ya 18 Nyakanga 2022

Ni bwo urubanza rwatangiye

a Umuntu uhawe igihano cyo gukora imirimo y’agahato, leta imuha akazi ariko ikajya ifatira amafaranga ari hagati ya 5 na 20 ku ijana by’umushahara we. Iyo abayobozi bavuze ko uwo muntu adakora cyangwa yanze akazi, ashobora gufungwa.

Reba nanone

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU