18 GICURASI 2022 | YAHUJWE N’IGIHE KU ITARIKI YA 12 WERURWE 2024
U BURUSIYA

AMAKURU MASHYA—UMUVANDIMWE YARAFUNZWE | Umuvandimwe Inver Siyukhov yagwije imbaraga

FUNGURA

Ku itariki ya 7 Werurwe 2024, urukiko rw’umujyi wa Maykop muri Repubulika ya Adygeya rwahamije icyaha umuvandimwe Inver Siyukhov kandi rumukatira igifungo cy’imyaka itandatu. Azakomeza gufungwa kuko yafunzwe by’agateganyo kuva muri Mata 2021.

Uko ibintu byagiye bikurikirana

Ku itariki ya 15 Mata 2021

Bamureze ko yakoreye amateraniro kuri videwo
Ku itariki ya 16 Mata 2021

Abayobozi bagiye gusaka inzu y’umuvandimwe Inver n’andi mazu ane y’Abahamya ba Yehova. Bamuhase ibibazo kandi bamufunga by’agateganyo
Ku itariki ya 17 Mata 2021

Yoherejwe muri gereza by’agateganyo
Ku itariki ya 15 Kanama 2021

Yimuriwe muri gereza irinzwe cyane iri ku birometero 110 uvuye Maykop
Ku itariki ya 13 Nzeri 2021

Urubanza rwaratangiye

Icyo twamuvugaho

Inver Siyukhov

Igihe yavukiye: 1974 (Maykop)

Ibimuranga: Yize icungamutungo n’igenzura ry’imari. Yakoze muri banki kandi yabaye kontabure

Yatangiye kwigana Bibiliya n’Abahamya ba Yehova mu mwaka wa 1989. Yatangajwe n’ukuntu Abahamya ari inyangamugayo. Yabatijwe ku itariki ya 9 Nzeri 1990. Nanone yabwirije mushiki we maze na we abatizwa mu mwaka wa 1992. Mushiki we n’umugabo we ni bo bonyine bo mu muryango we b’Abahamya ba Yehova

Ibyo mushiki we Zarieta Churda yavuze a

Ni iki gifasha umuvandimwe Inver kwihangana igihe ari muri gereza?

Igihe namusuraga bwa mbere musanze muri gereza namubajije uko yumvaga ameze bitewe n’uko yatandukanijwe n’inshuti ze n’abagize umuryango we. Icyo gihe yarasetse maze ambwira ko igihe batangiraga kumusaka ari nk’aho Yehova yamwongereye imbaraga zidasanzwe mbese nk’uko umuntu yuzuza umwuka mu mupira cyangwa mu gipirizo

Nanone yakomeje gusoma no kwiga Ijambo ry’Imana. Buri munsi yasomaga ibice bitatu mu Byanditswe by’Igiheburayo n’ikindi gice cyo mu Byanditswe by’Ikigiriki. Nanone yafashije abandi bari bafunganywe. Mu mezi abiri ya mbere yamaze muri gereza yari amaze gufasha imfungwa ebyiri kureka itabi.

None se wowe n’umugabo wawe mukora iki ngo mwitegure, ko isaha n’isaha mushobora gufungwa?

Iyo ba mukerarugendo bagiye kujya gutemberera mu kindi gihugu, babanza gukingirwa indwara zishobora kubafata. Ubwo rero inkingo zange zituma ngira ubudahangarwa ni imirongo y’ibyanditswe, indirimbo z’umuryango wacu n’inkuru z’ibyabaye ziteye inkunga. Igihe abategetsi bahagarikaga umurimo w’Abahamya ba Yehova mu Burusiya mu mwaka wa 2017, nasomye mu Gitabo Nyamwaka raporo y’umurimo wo kubwiriza mu bihugu byahagaritse umurimo wacu. Nashimishijwe n’ukuntu abavandimwe na bashiki bacu bakomeje kubwiriza kandi bakagira ukwizera gukomeye nubwo bari bahanganye n’ibibazo byinshi.

Twiyemeje ko nituramuka dufunzwe, tutazahangayika cyane. Ntibizadushimisha ariko nanone tuzabona ko ari ho Yehova atwohereje kubwiriza. Tuzumva ko ari nk’aho atubwiye ati: “Mwambuke muze i Makedoniya.”—Ibyakozwe 16:9

Twiringiye ko abavandimwe na bashiki bacu dukunda bo mu Burusiya “bazakomeza kugwiza imbaraga mu Mwami no mu bushobozi bw’imbaraga ze.”—Abefeso 6:10.

a Kubera ko umuvandimwe Siyukhov ari muri gereza, ntitwabonye uko tuganira na we.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU