16 UKUBOZA 2022 | YAHUJWE N’IGIHE KU ITARIKI YA 20 KAMENA 2023
U BURUSIYA

AMAKURU MASHYA—UMUVANDIMWE YARAFUNZWE | Akomeje kurangwa n’ibyishimo nubwo ahanganye n’ingorane

FUNGURA

Ku itariki ya 20 Kamena 2023, urukiko rw’akarere Tsentralnyi ruri muri Sochi rwahamije icyaha umuvandimwe Danil Suvorov kandi rumukatira igifungo cy’imyaka itandatu. Kuva ku itariki ya 18 Kanama 2021, Danil yari afunzwe by’agateganyo kandi azaguma muri gereza.

Icyo twamuvugaho

Danil Suvorov a

Igihe yavukiye: 1995 (Almetyevsk, muri Repubulika ya Tatarstan)

Ibimuranga: Yakoraga mu iduka ricuruza ibikoresho by’ubwubatsi

Yigishijwe Bibiliya na mama we w’Umuhamya wa Yehova maze abatizwa mu mwaka wa 2011

Ibyo mushiki wacu Gulnara Suvorova yavuze, akaba ari mama wa Danil b

Ni iki gikomeje gufasha Danil kwihangana nubwo afunze?

Nubwo ntarashobora kumusura, ajya anyandikira amabaruwa. Usanga buri gihe Danil ambwira ko ntakwiriye kumuhangayikira kandi rwose wumva atuje. Ahubwo anyizeza ko yibonera uburyo Yehova akomeje kumufasha no kumushyigikira. Danil azwiho kuba ari umuntu wishyikirwaho kandi utega abandi amatwi. Aba yiteguye gufasha abandi igihe bahanganye n’ibibazo. Igihe namenyaga ko icyumba afungiyemo ari cyo yagize ifasi ye, byanteye inkunga. Buri gihe aba afite abantu bashya abwiriza kubera ko mu cyumba afungiyemo bahazana imfungwa nshya iyo izari zirimo zigiye. Nanone asoma Bibiliya, agategura amateraniro, kandi akomeza kubona ko ibikorwa bya gikristo bikwiriye kuza mu mwanya wa mbere.

Kuba warahuye n’ibi bibazo bikomeye byakwigishije iki kuri Yehova?

Nubwo Yehova abona ko ku isi hari ibintu bibi byinshi, ntibituma abura ibyishimo. Mu 2 Ngoma 16:9 hagira hati: “Amaso ya Yehova areba ku isi hose kugira ngo yerekane imbaraga ze arengera abafite umutima umutunganiye.” Ubwo rero Yehova aba yiteguye kugira icyo akora kugira ngo afashe abagaragu be. Nzi neza ko ninkomeza guhugira muri gahunda zo kuyoboka Imana, ngakomeza gufasha abagize itorero hamwe n’abo mbwiriza, bizatuma ntacika intege.

Birashimishije kumenya ko nidukomeza kwifatanya mu bikorwa byo kuyoboka Imana kandi tukarushaho kwegera Yehova, ari bwo tuzakomeza kurangwa n’ibyishimo, uko ibibazo twahura na byo byaba biri kose.—Zaburi 16:11.

Uko ibintu byagiye bikurikirana

Ku itariki ya 13 Kanama 2021

Ikirego cyatangiye biturutse ku bihamya byatanzwe n’umuntu wigize nk’ushaka kwiga Bibiliya ariko akorana n’ubuyobozi
Ku itariki ya 18 Kanama 2021

Basatse urugo rwe. Yarafashwe bajya kumufunga by’agateganyo
Ku itariki ya 19 Kanama 2021

Yimuriwe ahandi akomeza gufungwa by’agateganyo
Ku itariki ya 29 Mata 2022

Bamushinje gutegura no kwifatanya mu bikorwa by’umuryango ushinjwa ubutagondwa no gushishikariza abandi kubijyamo
Ku itariki ya 10 Kamena 2022

Urubanza rwaratangiye

a b Igihe twateguraga iyi nkuru umuvandimwe Suvorov yari afunzwe by’agateganyo ku buryo tutabashije kugira icyo tumubaza.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU